1 उन्हे दिनां म्ह इसा होया के यहूदा अपणे भाईयाँ नै छोड़कै एक हीरा नाम के एक अदुल्‍लामवासी माणस कै धोरै जाकै रहण लाग्या था। 2 ओड़ै यहूदा नै शूआ नाम के एक कनानी माणस की बेट्टी ताहीं देख्या; अर उसतै ब्याह करकै उसकै धोरै गया। 3 वा गर्भवती होई, अर उसकै एक बेट्टा पैदा होया; अर यहूदा नै उसका नाम एर धरया। 4 अर वा दुसरी बार फेर गर्भवती होई, अर उसकै एक बेट्टा और पैदा होया; अर उसका नाम ओनान*38:4 ओनान शूआ नै उसका नाम ओनान धरया धरया। 5 फेर उसकै तीसरा बेट्टा पैदा होया, अर उसका नाम शेला धरया; अर जिस बखत इसका जन्म होया, उस बखत यहूदा कजीब नगर म्ह रहवै था। 6 अर यहूदा नै तामार नाम की एक जनान्‍नी तै अपणे जेठ्ठे बेट्टे एर का ब्याह कर दिया। 7 पर यहूदा का वो जेठ्ठा बेट्टा एर यहोवा कै लेखे म्ह दुष्ट था, ज्यांतै यहोवा नै उस ताहीं मार दिया। 8 फेर यहूदा नै ओनान तै कह्या, "अपणी भाभ्भी कै धोरै जा, अर उसकै गेल्या देवर का धर्म पूरा करकै अपणे भाई कै खात्तर सन्तान पैदा कर।" 9 ओनान तो जाणै था के सन्तान मेरी न्ही कुह्वावैगी; इस करकै इसा होया के जिब वो अपणी भाभ्भी कै धोरै गया, तो उसनै धरती पै अपणा वीर्य गिराकै नाश कर दिया, जिसतै इसा ना हो के उसके भाई कै नाम तै पीढ़ी चाल्‍लै। 10 यो काम जो उसनै करया उसतै यहोवा नाराज होग्या अर उसनै उस ताहीं भी मार दिया। 11 फेर यहूदा नै इस डर के मारे के कदे इसा ना हो के अपणे भाईयाँ की तरियां शेला भी मरै, उसनै अपणी बहू तामार तै कह्या, "जिब ताहीं मेरा बेट्टा शेला सियाणा ना हो जावै तब तक अपणे पिता कै घर म्ह बिधवा ए बणकै बैठ्ठी रह।" ज्यांतै तामार अपणे पिता कै घर म्ह जाकै रहण लाग्गी।

12 भोत बखत बीतण पै यहूदा की घरआळी जो शूआ की बेट्टी थी, वा मर गई; फेर यहूदा बिलाप कै दिन बीतण पै अपणे साथी हीरा अदुल्‍लामवासी गैल अपणी भेड़-बकरियाँ की ऊन कतरण आळा कै धोरै तिम्‍नाह नगर म्ह गया। 13 अर तामार नै या खबर मिली, के "तेरा सुसरा अपणी भेड़-बकरियाँ की ऊन कतरुआण खात्तर तिम्‍नाह नगर म्ह जाण लागरया सै।" 14 फेर उसनै न्यू सोचकै के शेला सियाणा होग्या पर मै उसकी घरआळी न्ही होण पाई; फेर उसनै अपणा विधवापन का पहरावा तारया अर घूँघट गेर कै अपणे-आप ताहीं ढक लिया, अर एनैम नगर की फाटक कै धोरै, जो तिम्‍नाह नगर कै राह म्ह सै, जा बैठ्ठी। 15 जिब यहूदा नै उस ताहीं देख्या, तो उसनै उस ताहीं बेश्या समझया; क्यूँके उसनै अपणा मुँह ढँक राख्या था। 16 वो रास्ते म्ह तै ए उसकी ओड़ फिरया, अर उसतै कहण लाग्या, "मन्‍नै अपणे धोरै आण दे," (क्यूँके उसनै यो बेरा कोनी था के वा उसकी बहू सै।) अर वा कहण लाग्गी, "जै मै तेरे ताहीं अपणे धोरै आण दयुँ, तो तू मन्‍नै के देवैगा?" 17 उसनै कह्या, "मै अपणी बकरियाँ म्ह तै किसे एक बच्‍चे नै तेरे धोरै भेज दियुँगा।" फेर उसनै कह्या, "भला उसकै भेजण तक के तू म्हारै धोरै कुछ गिरवी धर जावैगा?" 18 उसनै पूच्छया, "मै तेरे धोरै के गिरवी धरकै जाऊँ?" उसनै कह्या, "अपणी मुहर, अर बाजूबन्द, अर अपणे हाथ की छड़ी।" फेर उसनै उस ताहीं वे चीज दे दी, अर उसकै धोरै गया, अर वा उसतै गर्भवती होगी। 19 फेर वा उठकै अपणे घर चली गई, अर अपणा घूँघट तारकै अपणा विधवापन का पहरावा फेर पैहर लिया।

