1 तेबे यहोवे राजा दाऊदो गे नातान नबी पेजेया ओर से तेसगे जाई की बोलणे लगेया, "एकी शईरो दे दो माणूं रओ थे, जिना बीचा ते एक अमीर ओर दूजा गरीब था। 2 अमीरो गे तो बऊत सारिया पेडा-बाकरिया ओर गायी-बल़द थे; 3 पर गरीबो गे पेडा रे एक छोटे जे बच्चे खे छाडी की ओर कुछ पनि था ओर तिने से केसी ते मोले लई राखी थी। से तेसरे कअरे तेसरे बच्चेया साथे ई पल़ी थी; से तेसरे टुकड़ेया बीचा ते खाओ थी ओर तेसरे कटोरे बीचा ते पाणी पियो थी ओर तेसरी गोदा दे सओ थी ओर से तेसरी बेटिया जेड़ी थी। 4 एक दिन अमीरो गे एक यात्री आया ओर तिने तेस यात्रिये खे, जो तेसगे आया था, रोटी बनाणे खे आपणी पेडा-बाकरिया या गायी-बल़दा बीचा ते कुछ नि लया। तिने गरीब माणूंए री पेडा री बच्ची लई ली, ओर आपणे कअरे आए दे माणूंए खे तिजी रा मास पकाया।"

5 जेबे दाऊदे ये सुणेया तेबे से बऊत गुस्सा ऊआ। तेबे तिने नातानो खे बोलेया, "यहोवे री जिन्दगिया री कसम, जिने माणूंए एड़ा काम करी राखेया से मौता री सजा जोगा ए; 6 ओर तेसखे तेसा पेडा री बच्चिया रा चार गुणा परी की देणा पड़ना, कऊँकि तिने एड़ा काम करी राखेया ओर तेस गरीब माणूंए पाँदे कोई दया नि कित्ती।"

7 तेबे नाताने दाऊदो खे बोलेया, "तूँ ई से माणूं ए। इस्राएलो रा यहोवा परमेशर ईंयाँ बोलोआ कि मैं तेरा अभिषेक करी की तूँ इस्राएलो रा राजा ठराया ओर मैं तूँ शाऊलो रे आथो ते बचाया; 8 फेर मैं तेरे स्वामिए रा मईल ताखे दित्तेया ओर तेरे स्वामिए रिया लाड़िया ताखे दित्तिया; ओर मैं इस्राएल ओर यहूदा रा कराना ताखे दित्तेया था ओर जे ये थोड़ा था, तो आऊँ ताखे ओर बी बऊत कुछ देणे वाल़ा था। 9 तैं यहोवे री आज्ञा तुच्छ जाणी की से काम कऊँ कित्तेया, जो यहोवे री नजरा दे बुरा था? हित्ती ऊरिय्याह तैं तलवारी साथे काया ओर तेसरी लाड़ी आपणी बणाई ली ओर ऊरिय्याह अम्मोनिया ते मरवाया। 10 इजी री खातर तलवार एबे तेरे कअरो ते कदी दूर नि ऊणी, कऊँकि तैं आऊँ तुच्छ जाणी की हित्ती ऊरिय्याह री लाड़ी आपणी लाड़ी बणाई ली।" 11 यहोवा ईंयाँ बोलोआ "सुण, मां तेरे कअरो ते मुसीबता चकी की तां पाँदे पाणिया ओर तेरिया लाड़िया तां सामणे ते दूर करी की दूजे खे देई देणियां ओर तिना दिने-दपैरे तेरी लाड़िया साथे कुकर्म करना। 12 तैं तो से काम चोरिए कित्तेया; पर मां ये काम सारे इस्राएली लोका सामणे दिने-दपैरे करवाणा।"

13 तेबे दाऊदे नातानो खे बोलेया, "मैं यहोवे रे खलाफ पाप करी राखेया।" नाताने दाऊदो खे बोलेया, "यहोवे तेरा पाप दूर करी राखेया, एते पापो रिया बजा ते तूँ नि मरना। 14 तेबे बी तैं एस कामो रे जरीये यहोवे रे दुश्मणा खे बेज्जत करने रा बड़ा मोका देई राखेया, इजी बजअ ते तेरा जो पाऊ जमीं रा, से पक्का ई मरना।"

