1 जेबे राजा दाऊद आपणे मईलो दे रओ था ओर यहोवे तेसखे तेसरे चऊँ कनारले दुश्मणा ते राम देई राखेया था, 2 एक दिन राजा नातान नाओं रे भविष्यबक्ते खे बोलणे लगेया, "देख, आऊँ तो देवदारो रे बणे दे कअरो दे रऊँआ, पर परमेशरो रा सन्दूक तम्बूए दे रओआ।" 3 नाताने राजे खे बोलेया, "जो कुछ तेरे मनो दे ए से कर; कऊँकि यहोवा तां साथे ए।" 4 तेसा ई राती यहोवे रा ये वचन नातानो गे पऊँचेया, 5 "जाई की मेरे दास दाऊदो खे बोल, यहोवा ईंयाँ बोलोआ, कि क्या तां माखे रणे खे कअर बनवाणा? 6 जेस दिनो ते आऊँ इस्राएली लोका खे मिस्रो ते निकयाल़ी की ल्याया आजके दिनो तक आऊँ कदी बी कअरे नि रया, तम्बूए रे रणे रिया जगा दे आया-जाया करूँआ। 7 जेती-जेती आऊँ सारे इस्राएली लोका बीचे फिरदा रया, क्या मैं केथी इस्राएली लोका रे केसी गोत्रो ते, जो मैं आपणी इस्राएली प्रजा खे चलाणे खे ठराई राखेया ओ, एड़ी गल्ल कदी बोली, कि तुसे लोके मेरिया तँईं देवदारो रा कअर कऊँ नि बणाया?" 8 इजी री खातर एबे तूँ मेरे दास दाऊदो खे ईंयाँ बोल कि सेना रा यहोवा ईंयाँ बोलोआ, कि मैं तूँ पेडा री गवाईणी ते ओर पेडा-बाकरिया रे पीछे-पीछे फिरने ते, एते इच्छा ते बुलाई राखेया कि तूँ मेरी प्रजा इस्राएलो रा परदान ऊई जाए।* 9 ओर जेती-केथी तूँ आया गया, तेती-तेती आऊँ तां साथे रया ओर तेरे सारे दुश्मण तेरे सामणे ते नाश कित्ते; तेबे मां तेरा नाओं तरतिया पाँदले बड़े-बड़े लोका रे नाओं जेड़ा महान करी देणा। 10 ओर मां आपणी इस्राएली प्रजा खे एक जगा ठराणी ओर से स्थिर करनी, ताकि से आपणी ई जगा दे बसी री रओ ओर कदी चलदी-फिरदी नि रणी ओर बुरे लोका फेर तेसा खे कदी दु:ख नि देई सकणा, जेड़ा की पईले करो थे, 11 बल्कि तेस बखतो ते बी जेबे आऊँ आपणी इस्राएली प्रजा पाँदे न्यायी ठराऊँ था; ओर मां ताखे तेरे सारे दुश्मणा ते राम देणा। यहोवा ताखे ये बी बोलोआ कि यहोवे तेरा कअर बणाया रा राखणा। 12 जेबे तूँ मरी जाणा तूँ आपणे बुजुर्गा साथे मिली जाणा, तेबे मां तेरा निज पाऊ तां पीछे-खड़ा करी कि तेसरा राज्य पक्का करना। 13 मेरे नाओं रा कअर तेस ई बनवाणा ओर मां तेसरी राजगद्दी सदा स्‍थिर राखणी।* 14 आऊँ तेसरा बाओ ठईरना ओर से मेरा पाऊ ठईरना। जे से पाप करो, तो मां तेसखे सजा ते ओर मारा ते ताड़ना देणी, जेड़ा एक बाओ आपणे पाऊए खे सजा देओआ। 15 पर मेरी दया तेस पाँदा ते ईंयाँ नि आटणी, जेड़ी मैं शाऊलो पाँदा ते टाई ली थी ओर तेसखे तेरे सामणे ते दूर कित्तेया था। 16 बल्कि तेरा कराना ओर इस्राएलो रा राज्य मां सामणे सदा अटल़ बणेया दा रणा; तेरी गद्दी सदा बणी दी रणी।* 17 इना सारिया गल्ला ओर एस दर्शणो रे बारे दे जो नातान नबीए खे ऊए सेयो तिने सब दाऊदो खे बताई ते।