20 फेर यहूदा नै बकरी का बच्‍चा अपणे साथी उस अदुल्‍लामवासी कै हाथ भेज दिया ताके वो गिरवी धरी होई चीज उस जनान्‍नी कै हाथ्थां तै छुड़ा ल्यावै; पर वा जनान्‍नी उसनै न्ही मिली। 21 फेर उसनै ओड़ै के माणसां तै पूच्छया, "वा देवदासी जो एनैम के राह म्ह एक ओड़ बैठ्ठी थी, कित्त सै?" उननै कह्या, "याड़ै तो कोए देवदासी ना थी।" 22 इस करकै उसनै यहूदा कै धोरै जाकै कह्या, "मेरे ताहीं वा कोनी मिली; अर उस जगहां के माणसां नै कह्या, ‘याड़ै तो कोए देवदासी कोनी थी।’" 23 फेर यहूदा नै कह्या, "आच्छया, वो बन्धक उस्से कै धोरै रहण दे, न्ही तो हम तुच्छ समझे जावागें; देख, मन्‍नै बकरी का यो बच्‍चा भेज दिया था, पर वा तन्‍नै कोनी मिली।"

24 करीबन तीन महिन्‍ने कै बाद यहूदा नै या खबर मिली, "तेरी बहू तामार नै व्यभिचार करया सै; बल्के वा तो व्यभिचार तै गर्भवती भी होगी सै।" फेर यहूदा नै कह्या, "उसनै बाहर ले आओ ताके वा जलाई जावै।" 25 जिब उस ताहीं बाहर लिकाड़या जाण लागरया था, तो उसनै, अपणे सुसरै धोरै न्यू कुह्वा भेज्जा, "जिस माणस की ये चीज सैं, उस्से तै मै गर्भवती सूं," फेर उसनै यो भी कुह्वा भेज्जा, "पिच्छाण तो सही, के या मुहर, बाजूबन्द, अर छड़ी किसकी सैं।" 26 यहूदा नै वे सारी चीज पिच्छाणकै कह्या, "वा तो मेरै तै कम कसूरवार सै; क्यूँके मन्‍नै उसका अपणे बेट्टे शेला तै ब्याह कोनी करया।" अर उसनै उस ताहीं फेर कदे दुबारै शारीरिक सम्बन्ध न्ही बणाये।

27 जिब उसके जाम्मण का बखत आया, फेर न्यू जाण पाट्टी के उसकै गर्भ म्ह जुड़वा बाळक सैं। 28 अर जिब वो जाम्मण लाग्गी, तो एक बाळक का हाथ बाहर आया, अर दाई नै लाल सूत लेकै उसकै हाथ म्ह न्यू कहन्दे होए बाँध दिया, "पैहला योए पैदा होया।" 29 जिब उसनै हाथ समेट लिया, फेर उसका भाई पैदा होग्या। फेर उस दाई नै कह्या, "तू क्यूँ जबरदस्ती तै लिकड़ आया?" ज्यांतै उसका नाम पेरेस धरया गया। 30 बाद म्ह उसका भाई जिसके हाथ म्ह लाल सूत बन्धया था पैदा होया, अर उसका नाम जेरह*38:30 जेरह लाल सुबेर आळी चमक धरया गया।