Deuteronômio 33

मूसा का इस्राएलियाँ तै दिया होया आशीर्वाद

1 जो आशीर्वाद परमेसवर के जन मूसा नै अपणी मौत तै पैहल्या इस्राएल के माणसां ताहीं दिया सै वो न्यू सै।

2 उसनै कह्या,

यहोवा सीनै तै आया, अर सेईर तै उनकै खात्तर उदय होया;

उसनै पारान पर्वत पै तै अपणा तेज दिखाया,

अर लाखां पवित्रां कै बिचाळै तै आया,

उसकै सोळा हाथ तै उनकै खात्तर ज्वालामय विधियाँ लिकड़ी।

3 वो जरुर माणसां तै प्यार करै सै;

उसके सारे पवित्र माणस तेरै हाथ म्ह सै;

वे तेरे पैरां कै धोरै बैठ्ठे रहवैं सै,

एक-एक तेरे वचनां तै फायदा ठावै सै।

4 मूसा नै म्हारै ताहीं नियम-कायदे दिए, अर वो याकूब की मण्डळी के खुद का हिस्सा ठहरे।

5 जिब प्रजा कै खास-खास माणस, अर इस्राएल के सारे गोत्र एक साथ होकै कठ्ठे होए,

फेर वो यशूरून*33:5 इस्राएल के माणसां खात्तर प्रेम तै बुलाए जाण आळा नाम म्ह राजा ठहरया।

रूबेन तै आशीर्वाद

6 "रूबेन ना मरै, बल्के जिन्दा रहवै, फेर भी उसकै उरै के माणस थोड़े हों।"

यहूदा तै आशीर्वाद

7 अर यहूदा पै यो आशीर्वाद होया जो मूसा नै कह्या,

"हे यहोवा तू यहूदा की सुण,

अर उसनै उसके लोग्गां कै धोरै पोंहचा।

वो अपणे खात्तर आप अपणे हाथ्थां तै लड़या,

अर तू ए उसके दुश्मनां कै खिलाफ उसका मददगार हो।"

लेवी तै आशीर्वाद

8 फेर लेवी कै बारै म्ह उसनै कह्या,

"तेरे तुम्मीम अर ऊरीम तेरे भगत कै धोरै सै, जिस ताहीं तन्‍नै मस्सा म्ह परख लिया,

अर जिसकै गैल मरीबा नाम के चोए पै तेरी बोल-चाल होई;

9 उसनै तो अपणे माँ-बाप कै बारै म्ह कह्या, ‘मै उन ताहीं न्ही जाणदा;’

अर न तो उसनै अपणे भाईयाँ ताहीं अपणा मान्या, अर ना अपणे बेट्टयाँ ताहीं पिच्छाण्या।

क्यूँके उननै तेरी बात मान्‍नी, अर वे तेरे करार का पालन करैं सैं।

10 वे याकूब नै तेरे नियम, अर इस्राएल ताहीं तेरे नियम-कायदे सिखावैंगे;

अर तेरै आग्गै धूप अर तेरी वेदी पै सर्वांग पशु नै होमबलि करैंगे।

11 हे यहोवा, उसकी सम्पत्ति पै आशीष दे, अर उसकै हाथ्थां की सेवा नै अपणाले;

उसके बिरोधियाँ अर बैरियाँ की कमर पै इसा मार, के वो फेर उठ ना सकै।"

बिन्‍यामीन तै आशीर्वाद

12 फेर उसनै बिन्‍यामीन कै बारै म्ह कह्या,

"यहोवा का वो प्यारा जन, उसकै धोरै बेधड़क वास करैगा;

अर वो दिन भर उसपै छाया करैगा,

अर वो उसके कंध्या नै आराम दिया करैगा।"

यूसुफ तै आशीर्वाद

13 फेर यूसुफ कै बारै म्ह उसनै कह्या;

"इसका देश यहोवा तै आशीष पावै

यानिके आसमान के अनमोल पदार्थ अर ओस,

अर वो गहरा पाणी जो नीच्‍चै सै,

14 अर सूरज के पकाए होए अनमोल फळ,

अर जो अनमोल पदार्थ हर महिन्‍ने म्ह उगाए उगै सैं,*33:14 पूरे चाँद के दिनां म्ह पैदावार

