1 उस बखत सात जनान्‍नी एक माणस नै पकड़कै कहवैंगे, "रोट्टी तो हम अपणी ए खावांगी, अर कपड़े अपणे ए पहैरांगी, सिर्फ हम तेरी कुह्वावां; म्हारी कुँवारी रहण की बदनाम्मी दूर कर।"

2 उस* बखत इस्राएल के बचे होया कै खात्तर यहोवा की डाळी, भूषण अर महिमा ठहरैगी, अर धरती की उपज, बड़ाई अर शोभा ठहरैगी। 3 अर* जो कोए सिय्योन म्ह बच्या रहवै, अर यरुशलेम म्ह रहवै, यानिके यरुशलेम म्ह जितन्या के नाम जीवनपत्र म्ह लिखे हों, वे पवित्र कुह्वावैगें। 4 यो फेर होवैगा, जिब प्रभु न्याय करण आळी अर भस्म करण आळी आत्मा कै जरिये सिय्योन की जनानियाँ के मैल ताहीं धो देवैगा अर यरुशलेम के खून ताहीं दूर कर देवैगा। 5 फेर यहोवा सिय्योन पर्वत के एक-एक घर कै उप्पर, अर उसके सभा स्थानां कै उप्पर, दिन म्ह तो धुएँ का बादळ, अर रात नै धधकदी आग की रोशनी सिरजेगा,* अर सारे वैभव कै उप्पर एक मण्डप छाया रहवैगा। 6 वो दिन म्ह धूप तै बचाण कै खात्तर अर आँधी-पाणी अर झड़ी म्ह एक शरण अर आड़ होवैगा।