1 Cathiunu prindi s-nã lugurseascã ashãtsi: ca huzmicheari al Hristos sh-ca administratori a mistiryilor a Dumnidzãlui. 2 Administratorlu prindi s-hibã pistimen. 3 Trã mini, nu mi mealã tsiva cã mi giudicã di voi icã di giudicata umineascã. Meti, sh-idyiul mini nu mi giudic. 4 Cã, nu escu conshtient ti tsiva contra di mini, cu tut-atsea nu escu dizcãbãtsit trã aestã itii, ma atsel tsi mi giudicã easti Domnul. 5 Trã atsea nu giudicats tsiva nãinti di oara, pãn-cãndu s-yinã Domnul, cai va scoatã tu lunjinã ascumtili a ntuneariclui sh-va s-aspunã minduirili a ininjilor sh-atumtsea alãvdarea va lji yinã a cathiunui di la Dumnidzãlu.

6 Tora, frats sh-surãri, aesti li ligai cu mini sh-cu Apollo, ti ghinea a voastrã, tsi prit noi s-nvitsats atsea tsi: "S-nu njidzets ma nclo di atsea cai easti scriatã," tsi vãrã s-nu si s-alavdã contra alãntui trã hãtãrea a unui altu. 7 Cã, cai ti aleadzi tini di alantsã? Sh-tsi ai tini tsi nu u loash? Ma, sh-macã u loash, cãtse ti alavdzã sh-dzãts cã nu u loash? 8 Tora hits fãnãtits! Tora vã avutsãt! Vã featsit amiradzi fãrã di noi! Sh-macar dealihea s-vã fãtseat amiradzi tsi sh-noi s-domneam deadun cu voi! 9 Cã minduescu cã Dumnidzãlu nã aspusi noi apostulji ca atselji di ma nãpoi a tutulor, ca condamnats cu moarti, cã nã featsim trã arãdearea a lumiljei, trã anghilji sh-trã oaminjlji. 10 Noi him zurlji trã hãtãrea al Hristos, iarã voi hits mintimenji ntru Hristolu, noi him slaghi, iarã voi vãrtoshi, voi hits tinjisits sh-noi nitinjisits! 11 Pãnã tu aestã oarã noi avem sh-foami, avem sh-seati, him ninviscuts, him multu bãtuts sh-him fãrã casã, 12 sh-nã munduim lucrãnda cu mãnjili a noastri. Hinda ngiurats, noi ghinicuvãntãm, hinda priaĝunits, noi arãvdãm, 13 hinda pizuits, nã apãndisim cu bunã. Nã featsim pãnã tora ca lãvushiturili a lumiljei sh-ca cupria a tutulor.

14 Nu ma lã scriu aesti tra s-vã arushinedz, ma ma vã vãrghescu ca cilimenjlji a melji vruts. 15 Cã, sh-macã va avets dzatsi njilji di nvitsãtori tu Hristolu, cu tutã aestã nu avets multsã pãrintsã, cã mini vã amintai tu Hristolu Isus prit evanghelu. 16 Trã atsea vã fac rigeai s-vã fãtsets imitatorlji a melji. 17 Trã aestã pitricui la voi Timoteu, hiljiu a meu vrut sh-pistimen tu Domnu, cai va vã aducã-aminti cãljurili a meali tu Hristolu Isus, ashãtsi di cum li nvets iutsido tu cathi bisearicã. 18 Niscãntsã di voi s-alãvdarã, canda nu va yinea ma la voi. 19 Sh-va yin trãoarã la voi, ma s-va Domnul, sh-va cunoscu nu mash zborlu atsilor cai suntu alãvdats, ma sh-fuchia a lor. 20 Cã nu sta tu zbor amirãriljea al Dumnidzãu, ma tu fuchii. 21 Tsi vrets? S-yin la voi cu veargã icã cu vreari sh-cu duhlu a frunimeatsiljei?