15 अर प्राचीन पहाड़ां के उत्तम पदार्थ,

अर सनातन पहाड़ियाँ के अनमोल पदार्थ,

16 अर धरती अर जो अनमोल पदार्थ उस म्ह भरे सैं,

अर जो झाड़ी म्ह रहवै था उसकी खुशी।

इन सारया कै बारै म्ह यूसुफ कै सिर पै,

यानिके उसे कै सिर के चाँद पै जो अपणे भाईयाँ तै न्यारा होया था आशीष ए आशीष फळै।

17 वो प्रतापी सै, मान्‍नो गां का जेठ्ठा बेट्टा सै, अर उसकै सींग जंगळी बळध कै जिसे सैं;

उसनै वो देश-देश के लोग्गां ताहीं बल्के धरती के कुणे ताहीं के सारे माणसां नै धकेल्‍लैगा;

वे एप्रैम के लाखों-लाख, अर मनश्शे के हजारों हजार सैं।"

जबूलून अर इस्साकार तै आशीर्वाद

18 फेर जबूलून कै बारै म्ह उसनै कह्या,

"हे जबूलून, तू बाहर लिकड़दे बखत,

अर हे इस्साकार, तू अपणे डेरयां म्ह खुशी मना।

19 वे देश-देश के माणसां ताहीं पहाड़ पै बुलावैंगे;

वो ओड़ै धर्मयज्ञ करैंगे;

क्यूँके वे समुन्दर का धन,

अर रेत म्ह दबे होए अनमोल पदार्थ तै फायदा ठावैगें।"

गाद तै आशीर्वाद

20 फेर गाद कै बारै म्ह उसनै कह्या,

"धन्य वो सै जो गाद नै बढ़ावै सै!

गाद तो शेरणी की तरियां सै,

अर बांह नै, बल्के सिर कै चाँद तक नै पाड़ देवै सै।

21 अर उसनै पैहल्ड़ा हिस्सा तो अपणे खात्तर छाँट लिया,

क्यूँके ओड़ै सरदार कै जोग्गा हिस्सा धरया होया था;

फेर उसनै प्रजा के खास-खास माणसां कै गैल आकै यहोवा का ठहराया होया धर्म,

अर इस्राएल कै गैल होकै उसके नियम का पालन करया"

दान तै आशीर्वाद

22 फेर दान कै बारै म्ह उसनै कह्या,

"दान तो बाशान तै कूदण आळा शेर का बच्‍चा सै।"

नप्ताली तै आशीर्वाद

23 फेर नप्ताली कै बारै म्ह उसनै कह्या,

"हे नप्ताली, तू जो यहोवा की खुशी तै तृप्त,

अर उसकी आशीष तै भरपूर सै,

तू पश्चिम अर दक्षिण के देश का अधिकारी हो"

आशेर तै आशीर्वाद

24 फेर आशेर कै बारै म्ह उसनै कह्या,

"आशेर के बेट्टयाँ कै बारै म्ह आशीष पाए;

वो अपणे भाईयाँ म्ह प्यारा रहवै,

अर अपणा पैर तेल म्ह डुबोवै।

25 तेरे जूत्ते लोहवै पीत्तळ कै होवैगें,

अर जिसे तेरे दिन उसीए तेरी ताकत हो।

मूसा के जरिये परमेश्‍वर की स्तुति

26 हे यशूरून*33:26 यशूरून इस्राएल के माणसां खात्तर प्रेम तै बुलाए जाण आळा नाम, परमेसवर कै बराबर और कोए न्ही सै,

वो तेरी मदद करण नै आसमान पै,

अर अपणा प्रताप दिखान्दा होया

अकासमण्डल पै सवार होकै चाल्‍लै सै।

27 अनादि परमेसवर तेरा गृहधाम सै,

अर नीच्‍चै सनातन बांह सैं।

वो दुश्मन नै तेरै आग्गै तै लिकाड़ देन्दा,

अर कहवै सै, उननै सत्यानाश करदे।

28 अर इस्राएल बिना डरे बस्या रहवै सै,

अन्‍न अर नया दाखमधु कै देश म्ह याकूब का चोवा एक्ला ए रहवै सै;

अर उसकै उप्पर के आसमान तै ओस पड़या करै सै।

29 हे इस्राएल, तू कितना ए धन्य सै!

हे यहोवा तै उद्धार पाई होई प्रजा, तेरै बराबर कौण सै?

वो तो तेरी मदद कै खात्तर ढाल,

अर तेरे प्रताप कै खात्तर तलवार सै;

तेरे दुश्मन तन्‍नै सराहवैंगें,

अर तू उनके ऊँच्‍चे स्थानां नै रौंदैगा।"