1 जिब हिजकिय्याह राजा नै यो सुण्या, फेर वो शोक मै अपणे कपड़े पाड़कै अर टाट ओढ़कै यहोवा के भवन म्ह गया। 2 अर उसनै एलयाकीम ताहीं जो राजघरान्‍ने के काम पै ठहराया था अर शेबना मंत्री ताहीं अर याजकां के पुरनियां ताहीं जो सब टाट ओढ़े होए थे, आमोस के बेट्टे यशायाह नबी कै धोरै भेज दिया। 3 हिल्किय्याह के अधिकारियां नै उसतै कह्या, "हिजकिय्याह न्यू कहवै सै के ‘आज का दिन संकट अर उल्हाणे अर निन्दा का दिन सै, बच्‍चे जाम्मण नै होए पर जच्‍चा म्ह जाम्मण का जोर न्ही रहया। 4 हो सकै सै के तेरे परमेसवर यहोवा नै रबशाके की बात सुणी जिस ताहीं उसके माल्‍लिक अश्शूर के राजा नै जिन्दा परमेसवर की निन्दा करण नै भेज्या* सै, अर जो बात तेरे परमेसवर यहोवा नै सुणी सै उसके खात्तर उननै सजा देवै; अर तू इन बचे होया खात्तर जो रहगे सैं, प्रार्थना कर।’"

5 जिब हिजकिय्याह राजा के कर्मचारी यशायाह कै धोरै आए। 6 फेर यशायाह नै उनतै कह्या, "अपणे माल्‍लिक तै कहो, ‘यहोवा न्यू कहवै सै के जो वचन तन्‍नै सुणे सैं जिनके जरिये अश्शूर के राजा के जनां नै मेरी निन्दा करी सै, उनकै कारण ना डरै। 7 सुण, मै उसके मन म्ह प्रेरणा पैदा करुँगा जिसतै वो कुछ खबर सुणकै अपणे देश म्ह बोहड़ जावैंगे; अर मै उस ताहीं उसे देश म्ह तलवार तै मरवा दियुँगा।’"

8 फेर रबशाके नै बोहड़कै अश्शूर के राजा ताहीं लिब्ना शहर तै युद्ध करदे पाया; क्यूँके उसनै सुण्या था के वो लाकीश कै धोरै तै उठ ग्या सै। 9 उसनै कूश के राजा तिर्हाका कै बारै म्ह यो सुण्या के वो उसतै लड़ण नै लिकड्या सै। फेर उसनै हिजकिय्याह कै धोरै दूत्तां ताहीं न्यू कहकै भेज्या। 10 "थम यहूदा के राजा हिजकिय्याह तै न्यू कहियो, ‘तेरा परमेसवर जिसपै तू भरोस्सा करै सै, न्यू कहकै तन्‍नै धोखा न्ही देण पावै के यरुशलेम अश्शूर के राजा कै बस म्ह न्ही पड़ैगा। 11 देख, तन्‍नै सुण्या सै के अश्शूर के सारे राजयां नै सारे देशां तै किसा बरताव करया के उन ताहीं सत्यानाश ए कर दिया। 12 फेर के तू बच ज्यागा? गोजान अर हारान अर रेसेप शहर म्ह रहण आळी जिन जात्तां ताहीं अर तलस्सार म्ह रहण आळे एदेनी माणसां ताहीं मेरे पूर्वजां नै नाश करया, के उनके देवत्यां नै उन ताहीं बचा लिया? 13 हमात, अर्पाद, सपर्वैम, हेना अर इव्वा नगरां के राजा, ये सारे कित्त गये?’"

14 इस चिट्ठी ताहीं हिजकिय्याह नै दूत्तां के हाथ तै लेकै पढ़या; फेर उसनै यहोवा के भवन म्ह जाकै उस चिट्ठी ताहीं यहोवा कै स्याम्ही फैला दिया। 15 अर यहोवा तै न्यू प्रार्थना करी, 16 "हे सेनाओं के यहोवा, हे करूबां पै विराजमान इस्राएल के परमेसवर, धरती के सारे राज्याँ कै उप्पर सिर्फ तू ए परमेसवर सै; अकास अर धरती तन्‍नै ए बणाए सै। 17 हे यहोवा, कान लगाकै सुण; हे यहोवा आँख खोलकै देख; अर सन्हेरीब के सारे वचनां नै सुण ले, जिसनै जिन्दा परमेसवर की निन्दा करण ताहीं लिख भेज्या सै। 18 हे यहोवा, सच तो सै के अश्शूर के राजयां नै सारी जातियाँ के देशां ताहीं उजाड़या सै 19 अर* उनके देवत्यां ताहीं आग म्ह झोक्या सै; क्यूँके वे ईश्वर ना थे, वे सिर्फ माणसां की कारीगरी, काठ अर पत्थर ए थे; इस कारण वे उननै नाश कर सके। 20 इब हे म्हारे परमेसवर यहोवा, तू हमनै उसके हाथ तै बचा जिसतै धरती के राज्य-राज्य के सारे माणस जाण लें के सिर्फ तू ए यहोवा सै।"

