1 जंगळ अर निर्जल देश खुश होवैंगे, बियाबान मगन होकै केसर की तरियां फूल्‍लैगा; 2 वो भोत खुश होवैगा अर आनन्द कै गैल जयजयकार करैगा। उसकी शोभा लबानोन की पहाड़ियाँ जिसी होवैगी* अर वो कर्मेल अर शारोन की तरियां तेजोमय हो जावैगा। वे यहोवा की शोभा अर म्हारे परमेसवर का तेज देक्खैगें।

3 ढील्‍ले* हाथां नै मजबूत करो अर थरथरान्दे होए घुटन्या नै स्थिर करो। 4 घबराण आळयां तै कहो, "हिम्मत बाँधो, ना डरो! देक्खो, थारा परमेसवर बदला लेण अर प्रतिफळ देण खात्तर आण लागरया सै। हाँ, परमेसवर आकै थारा उद्धार करैगा।"

5 फेर आंध्याँ की आँख खोल्‍ली जावैंगी अर बैहरयां के कान भी खोल्‍ले जावैंगे; 6 फेर* लंगड़ा हिरण की जिसी चौकड़ी भरैगा अर गूँगे अपणी जीभ तै जयजयकार करैंगे। क्यूँके जंगळ म्ह पाणी के चोए फूट लिकड़ैंगे अर मरुभूमि म्ह नदी बहण लाग्गैंगी; 7 मृगतृष्णा ताल बण जावैगी अर सूक्खी धरती म्ह चोवें फूट्टैंगे; अर जिस जगहां म्ह गाद्दड़ बैठ्ठै सैं उस म्ह घास अर नरकट अर सरकण्डे होवैंगें।

8 ओड़ै एक सड़क यानिके राजमार्ग होगा, उसका नाम पवित्र राह होगा; कोए अशुद्ध जन उसपै तै ना चाल्‍लण पावैगा*; वो तो उन्हे खात्तर रहवैगा अर उस राह पै जो चाल्‍लैगें वो चाहे मूर्ख भी हों तोभी कदे न्ही भटकैगा। 9 ओड़ै शेर ना होगा और ना कोए हिंसक जन्तु उसपै ना चढैगा ना ओड़ै पाया जावैगा, पर छुड़ाए होए परमेसवर के लोग उसपै लगातार चाल्‍लैगें। 10 अर* यहोवा के छुड़ाए होए माणस बोहड़कै जयजयकार करदे होए सिय्योन म्ह आवैंगे; अर उनके सिर पै सदा का आनन्द होगा; वे खुशी अर आनन्द पावैंगें अर शोक अर लाम्बी साँस का लेणा जान्दा रहवैगा।