यशायाह 45

कुस्रू जो परमेसवर का अभिषिक्त सै

1 यहोवा अपणे अभिषिक्त कुस्रू कै बारै म्ह न्यू कहवै सै, मन्‍नै उसके सोळे हाथ ताहीं इस करकै थाम लिया सै ताके उसकै स्याम्ही जात्तां नै दबा दियुँ अर राजयां की कमर ढील्‍ली करुँ, उसके स्याम्ही फाटकां नै इसा खोल दियुँ के वे फाटक बन्द न्ही करे जावैं। 2 "मै तेरै आग्गै-आग्गै चाल्‍लूँगा*45:2 मै तेरै आग्गै-आग्गै चाल्‍लूँगा विजय का राह त्यार करण कै खात्तर, यो सिध्द करण खात्तर के धरती के घमण्डी जीत्तण आळयां की जीत परमेसवर के नियम ए सै। उरै यो विचार सै, थारी जीत के सफर नै घटाण या उसका बिरोध करण आळी हर एक रुकावट नै मै दूर कर देऊँगा। अर ऊँच्‍ची-ऊँच्‍ची धरती नै चौरस करुँगा, मै पीतळ के किवाड़ां नै तोड़ गेरूँगा अर लोहे के बेंड़याँ नै टुकड़े-टुकड़े कर दियुँगा। 3 मै*45:3 यिर्म. 27:5; कुलु. 2:3 तेरे ताहीं अन्धकार म्ह छिप्या होया अर गुप्त जगहां म्ह दब्या होया धन देऊँगा, जिसतै तू जाणै के मै इस्राएल का परमेसवर यहोवा सूं जो तेरे ताहीं नाम लेकै बुलावै सै। 4 अपणे दास याकूब अर अपणे चुणे होए इस्राएल कै बारै म्ह मन्‍नै नाम लेकै तेरे ताहीं बुलाया सै; जै तू मेरे ताहीं न्ही जाणदा, फेर भी मन्‍नै तेरे ताहीं पदवी दी सै। 5 मै यहोवा सूं और दूसरा कोए न्ही, मेरे ताहीं छोड़ कोए परमेसवर न्ही; फेर भी तू मेरे ताहीं न्ही जाणदा, तोभी मै तेरी कमर कसूँगा, 6 जिसतै उदयाचल तै लेकै डूब्बण ताहीं माणस जाण लें के मेरे बिना कोए सै ए कोनी; मै यहोवा सूं और दूसरा कोए न्ही सै। 7 मै उजियाळे का बणाण आळा अर अंधियारे का सृजनहार सूं, मै शान्ति का दात्ता अर विपत्ति नै भी मै ए दियुँ सूं, मै यहोवा ए इन सारया का कर्ता सूं। 8 हे अकास उप्पर तै धार्मिकता बरसा, अकासमण्डल तै धार्मिकता की बारिस हो; धरती खुलै के उद्धार पैदा हो; अर धार्मिकता भी उसकै गैल उग जावै; मै यहोवा नै ए उस ताहीं पैदा करया सै।"

कुम्हार अर माट्टी

9 "हाय उसपै जो अपणे रचणआळे तै झगड़ै सै! वो तो माट्टी के ठीकरयां म्ह तै एक ठीकरा ए सै! के माट्टी कुम्हार तै कहवैगी, ‘तू यो के करै सै?’ के कारीगर का बणाया होया काम उसके बारै म्ह कहवैगा, ‘उसके हाथ न्ही सै’? 10 हाय उसपै जो अपणे पिता तै कहवै, ‘तन्‍नै के पैदा करया सै?’ अर माँ तै कहवै, ‘तू किसकी माँ सै?’" 11 यहोवा जो इस्राएल का पवित्र अर उसका बणाण आळा सै वो न्यू कहवै सै, "के थम आणआळी घटना मेरै ताहीं पुच्छोगे? के मेरे बेट्याँ अर मेरे काम्मां कै बारै म्ह मन्‍नै हुकम द्योगे? 12 मन्‍नै ए धरती ताहीं बणाया अर उसके उप्पर माणसां ताहीं सिरज्या सै; मन्‍नै अपणे हाथां तै अकास ताहीं ताण्या अर उसके सारे गणां ताहीं हुकम दिया सै। 13 मन्‍नै ए कुस्रू ताहीं धार्मिकता म्ह उभारया सै अर मै उसके सारे राह नै सीध्धा करुँगा; वो मेरे नगर नै फेर बसावैगा अर मेरे कैदियाँ नै बिना दाम या बदला लिए छुड़ा देगा," सेनाओं के यहोवा का योए वचन सै।