18 तेबे दाऊद राजा पवित्र तम्बूए रे पीतरे जाई की यहोवे रे सामणे बैठेया ओर बोलणे लगेया, "ओ प्रभु यहोवा क्या बोलूँ ओर मेरा कराना क्या ए कि तैं आऊँ एथो तक पऊँचाई ता? 19 तेबे बी ओ प्रभु यहोवा, ये तेरी नजरा दे छोटी जी गल्ल ऊई; कऊँकि तैं आपणे दासो रे कराने रे बारे दे आगले बऊत दिना तक री गल्ल-बात करी राखी, ओ प्रभु यहोवा, ये तो माणूंआ रा नियम ए। 20 दाऊद ताखे ओर क्या बोली सकोआ? ओ प्रभु यहोवा, तूँ तो आपणे दासो खे जाणेया! 21 तैं तो आपणे वचनो रे मुताबिक ओर आपणे ई मनो रे मुताबिक, ये सारा बड़ा काम करी राखेया, ताकि तेरा दास तिजी खे जाणी लो। 22 इजी बजअ ते ओ यहोवा परमेशर, तूँ महान ए; कऊँकि जो कुछ आसे आपणे कानो ते सुणी राखेया, तेतेरे मुताबिक तां जेड़ा कोई नि ए ओर ना ई ताखे छाडी की ओर कोई परमेशर ए। 23 फेर तेरी प्रजा इस्राएलो जेड़ा कुण ए? ये तो पूरी तरतिया दे एक ई जाति ए जो परमेशरे जाई की आपणी निज प्रजा करने खे छुड़ाई, इजी खे की से आपणा नाओं करो, (ओर तुसा रिया तँईं बड़े-बड़े काम करो) ओर तूँ आपणी प्रजा रे सामणे, जो तैं मिस्री बगैरा जातिया-जातिया रे लोक ओर तिना रे देवतेया ते छुड़ाई लये, आपणे देशो रिया तँईं खतरनाक काम कित्ते। 24 ओर तैं आपणी प्रजा इस्राएलो खे आपणी सदा री प्रजा ऊणे खे ठराई ओर ओ यहोवा; तूँ आपू तेसा रा परमेशर ए। 25 एबे ओ यहोवा परमेशर, तैं जो वचन आपणे दासो रे ओर तेसरे कराने रे बारे दे बोली राखेया, तिजी खे सदा खे पक्का कर ओर आपणे बोले रे मुताबिक ई कर, 26 ओर ये कर कि लोक तेरे नाओं री महिमा सदा करदे रओ कि सेना रा यहोवा इस्राएलो पाँदे परमेशर ए ओर तेसरे दास दाऊदो रा कराना तां सामणे अटल़ रओ। 27 कऊँकि ओ सेना रे यहोवा, ओ इस्राएलो रे परमेशर, तैं ये बोली की आपणे दासो पाँदे प्रगट करी राखेया कि मां तेरा कअर बणाया रा राखणा; इजी बजअ ते तेरे दासो खे तांते प्रार्थना करने रा याओ ऊई रा। 28 एबे ओ प्रभु यहोवा, तूँ ई परमेशर ए ओर तेरे वचन सच्चे ए ओर तैं आपणे दासो खे ये पलाई करने रा वचन देई राखेया; 29 तो एबे खुश ऊई की आपणे दासो रे कराने पाँदे एड़ी आशीष दे कि से तां सामणे सदा बणेया रा रओ; कऊँकि ओ प्रभु यहोवा, तैं एड़ा ई बोली राखेया ओर तेरे दासो रा कराना तांते आशीष पाई की सदा तन्य रओ।"