Mateus 2

Shtiutslji dit Rãsãrit

1 Dupã tsi Isusul s-amintã tu Betlehem a Iudeiljei tu chirolu al amirãlu Herod, ia, niscãntsã shtiuts di la Rãsãrit agiumsirã la Ierusalem, 2 dzãcãnda: "Iu easti amirãlu a Iudeilor, tsi s-amintã? Cã vidzum steaua a lui la Rãsãrit sh-vinãm s-nã ncljinãm."

3 Amirãlu Herod, cãndu avdzã aesti zboari, s-tulburã, sh-deadun cu nãsu tut Ierusalemlu. 4 Sh-dupã tsi lã adunã tuts mãrlji a preftsãlor shi scriblji a popului, lji ntribã cã iu prindi s-aminta Hristolu. 5 Sh-elji lji dzãsirã: "Tu Betlehemlu a Iudeiljei, cã ashã easti scriatã di la prufitlu: 6 ✝2:6 Mic 5:2.‘Sh-tini, Betlehem, loc al Iuda, nu eshti ma njic di printslji a Iudeiljei, cã di la tini va easã un prints, tsi va pascã populu a meu, Israelu.’"

7 Atumtsea Herodul lã acljimã pri ascumtu shtiutslji, sh-lã ntribã cu mari cãshtigã, di chirolu cãndu lu avea vidzutã steaua di prota oarã. 8 Sh-lji pitricu la Betlehem sh-lã dzãsi: "Imnats shi ntribats ghini ti cilimeanlu. Sh-cãndu s-lu aflats, dimãndats-nji tsi s-yin sh-mini s-mi ncljinu."

9 Sh-elji, dupã tsi lu avdzãrã amirãlu, fudzirã. Sh-ia, steaua tsi avea vidzutã la rãsãrit, s-dutsea nãintea a lor pãnã s-dãnãsi la loclu iu eara cilimeanlu. 10 Elji, cãndu u vidzurã steaua, s-hãrsirã multu. 11 Sh-dupã tsi intrarã tu casã, vidzurã cilimeanlu cu Maria, muma a lui, cãdzurã pri dzinucljiu shi si ncljinarã. Deapoea discljisirã ayishtearea a lor sh-durusirã: furii, timeamã shi njir. 12 Dupã tsi Dumnidzãlu lã dimãndã tu yis tsi s-nu s-turna la Herod, elji s-turnarã tu loclu a lor pri unã altã cali.