सिर्फ परमेसवर उद्धारकर्ता

14 यहोवा*45:14 जक. 8:22,23; प्रका. 3:9 न्यू कहवै सै, "मिस्रियाँ की कमाई अर कूशियाँ के व्यापार का फायदा अर सबाई माणस जो हट्टे-कट्टे सैं, तेरे धोरै चले आवैंगे, अर तेरे ए हो जावैंगे, वे तेरै पाच्छै-पाच्छै चाल्‍लैगें; वे साँकलां म्ह बाँधे होए चले आवैंगे अर तेरे स्याम्ही दण्डवत कर तेरै तै बिनती करकै कहवैंगे, ‘पक्‍का परमेसवर तेरैए गैल सै और दूसरा कोए न्ही; उसके सिवाय कोए और परमेसवर कोनी।’"

15 हे इस्राएल के परमेसवर, हे उद्धारकर्ता! पक्‍का तू इसा परमेसवर सै जो अपणे-आपनै गुप्त राक्खै सै। 16 मूर्तियाँ के गढ़ण आळे सबके सब शर्मिन्दा अर हैरान होवैगें, वे सारे के सारे बेचैन होवैंगे। 17 पर इस्राएल यहोवा के जरिये युग-युग का उद्धार पावैगा; थम युग-युग बलके सदा काल तक न तो कदे लज्जित और न कदे व्याकुल होओगे। 18 क्यूँके यहोवा जो अकास का सृजनहार सै, वोए परमेसवर सै; उस्से नै पृथ्वी ताहीं रच्या अर बणाया, उस्से नै उस ताहीं स्थिर भी करया; उसनै उस ताहीं सुनसान रहण खात्तर न्ही पर बसण खात्तर रच्या सै। वोए न्यू कहवै सै, "मै यहोवा सूं, मेरे सिवाय दूसरा और कोए न्ही सै। 19 मन्‍नै ना किसे गुप्त जगहां म्ह, ना अन्धकार देश के जगहां म्ह बात करी; मन्‍नै याकूब के वंश तै न्ही कह्या, ‘मन्‍नै व्यर्थ म्ह ढूँढ़ो*45:19 मन्‍नै व्यर्थ म्ह ढूँढ़ो कहण का अर्थ सै के परमेसवर की सेवा करणा व्यर्थ अर बेमतलब न्ही रह्या क्यूँके वो उनका रक्षक एवं दोस्त रहया सै अर उनका उसकै धोरै जाकै अपणी जरूरत पेश करणा व्यर्थ न्ही था।।’ मै यहोवा सच ए कहूँ सूं, मै सही बात बताऊँ सूं।"

20 "हे जात-जात म्ह तै बचे होए माणसों, कठ्ठे होकै आओ, एक साथ मिलकै धोरै आओ! वे जो अपणी लाकड़ी की खोदी होई मूरत लिए फिरै सैं अर इसे देवता तै जिसतै उद्धार न्ही हो सकदा, प्रार्थना करै सैं, वे अनजाण सैं। 21 थम प्रचार करो अर उननै ल्याओ; हाँ, वे आप्पस म्ह सलाह करैं किसनै पुराणे बखत तै यो जाहिर करया? किसनै पुराणे बखत म्ह इसकी खबर पैहले तै ए दी? के मन्‍नै यहोवा नै ए यो न्ही करया? इस करकै मन्‍नै छोड़ कोए और दूसरा परमेसवर कोनी, धर्मी अर उद्धारकर्ता परमेसवर मन्‍नै छोड़ कोए और कोए न्ही सै।"

22 "हे धरती के दूर-दूर देश के रहण आळेयो, थम मेरी ओड़ मुड़ो अर उद्धार पाओ! क्यूँके मै ए परमेसवर सूं और दूसरा कोए न्ही सै।

23 मन्‍नै अपणी ए कसम खाई, धार्मिकता कै मुताबिक मेरे मुँह तै यो वचन लिकड़या सै अर वो न्ही टळैगा, ‘हर एक घुटना मेरै स्याम्ही टिकैगा अर हरेक के मुँह तै मेरी ए कसम खाई जावैगी।’"

24 "माणस मेरै बारै म्ह कहवैंगे, सिर्फ यहोवा म्ह ए धार्मिकता अर शक्ति सै। उस्से कै धोरै माणस आवैंगे, अर जो उसतै रुस्से रहवैंगे, उननै शर्मिन्दा होणा पड़ैगा। 25 इस्राएल के सारे वंश के माणस यहोवा के ए कारण धर्मी ठैहरैगें, अर उसकी महिमा करैंगे।"