उबजाणनी किताप 26

इसाक गरार मां रवे

1 देस मां काळ पड़्‌यु। अब्‌राहमेन दाहड़ा पड़लु तेर सी अलग हतलु। तेरेमां इसाक गरारेन पलीस्‌तीन राजु अबीमेलेक धड़े गुयु। 2 चां यहोवा भगवान तीनाक उजेंतु हयन कह्‌यु, "मीसर मां जा; जो देस तुसेक बताड़ीस चां रया करजी। 3 तु ईनात देस मां रव, ने मे तार साते रवीस, ने तुसेक संयबरकत आपीस; ने ज आखो देस तुसेक ने तारा अवल्‌यात काजे आपीस; ने जु सगुन मे तारा बास अब्‌राहम सी खादलु, तीनाक मे पुरो करीस। 4 ने मे तारा अवल्‌यात काजे सरगेन तारान तसा गीणाये नी ततरा करीस; ने मे तारा अवल्‌यात काजे ज आखो देस आप दीस, ने धरतीन आखा जात्‌या तारा अवल्‌यातेन वजे सी तुसेक संयबरकत वाळु मानसे। 5 काहाकी अब्‌राहम मारी मान्‌यु, ने ज बी तीनाक सुपलु तीनाक ने मारी हुकुम काजे, रीती-भाती ने नीयम काजे पाळ्‌यु।"

6 तसु करीन इसाक गरार मात रहणे लाग ज्‌यु। 7 जत्‌यार तीना जागा मां रहणे वाळा तेरी घरवाळीन बारामां पुछ्‌या, तत्‌यार चु असु वीच्‌यारीन कह्‌यु की कदी मे तीनीक मारी घरवाळी कयस ती ते जां रहणे वाळा माणसे रीबका ची बेसकी वारु देखाये, ती चे मेसेक मार नाखसे, तसु करीन जपाप आप्‌यु, की "हयी ते मारी बहणीस छे।"✝26:7 उबजाणनी किताप 12:13; 20:2 8 जत्‌यार तीनाक चां रवतेला बेसका दाहड़ा हय ज्‌या, तत्‌यार एक दाहड़े पलीस्‌तीन राजु अबीमेलेक खीड़कीम रय्‌न झाकीन असु देख्‌यु की इसाक आपसी घरवाळी रीबका भेळे सुयन परम करतेलु।