1 Itikpi ke Eno ko Minyo, otukpokyi ke eno ko ginyi, Omeremu Omagdalin kpo Omeremu oye ni gebe ko ma amiri. 2 Okpagye ja ko otata, kweyi oyoleho ka Adole sa bwi iso wo okpagye kweyi wa gebe ka amiri, yi kyikpo bize, kweyi yagye ikweyi nu. 3 Oya yu byo ola ka akpula, oshiye nu nehe yayu byo omowu ni. 4 Oshi nu ya awadakare ni kwu kweyi ashekwu. 5 Ebeni oyoleho ni ka da anya ni mo, <<Alaka yoshi lo, ngye mo, ala ba tikpo ko Oyesu ni ayo poshi ni la. 6 Oye ebe ni kelo, onyiso nu byoni oka ni. Ala wa ga mebe ni ogwutagye ni. 7 Ala ga papa, shini ala ga ka da awogboso mo, <Onyiso amiri kweyi yo ohobu kala ya go Ogalili oma. Ebeni ala ba ga mo.> Nka dala oma.>>

8 Anya ni nyinya papa bwebe ka amiri, kpo oshi ki shotunehe kweyi ga ka da awogboso. 9 Ebeni Oyesu abiyinu gbayi kpawa. Otuwogbogba mo <<Ala nngmagye.>> Awebe nu wa bi ikpo kweyi geyagye danu. 10 Oyesu ka dawa mo, <<Ala ka yoshi lo. Ala ga ka da ayene hin mo ana go Ogalili, ebeni aba ga mun.>>

11 Ishini anya bowe ba gani, ashishini ka adakare gipu ko ogya ebe ka awoteyi ka awosapa ga ko oza ni gbodagye kpiri ni dawa. 12 Ishini awoteyi ka awosapa kpa awanyakwase ga gbayi ni, agbela kweyi ada awadakare ikwiri nwashika, 13 kweyi ka dawa mo, <<Ala ga kamo, <Awogboso wa otu wayo okwu nu yi wi ishini ala ba gbo ola ni.> 14 Owoni oshu mani gobutu ko ogbolamaga, aha ba bo shini na sha ala bita.>> 15 Awadakare zi ikwiri kweyi gaya byoni aka dawa ni. Mani oni oshu mani gyehe tipu kawase ko Oyahuda kwikyikyeni.

16 Ebeni awogboso igwoye ni go Ogalili, agikweyi ke efu ni Oyesu ka dawa mo ana ga ni. 17 Ishini amo ni, ageyagye danu; ashishini wa ke ikpiye wa kpo kpanu lo. 18 Oyesu webe wa kweyi wa kamo <<Kpiri ko oshu ki iso kpo okpagye ayi dami la. 19 Ni olemani, ala ga ya ase kese mani kpiri na wa awo gbosun, ala ga yuwo obatisma ipu ki iye ka Ada kpa ko Oyi, kpa ko Omaku ko Owuso, 20 kweyi ala fuwoza ni nka dala kpiri ni. Ko kwokwoshi, nyyo kpala kpiri ki ishi, go okweyi kese mani.>>