1 सुणो, प्रभु सेनाओं का यहोवा यरुशलेम अर यहूदा का सारे ढाळ का सहारा अर सिरहाणा यानिके अन्‍न का सारा आधार, अर पाणी का सारा आधार दूर कर देगा; 2 अर वीर अर योद्धा नै, न्यायी अर नबी ताहीं, भावी वक्ता अर बुजुर्गां नै, पचास सिपाहियाँ के सरदार अर आदरणीय माणस नै, 3 मंत्री अर चलाक कारीगर नै, अर निपुण टोन्हे नै भी दूर कर देवैगा। 4 यहोवा फेर कहवै सै के मै बाळकां नै उनके हाकिम कर दियुँगा, अर बाळक उनपै राज करैंगे। 5 प्रजा के माणस आप्पस म्ह एक दुसरे पै, अर हर एक अपणे पड़ोसी पै अंधेर करैंगे; अर जवान बुजुर्गां तै अर नीच जन माननीय माणसां तै असभ्यता का बरताव करैंगे।

6 उस बखत जिब कोए माणस अपणे पिता के घर म्ह अपणे भाई नै पकड़कै कहवैगा, "तेरै धोरै तो कपड़े सै, आ म्हारा न्यायी हो ज्या अर इस उजड़े देश नै अपणे बस म्ह कर ले;" 7 फेर वो कसम खाकै कहवैगा, "मै चंगा करण आळा ना होऊँगा; क्यूँके मेरे घर म्ह ना तो रोट्टी सै अर ना कपड़े; इस करकै थम मेरे ताहीं प्रजा का न्यायी न्ही ठहरा सकोगे।" 8 यरुशलेम तो डगमगाया अर यहूदा गिर ग्या सै; क्यूँके उनके वचन अर उनके काम यहोवा कै खिलाफ सैं, जो उसकी तेजोमय नजरां कै स्याम्ही धोक्खा देण आळो ठहरे सैं।

9 उनका चेहरा भी उनके खिलाफ गवाही देवै सै; वे सदोम के रहण आळी की तरियां अपणे पाप का जिक्र खुद करदे अर छुपान्दे कोनी। उनपै हाय! क्यूँके उननै अपणा नुकसान आप्पे करया सै। 10 धर्मियाँ तै कह्यो के उनका भला होवैगा, क्यूँके वे अपणे काम्मां का फळ पाया करैंगे। 11 दुष्ट पै हाय! उसका बुरा होवैगा, क्यूँके उसके काम्मां का फळ उसनै मिलैगा। 12 मेरी प्रजा पै बाळक अंधेर करै अर जनान्‍नी उनपै प्रभुता करै सैं। हे मेरी प्रजा, तेरे अगुवे तेरे ताहीं भटकावैं सैं, अर तेरे चाल्‍लण का राह भूला देवै सैं।

13 यहोवा देश-देश के माणसां तै मुकद्दमा लड़ण अर उनका न्याय करण कै खात्तर खड़या सै।* 14 यहोवा अपणी प्रजा के बुजुर्गां अर हाकिमां कै गैल यो विवाद करै सै, "थमनै ए दाख की बारी खाई सै, अर दीन माणसां का धन लूट कै थमनै अपणे घरां म्ह धरया सै।" 15 सेनाओं के प्रभु यहोवा की या वाणी सै, "थम क्यूँ मेरी प्रजा नै दळो, अर दीन माणसां नै पीस्सो सो!"

16 यहोवा* नै न्यू भी कह्या सै, "क्यूँके सिय्योन की जनान्‍नी घमण्ड करै अर सिर ऊँच्‍चा करकै आँख मटकान्दी अर घुँघरूआं नै छमछमान्दी होई ठुमुक-ठुमुक चाल्‍लै सैं, 17 इस करकै प्रभु यहोवा उनके सिर ताहीं गंजा करैगा, अर उनकी देह नै उघड़वावैगा।"

18 उस बखत प्रभु घुँघरूआं, जाळियाँ, 19 चन्द्रहारां, झुमक्यां, कड़यां, घूँघटां, 20 पगड़ियाँ, पैकरियाँ, पटका, सुगन्धपात्रां, गण्ड्यां, 21 अँगूठियाँ, नथलियां, 22 सुन्दर कपड़यां, कुर्तियाँ, चाद्दरां, बटुआं, 23 शीशे, मलमल के कपड़यां, बुन्दियाँ, दुपट्यां इन सारया की शोभा ताहीं दूर करैगा।

24 खुशबु कै बदले सड़ाहट, सुन्दर करधनी कै बदले बन्धन की रस्सी, गूँथे होए बाळां कै बदले गंजापण, सुन्दर पटुके कै बदले टाट की पेटी, अर सुन्दरता कै बदले दाग होवैंगे। 25 तेरे माणस तलवार तै, अर शूरवीर युद्ध म्ह मारे जावैंगे। 26 अर उसके फाटकां* म्ह साँस भरणा अर विलाप करणा होवैगा; अर वो धरती पै एक्ली बैठी रहवैगी।