यशायाह 41

इस्राएल नै परमेसवर की तसल्‍ली

1 यशायाह नै फेर या भविष्यवाणी करी, परमेसवर न्यू कहवै सै, "हे द्वीपों पै बसण आळेयो, मेरै स्याम्ही चुप रहो; देश-देश के माणस नया बल पावै; वे धोरै आकै बोल्‍ले; हम आप्पस म्ह न्याय कै खात्तर एक दुसरे कै धोरै आवां।"

2 किसनै पूर्व दिशा तै एक ताहीं उभारया सै, जिसनै वो धार्मिकता कै गैल अपणे पायां के धोरै बुलावै सै? वो जात्तां ताहीं उसके बस म्ह कर देवै अर उस नै राजयां पै अधिकारी ठहरावै सै; वो अपणी तलवार तै उननै धूळ की तरियां, अर अपणे धनुष तै उड़ाए होए भूसे की तरियां कर देवै सै। 3 वो उननै खदेड़ै*41:3 वो उननै खदेड़ै जिब वे भाजण लागरे थे फेर उसनै उनका पिच्छा अर उननै घबराहट अर विनाश कै अधीन कर दिया। अर इसे राह तै, जिसपै वो कदे न्ही चाल्या था, बिना रोक-टोक आगै बढ़ै सै। 4 किसनै यो काम करया सै अर शरुआत तै पीढ़ियाँ नै बुलान्दा आया सै? मै यहोवा, जो सबतै पैहला, अर आखरी के बखत रहूँगा; मै वोए सूं।

5 द्वीप देखकै डरै सैं, धरती के दूर देश काँम्ब उठे अर धोरै आ ग्ये सैं। 6 वे एक दुसरे की मदद करै सैं अर उन म्ह तै एक अपणे भाई तै कहवै सै, "हिम्मत बाँध!" 7 बढ़ई सुनार ताहीं अर हथौड़े तै बराबर करण आळा निहाई पै मारण आळे नै न्यू कहकै हिम्मत देण लागरया सै, "जोड़ तो आच्छा सै," आखर म्ह वो कील ठोक-ठोक कै उस ताहीं इसा मजबूत करै सै के वो स्थिर रहे।

8 हे मेरे दास इस्राएल, हे मेरे चुणे होए याकूब, हे मेरे दोस्त अब्राहम के वंश; 9 तू जिस ताहीं मन्‍नै धरती के दूर-दूर देशां तै लिया अर धरती की छोर तै बुलाकै न्यू कह्या, "तू मेरा दास सै, मन्‍नै तेरे ताहीं चुण्या सै अर छोड्या न्ही;" 10 मत डरै, क्यूँके मै तेरै गैल सूं, आस्सै-पास्सै ना देक्खै, क्यूँके मै तेरा परमेसवर सूं; मै तेरे ताहीं मजबूत करुँगा अर तेरी मदद करुँगा, अपणे धर्ममय सोळे हाथ तै मै तेरे ताहीं सम्भाळे रहूँगा।

11 देख, जो तेरे खिलाफ सैं, वे सब शर्मसार होवैंगे; जो तेरै तै झगड़ै सैं उनके मुँह काळे होवैंगे अर वे नाश होकै मिट जावैंगे। 12 जो तेरै तै लड़ै सैं उननै ढूँढ़ण पै भी तू न्ही पावैगा; जो तेरै तै युद्ध करै सैं वे नाश होकै मिट जावैंगे। 13 क्यूँके मै तेरा परमेसवर यहोवा, तेरा दाहिना हाथ पकड़कै कहूँगा, "मत डर, मै तेरी मदद करुँगा।"

14 यहोवा न्यू कहवै सै, "हे कीड़े के बराबर याकूब, हे इस्राएल के माणसों, ना डरो! यहोवा की या वाणी सै, मै तेरी मदद करुँगा; इस्राएल का पवित्र परमेसवर तेरा छुड़ाण आळा सै।" 15 देख, मन्‍नै तेरे ताहीं छुरी आळा काटण का एक नया अर बढ़िया औजार ठहराया सै; तू पहाड़ां नै मसळ-मसळकै*41:15 पहाड़ां नै मसळ-मसळकै अर पहाड़ियाँ तै मतलब सै यहूदियाँ कै बिरुध्द बड़े अर छोट्टे सब देश उनके अधीन हो जावैंगे। धूळ कर देवैगा, अर पहाड़ियाँ ताहीं तू भूसे की तरियां कर देगा।

