यशायाह 63

परमेसवर का न्याय अर उद्धार

1 यो कौण सै जो एदोम देश के बोस्रा नगर तै लाल कपड़े पहरे होए चाल्या आवै सै, जो घणा बलवान अर भड़कीला पैहरावा पैहरे होए झूमदा चाल्या आवै सै?

"यो मै यहोवा ए सूं, जो धार्मिकता तै बोल्‍लू अर पूरा उद्धार करण की शक्ति राक्खूँ सूं।"

2 तेरा पैहरावा क्यूँ लाल सै? अर के कारण सै के तेरे कपड़े हौद म्ह दाख रोंदण आळे की तरियां सैं?

3 "मन्‍नै*63:3 प्रका. 19:15; प्रका. 14:20 तो एक्ले नै ए हौद म्ह दाख रौंदी सै*63:3 मन्‍नै तो एक्ले नै ए हौद म्ह दाख रौंदी सै मै, यहोवा पक्‍का ए अपणे छो के दाख रोन्धु सूं अर मै एक्ला ए इसा करुँ सूं। उरै इसका मतलब सै के उसनै बैरियाँ को पूरी तरियां तै नाश कर दिया सै।, अर देश के माणसां म्ह तै किसे नै मेरा साथ न्ही दिया; हाँ, मन्‍नै अपणे छो म्ह आकै उन ताहीं रोंद्या अर जळकै उन ताहीं लताड़या; उनके लहू के छिट्टे मेरे कपड़यां पै पड़े सैं, इसतै मेरा सारा पैहरावा धब्बेदार होग्या सै। 4 क्यूँके बदला लेण का दिन मेरे मन म्ह था, अर मेरी छुड़ाई होई प्रजा का साल आण पोहच्या सै। 5 मन्‍नै ढूँढ्या, पर कोए मदद करण आळा न्ही दिखाई पड्या; मन्‍नै इस करकै अचम्भा भी होया के कोए सम्भाळण आळा न्ही था; फेर मन्‍नै अपणे बाजू के जोर तै उद्धार करया, अर मेरी जळजळाहट ए नै मेरे ताहीं सम्भाळया। 6 हाँ, मन्‍नै अपणे छो म्ह आकै देश-देश कै माणसां ताहीं लताड़या, अपणी जळजळाहट तै मन्‍नै देशां ताहीं मतवाळा कर दिया, अर उनका लहू धरती पै बह्या दिया।"

अनुग्रह की याद

7 जितना उपकार यहोवा नै म्हारा करया यानिके इस्राएल के घरान्‍ने पै दया अर भोत करुणा करकै उसनै म्हारे तै जितनी भलाई करी, उस सब कै मुताबिक मै यहोवा के करुणामय काम्मां का बखान अर उसका गुणानुवाद करुँगा। 8 क्यूँके यहोवा नै कह्या, बेसक ये मेरी प्रजा के माणस सैं, इसे छोरे सैं जो धोक्खा न्ही देवैंगे; अर वो उनका उद्धारकर्ता होग्या। 9 उनके सारे संकटां म्ह उसनै भी कष्ट ठाया, अर उसकै स्याम्ही रहण आळे दूत नै उनका उद्धार करया; प्यार अर कोमलता तै उसनै खुद ए उन ताहीं छुड़ाया; उसनै उन ताहीं ठाया अर पुराणे बखत तै सदा उन ताहीं लिये फिरया।

10 फेर*63:10 प्रेरि. 7:51; इफि. 4:30 भी उननै बिश्वासघात करया अर उसके पवित्र आत्मा ताहीं दुखी करया; इस कारण वो पलटकै उनका दुश्मन होग्या, अर खुद उनतै लड़ण लाग्या। 11 फेर उसके माणसां ताहीं उनके पुराणे दिन यानिके मूसा के दिन याद आए, वे कहण लाग्गे के जो अपणी भेड्डां नै उनके पाळीयाँ समेत समुन्दर म्ह तै लिकाड़ ल्याया वो कित्त सै? जिसनै उनके बीच अपणा पवित्र आत्मा डाल्या, वो कित्त सै? 12 जिसनै अपणे प्रतापी बाजू के जोर तै मूसा के सोळे हाथ कै गैल कर दिया, जिसनै उनके स्याम्ही समुन्दर का पाणी ताहीं दो भाग करकै अपणा सदा का नाम कर लिया, 13 जो उननै ढुंघे समुन्दर म्ह तै ले चाल्या; जिसा घोड़े ताहीं जंगळ म्ह उस्से तरियां उनकै भी ठोक्‍कर ना लाग्गी, वो कित्त सै? 14 जिस तरियां घरेलू पशु तराई म्ह उतर जावै सै, उस्से तरियां यहोवा के आत्मा नै उन ताहीं आराम दिया। इस्से तरियां तै तन्‍नै अपणी प्रजा की अगुवाई करी ताके अपणा नाम महिमायुक्त बणावै।

इस्राएल की प्रार्थना

15 हे परमेसवर, सुर्ग तै, जो तेरा पवित्र अर महिमा तै भरी रहण की जगहां सै, निगांह कर। तेरी जळण अर पराक्रम कित्त रहे? तेरी दया अर करुणा मेरे पै तै हटगी सैं। 16 पक्‍का तू म्हारा पिता सै, फेर भी अब्राहम हमनै न्ही पिच्छाणदा, अर इस्राएल हमनै अपणान्दा कोनी; तोभी, हे यहोवा, तू म्हारा पिता अर म्हारा छुड़ाण आळा सै; पुराणे बखत तै योए तेरा नाम सै। 17 हे यहोवा, तू क्यूँ हमनै अपणे राह तै भटका देवै, अर म्हारे मन इसे कठोर करै सै के हम तेरा भय न्ही मान्दे? अपणे दास, अपणे निज भाग के गोत्रां कै करकै बोहड़ आ। 18 तेरी*63:18 लूका. 21:24; प्रका. 11:2 पवित्र प्रजा तो थोड़े ए बखत ताहीं तेरे पवित्रस्‍थान की अधिकारी रही; म्हारे बैरियाँ नै उस ताहीं कुचल दिया सै। 19 हम तो इसे होगे सां, मान्‍नो तन्‍नै म्हारे पै कदे प्रभुता करी ए न्ही, अर उनकी तरियां जो कदे तेरे कुहवाए न्ही।