Mateus 20

Parabola cu Lucrutorlji

1 "Amirãriljea a tserurilor undzeashti cu un nicuchir di casã tsi ishi curund dimineatsa s-puituea lucrutori ti ayinjea a lui. 2 Dupã tsi s-ndreapsi tu pãzari cu lucrutorlji cãti un denar n-dzuã, lji pitricu la ayinjea a lui. 3 Apoea ishi anvãrliga di oara noauã dimineatsa, sh-vidzu altsã tsi stãtea tu pãzari fãrã lucru. 4 Sh-lã dzãsi a lor: ‘Dutsets-vã sh-voi la ayinjea a mea sh-mini va vã dau cãtã easti dhichea.’ 5 Sh-elji s-dusirã. Elu ishi anvãrliga di njeadzãdzuã sh-pi trei ti-mirindi, featsi unã soi. 6 Cãndu ishi nãpoi cãtrã oara tsintsi ti-mirindi, aflã altsã tsi stãtea ni fãrã lucru, sh-lji ntribã: ‘Cãtse shidets aoa tutã dzua ni faptã tsiva?’ 7 Elji lji dzãsirã: ‘Cã vãrã nu nã puitui.’ Sh-elu lã dzãsi a lor: ‘Dutsets-vã shi voi la ayinji.’ 8 Cãndu vini seara, nicuchirlu a ayinjiljei, lji dzãsi a administratorlui a lui: ‘Acljeamã lucrutorlji shi fã plãtirea a lor, apãrnjinda di la atselji di ma nãpoi sh-pãnã la atselji di prota.’ 9 Sh-cãndu vinirã atselji di la oara tsintsi, loarã cãti un denar cathiunu. 10 Cãndu vinirã protslji, minduirã cã va loa ma multu, ma sh-atselji loarã cãti un denar cathiunu. 11 Luãnda, murmurea contra a nicuchirlui a casiljei, 12 dzãcãnda: ‘Aeshti di ma nãpoi lucrarã mash unã oarã sh-tini lji plãtish ca noi, tsi trapsim greulu sh-cãloarea a dzuãljei.’ 13 Ma elu lj-apãndisi a unui di nãshi: ‘Oaspe, mini nu ma ts-fac nindriptati. Noi nu featsim pãzari ti un denar tu dzuã? 14 Ljea atsea tsi easti a ta sh-imnã. Mini voi s-lji dau aishtui di ma nãpoi cãt a tsãia. 15 Nu am ndriptati mini s-facã tsi voi cu atsea a mea? Cãtse ti fats ocljiu ni fãnãtit, cã mini escu giumertu?’ 16 Ashã atselji di ma nãpoi va hibã protslji sh-atselji protslji va hibã atselji di ma nãpoi."