16 तू उननै फटकैगा, अर हवा उननै उड़ा ले जावैगी, अर आँधी उननै आस्सै-पास्सै कर देगी। पर तू यहोवा कै कारण मगन होगा, अर इस्राएल के पवित्र कै कारण बड़ाई करैगा।

17 जिब दीन अर गरीब माणस पाणी ढूँढ़ण पै भी ना पावै अर उनका ताळवा प्यास के मारे सूख जावै; मै यहोवा उनकी बिनती सुणूँगा, मै इस्राएल का परमेसवर उननै न्ही छोड़ूँगा। 18 मै सूखे टील्यां तै भी नदियाँ अर मैदान्‍नां कै बीच म्ह चोवें बहाऊँगा; मै जंगळ ताहीं ताल अर निर्जल देश नै चोए ए चोए कर देऊँगा। 19 मै जंगळ म्ह देवदार, किक्‍कर, मेंहदी, अर जैतून उगाऊँगा; मै अराबा म्ह सनोवर, चिनार दरखत, अर चीड़ के दरखत कठ्ठे लगाऊँगा; 20 जिसतै सारे माणस देखकै जाण लें, अर सोचकै पूरी तरियां तै समझलै के यो यहोवा के हाथ का करया होया अर इस्राएल के पवित्र परमेसवर का सिरज्या होया सै।

मूर्तियाँ की निरर्थकता

21 यहोवा कहवै सै, "अपणा मुकद्दमा लड़ो," याकूब का राजा कहवै सै, "अपणे सबूत द्यो।" 22 वे उननै देकै म्हारे ताहीं बतावै के भविष्य म्ह के होवैगा? पूर्वकाल की सारी घटना बताओ के शरुआत म्ह के-के होया, जिसतै हम उननै सोचकै जाण सकां के भविष्य म्ह उनका के फळ होवैगा; या होण आळी सारी घटना म्हारे ताहीं सुणा द्यो। 23 भविष्य म्ह जो कुछ घटैगा वो बताओ, फेर हम मान्‍नैगें के थम ईश्‍वर सों; भला या बुरा, कुछ तो करो के हम देखकै हैरान हो जावां। 24 देक्खो, थम कुछ न्ही सों*41:24 देक्खो, थम कुछ न्ही सों यो मूर्तियाँ कै खात्तर कह्या गया सै अर कहण का मतलब सै के वे बेकार अर शक्तिहीन सै। वे अपणे मान्‍नण आळयां की मदद करण म्ह लायक न्ही सै।, थारे तै कुछ न्ही बणदा; जो कोए थमनै चाहवै सै वो घृणित सै।

25 मन्‍नै*41:25 मन्‍नै साइरस, फारसी सम्राट एक ताहीं उत्तर दिशा तै उभारया, वो आ भी ग्या सै; वो पूर्व दिशा तै सै अर मेरा नाम लेवै सै; जिसा कुम्हार आळी माट्टी नै लताड़ै सै, उसाए वो हाकिमां नै कीच की तरियां लताड़ देवैगा। 26 किसनै इस बात ताहीं पैहले तै बताया था, जिसतै हम या जाण्दे? किसनै पूर्वकाल तै यो जाहिर करया जिसतै हम कहवां के वो सच्‍चा सै? कोए भी बताण आळा न्ही, कोए भी सुणण आळा न्ही, थारी बात्तां का कोए भी सुणण आळा न्ही सै। 27 मन्‍नै ए सबतै पैहल्या सिय्योन तै यो समाचार दिया, "देख, उननै देख," अर मन्‍नै यरुशलेम ताहीं एक शुभ समाचार देण आळा भेज्या। 28 मन्‍नै देवतां म्ह देखण पै भी किसे ताहीं न्ही पाया; उन म्ह कोए मंत्री न्ही जो मेरे पूछण पै कुछ जवाब दे सकै। 29 सुणो, उन सारे देवतां के काम अनर्थ सैं; उनके काम निकम्मे सैं, अर उनकी ढळी होई मूर्ति हवा अर भ्रम सैं।