15 तेबे नातान आपणे कअरो खे चली गा। तेबे जो पाऊ ऊरिय्याह री लाड़ी बतशेबा ते दाऊदो रे जरीये पैदा ऊआ था, से यहोवे रा मारा बऊत बमार ऊईगा। 16 तेबे दाऊद तेस पाऊए रिया तँईं परमेशरो ते बिनती करने लगेया कि बच्चा नि मरना चाईयो ओर बअरत राखेया ओर पीतरे जाई की पूरी रात जमीना दे पड़ेया दा रया। 17 आगले दिने प्यागा तेसरे कराने रे बुजुर्ग उठी की तेसखे जमीना पाँदा ते ऊबे चकणे खे तेसगे गये; पर से नि उठेया ओर ना तिना साथे रोटी खाई। 18 सातुए दिने बच्चा मरी गा ओर दाऊदो रे कर्मचारी तेसरे बच्चे रे मरने रा सन्देश देणे ते डरे; तिने तो बोलेया था, "जदुओ तक बच्चा जिऊँदा था, तदुओ तक तिने म्हारे समजयाणे पाँदे त्यान नि दित्तेया; जे आसे तेसरे बच्चे रे मरने रा सन्देश सुणाऊँगे, तो से बऊत ई जादा दु:खी ऊणा।"

19 आपणे कर्मचारिया खे आपू बीचे खस-फस करदे ऊए देखी की दाऊदो खे जाणकारी ऊईगी कि बच्चा मरी गा; तेबे दाऊदे आपणे कर्मचारिया ते पूछेया, "क्या बच्चा मरी गा?" तिने बोलेया, "आ, मरी गा रा।" 20 तेबे दाऊद जमीना पाँदा ते उठेया ओर नाह्यी की तेल लगाया ओर टाल्ले बदले; फेर यहोवे रे मन्दरो दे जाई की माथा टेकेया, तेबे आपणे मईलो दे आया ओर तेसरी आज्ञा पाँदे तेसखे रोटी परोसी ओर तिने रोटी खाई। 21 तेबे तेसरे कर्मचारिये तेसते पूछेया, "तैं ये केड़ा काम करी राखेया? जदुए तक बच्चा जिऊँदा रया, तदुओ तक तूँ बअरत करदा ऊआ रोंदा रया; पर जिंयाँ ई बच्चा मरेया, तिंयाँ ई तूँ उठी की रोटी खाणे लगेया।" 22 तिने ज्वाब दित्तेया, "जदुओ तक बच्चा जिऊँदा रया तदुओ तक आऊँ ये सोची की बअरत करदा ओर रोंदा रया, कि क्या पता यहोवा मां पाँदे एड़ी दया करो कि बच्चा जिऊँदा रओ। 23 पर एबे से मरी गा, तेबे आऊँ बअरत कऊँ करुँ? क्या आऊँ तेसखे वापस ल्याई सकूँआ? आऊँ तो तेसगे जाणा, पर से मांगे वापस नि आई सकदा।"

24 तेबे दाऊदे आपणी लाड़ी बतशेबा खे शान्ति दित्ती ओर से तेसा गे गया ओर से गर्भवती ऊई ओर तेसा रे एक पाऊ पैदा ऊआ ओर तिने तेसरा नाओं सुलैमान राखेया ओर से यहोवे रा प्यारा ऊआ।*12:24 मत्ती 1:6 25 ओर तिने नातान भविष्यबक्ते रे जरीये सन्देश पेजेया ओर तिने यहोवे रिया बजअ ते तेसरा नाओं यदिद्याह राखेया जेतेरा मतलब ए यहोवे रा प्यारा।

26 एते बीचे योआबे अम्मोनिया रे रब्बाह शईरो ते लड़ी की से शईर लई ला। 27 तेबे योआबे दूता रे जरिये दाऊदो गे सन्देशा पेजेया, "आऊँ रब्बाह शईरो साथे लड़ेया ओर पाणिए वाल़ा शईर लई ला रा। 28 इजी खे तूँ एबे बाकी बचे रे लोका खे कट्ठे करी की शईरो रे खलाफ डेरे पाई की तेस बी लई लो, एड़ा नि ओ कि आऊँ तिजी खे लई लूँ ओर से मेरे नाओं रा बोलेया जाओ।" 29 तेबे दाऊद सारे लोका खे कट्ठा करी की रब्बाह शईरो खे गया ओर तेस साथे लड़ी की से लई ला। 30 तेबे तिने तिना रे राजे रा मुकुट, जो बजनो दे चौंती किलो रा था ओर तिदे मणि जड़े रे थे, से तेसरे सिरो पाँदा ते उतारेया ओर से दाऊदो रे सिरो पाँदे राखेया। तेबे तिना खे तेते शईरो री बऊत सारी किमती लूट मिली। 31 तिने तेथो रे रणे वाल़े लोक निकयाल़ी की तिना ते ये काम करवाये मतलब कुछ लोका ते आरिया साथे लकड़िया रे टुकड़े कराए ओर कुछ गैंती लई की माट्टिया रा काम करवाया ओर कुछ लोका ते लोए री क्वाड़िया साथे लकड़ी बडाई ओर जबरदस्ती ईटा बणवाईया ओर अम्मोनिया रे सारे शईरो साथे बी तिने एड़ा ई कित्तेया। तेबे दाऊद सारे लोका समेत यरूशलेम शईरो खे वापस आईगा।