21 फेर आमोस का बेट्टे यशायाह नै हिजकिय्याह कै धोरै यो कुह्वा भेज्या, "इस्राएल का परमेसवर यहोवा न्यू कहवै सै, तन्‍नै जो अश्शूर के राजा सन्हेरीब कै बारे म्ह मेरे तै प्रार्थना करी सै, 22 उसके बारे म्ह यहोवा नै यो वचन कह्या सै, ‘सिय्योन की कुँवारी छोरी तेरे ताहीं निकम्मा जाणै सै अर मजाक म्ह उड़ावै सै; यरुशलेम के रहण आळे तेरै पै सिर हिलावै सै।’"

23 "‘तन्‍नै किसकी बदनाम्मी अर निन्दा करी सै? अर तन्‍नै जो बड़ा बोल बोल्या अर घमण्ड करया सै, वो किसके बिरुध्द करया सै? इस्राएल के पवित्र परमेसवर कै बिरुध्द!’" 24 अपणे कर्मचारियाँ के जरिये तन्‍नै प्रभु की निन्दा करकै कह्या सै के भोत-से रथ लेकै मै पहाड़ां की चोटियां पै बलके लबानोन के बीच ताहीं चढ़ आया सूं; मै उसके ऊँचे-ऊँचे देवदारां अर आच्छे-आच्छे सनोवर के दरखतां नै काट दियुँगा अर उसकी दूर-दूर की ऊँच्‍ची जगहां म्ह अर उसके बण की फळदाई बारियाँ म्ह बडुगाँ। 25 मन्‍नै खुदवाकै पाणी पिया अर मिस्र की नहरां म्ह पैर धरते उन ताहीं सूखा दिया। 26 के तन्‍नै न्ही सुण्या के पुराणे बखत तै मन्‍नै योए ठाण्या अर पूर्वकाल तै इसकी त्यारी करी थी? इस ताहीं इब मन्‍नै यो पूरा भी करया सै* के तू गढ़आळे नगरां नै खण्डहर ए खण्डहर कर दे। 27 इस्से कारण उनके रहण आळयां का बल घट ग्या अर वे अचम्भित अर शर्मसार होए: वे मैदान के छोट्टे-छोट्टे दरखतां अर हरी घास अर छात पै की घास अर इसे अनाज की तरियां होगे जो बढ़ण तै पैहलाए सूख जावै सै।

28 "‘मै तो तेरा बैठणा, चालणा अर बोहड़ आणा जाणु सूं; अर यो भी के तू मेरे पै अपणा छो भड़कावै सै। 29 इस कारण के तू मेरे पै अपणा छो भड़कावै अर तेरे अभिमान की बात मेरे कान्‍नां म्ह पड़ी सै, मै तेरी नाक म्ह नकेल डालकै अर तेरे मुँह म्ह अपणी लगाम लगाकै जिस राह तै तू आया सै उसे राह तै तन्‍नै बोहड़ा दियुँगा।’"

30 फेर यशायाह नै हिजकिय्याह के राजा तै कह्या "अर तेरे खात्तर यो निशान्‍नी होगी के इस साल तो थम उसनै खाओगे जो अपणे आप उग्या सै, अर दुसरे साल वो जो उसतै पैदा हो, अर तीसरे साल बीज बोकै उसनै काटण पाओगे अर दाख की बारी लगाण अर उनका फळ खाण पाओगे। 31 अर यहूदा के घरान्‍ने के बचे होए माणस फेर जड़ पकड़ैगें अर फूल्‍लै-फळैंगे; 32 क्यूँके यरुशलेम तै बचे होए और सिय्योन पर्वत तै भाज्जे होए माणस लिकड़ैंगे। सेनाओं का यहोवा अपणी जळण कै कारण यो काम करैगा।"

33 "इस करकै यहोवा अश्शूर के राजा कै बारै म्ह न्यू कहवै सै के वो इस नगर म्ह दाखिल होण, बलके इसपै एक तीर भी मारण न्ही पावैगा; अर ना वो ढाल लेकै इसकै स्याम्ही आण या इसकै बिरुध्द मोर्चा बाँधण पावैगा। 34 जिस राह तै वो आया सै उस्से तै वो बोहड़ भी जावैगा अर इस नगर म्ह जाण न्ही पावैगा, यहोवा की याए वाणी सै। 35 क्यूँके मै अपणे खात्तर अर अपणे दास दाऊद कै खात्तर, इस नगर की हिफाजत करकै उसनै बचाऊँगा*।"

36 फेर यहोवा के दूत नै लिकड़कै अश्शूरियां की छावणी म्ह एक लाख पचास्सी हजार माणसां ताहीं मारया; अर आगले दिन सबेर ताहीं जिब माणस उठे फेर के देख्या के लाश ए लाश पड़ी सैं। 37 फेर अश्शूर का राजा सन्हेरीब चाल पड्या अर बोहड़कै नीनवे शहर म्ह रहण लाग्या। 38 ओड़ै वो अपणे देवता निस्रोक के मन्दर म्ह दण्डवत करण लागरया था के इतणे म्ह उसके बेट्टे अद्रम्मेलेक अर शरेसेर नै उस ताहीं तलवार तै मारया अर अरारात देश म्ह भाजगे। अर उसका बेट्टा एसर्हद्दोन उसकी जगहां पै राज करण लाग्या।