1 जत्‌यार इसाक डाहु हय ज्‌यु, ने तीनाक धुंधळो देखायणे लाग्‌यो, तत्‌यार चु आपसा पेहला पुर्‌यु एसाव काजे बुलायन कह्‌यु, ए मारा पुर्‌या,

चु कह्‌यु, "काय कहे।"

2 चु कह्‌यु, "सामळ, मे ते डाहु हय ज्‌यु, ने मेसेक नी मालम की मारो मरनेन दाहड़ु काहनु हसे; 3 तेरेमां हंय तु बीलख्‌या ने धंदली लीन खयड़ाम जां ने मारे वाटे काहींन मारीन लाव। 4 तत्‌यार सवादो खाणो जसो मेसेक गमे तसों बणाय लाव ने मे तीनाक खायन मरनेन पेहल तुसे मारु बरकत आपो।"

5 तत्‌यार एसाव सीकार करने खयड़ा मां गुयु। जत्‌यार इसाक एसाव सी वात करतेलु, तत्‌यार रीबका सामळी रहली। 6 तेरेमां रीबका आपसान पुर्‌यु याकुब सी कय, "सामळ, मे तारा बास काजे तारा भाय एसाव काजे असु कवतु सामळी, 7 ‘तु मारे वाटे सीकार करीन तीनान सवादो खाणो बणाव, ने मे तीनाक खायन यहोवा अगळ मरनेन पेहल संयबरकत आपो।’ 8 तेरेमां हंय, ए मारा पुर्‌या, मारी सामळ, ने मारी मान, 9 की बुकड़ा धड़े जाय्‌न वार मातली दुय पाठड़ी बुकड़ी ली आव; ने मे तारा बास वाटे गमे तसों सवादो मासेन खाणो बणावीस। 10 तत्‌यार तु खाणाक तारा बास धड़े ली जाजी, ने चु तीनाक खायन मरनेन पेहल तुसेक संयबरकत आपे।"

11 याकुब आपसी माय रीबका सी कह्‌यु, "सामळ, मारु भाय एसाव ते चादरान तसु लुछा वाळु माणुस छे, मे तसु माणुस नी हय। 12 कदी मारु बास मारे हात लागाड़ने बाजी जाय, ती मे तेरी नींगा मां लुच्‌चु बण जायस; ने संयबरकतेन जागे सराप काजे ली आयस।"

13 तेरी माय तीनाक कय, "ए मारा पुर्‌या, सराप तार पर नी मार पर पड़े, तेरेमां तु मारी सामळ, ने जाय्‌न चे बुकड़ा मार धड़े ली आव।" 14 तत्‌यार याकुब जाय्‌न तीनुक आपसी माय धड़े ली आयु, ने तेरी आयस तेरा बास वाटे सवादो खाणो बणाय देदी। 15 तत्‌यार रीबका आपसा पेहला पुर्‌या एसावेन वारु खुलता पुथल्‌या, जे तेरे धड़े घर मां हतला, लावीन आपसा नानला पुर्‌या याकुब काजे पेहराय देदी; 16 ने बुकड़ीन गीदल्‌या तेर हाते मां ने तेरा सुवाळा गाल पर लागाड़ देदी; 17 ने ची सवादो खाणो ने आपसे हाते बणावला रुटा बी आपसीन पुर्‌यु याकुबेन हात मां दी देदी।

18 तत्‌यार याकुब आपसा बास धड़े गुयु ने कह्‌यु, "ए मारा बास,"

चु तीनाक कह्‌यु, "काय वात छे? तु मार पुर्‌या माय्‌न काहनु पुर्‌यु छे?"

19 याकुब आपसा बास काजे कह्‌यु, "मे तारु पेहलु पुर्‌यु एसाव छे। मे तारी हुकुमेन अनसारे करलु छे; तेरेमां उठ ने मारा बणावला मास काजे खा, काहाकी तु पुरा जीव सी संयबरकत आपे।"

20 इसाक आपसा पुर्‌या काजे कह्‌यु, "ए मारा पुर्‌या, असो कसो तुसे अतरो मामार तुसे जड़ गुयो?"

हयु जपाप आप्‌यु, "तारु भगवान मालीक तीनाक मारे अगळ कर देदु।"

21 अळतेन इसाक याकुब सी कह्‌यु, "ए मारा पुर्‌या, मार धड़े आव, मे तुसेक हात लागाड़ीन उळखो की छाचलीन मारु पुर्‌यु एसाव छे की नी।" 22 तत्‌यार याकुब आपसा बास इसाक धड़े गुयु, ने हयु तीनाक सुलकीन कह्‌यु, "बुल ते याकुबेन तसी छे, बाकुन हात एसावेन तसा मालम पड़े।" 23 ने चु तीनाक नी उळख्‌यु, काहाकी तेरा भाय एसावेन हातेन तसा कान्‌या वाळा हतला; तेरेमां तीनाक चु संयबरकत आप देदु। 24 ने हयु पुछ्‌यु, "काय तु छाचलीन मारु पुर्‌यु एसाव छे?"

हयु कह्‌यु, "हव मेत छे।"

25 तत्‌यार हयु कह्‌यु, "खाणो मार धड़े ली आव, काहाकी मे मारु पुर्‌यु जो खाणो बणावीन मार वाटे मास लावलु तीनाक वारु खाम ने तुसेक आखा जीव सी संयबरकत आपीस।" तत्‌यार चु बी तेर धड़े ली आयु, ने चु खादु ने; ने चु तेर धड़े दारु बी लायु, ने चु पीदु। 26 तत्‌यार तेरु बास इसाक तीनाक कह्‌यु, मारा पुर्‌या, "धड़े आवीन मारा गुळा दे।" 27 ती चु धड़े जाय्‌न तेरे गुळा देदु; ने तीनाक तेरा पुथल्‌यान गंद सी तीनाक संयबरकत आप्‌यु, "देख, मारा पुर्‌यान गंद असा खेतेन तसी छे जीना खेत पर भगवान मालीक संयबरकत आपलु हय; ✝ 28 भगवान सरग सी उस्‌टो, ने खेतेन वारु सी वारु मेर ने बेसका दाणा ने अंगुरेन रस आपे। 29 राज्‌य-राज्‌येन तारा हक मां रहे, ने देस-देसेन माणसे तारे पाये पड़े। तु आपसा भायन मालीक बणे,ने तारी माइन पुर्‌या तारे पाये पड़े। जे तुसेक सराप देय तींद्‌रे बी सराप लागे, ने जे तुसे संयबरकत आपे तीनुक बी संयबरकत जड़े।" ✝

30 जसु नी असी संयबरकत इसाक याकुब काजे दी देदलु, ने याकुब आपसा बास इसाक अगळ सी नीकळ्‌यु अतरुत, ने एसाव बी सीकार लीन आय ज्‌यु। 31 तत्‌यार चु बी सवादो खाणो बणावीन आपसा बास धड़े ली आयु, ने तीनाक कह्‌यु, "मारा बास, उठीन आपसान पुर्‌यु सीकार करीन लावला मास काजे खा, काहाकी मेसे पुरा मन सी संयबरकत आपे।"

32 तेरु बास इसाक पुछ्‌यु, "तु कुण छे?"

चु कह्‌यु, "मे तारु पेहलु पुर्‌यु एसाव छे।"

33 तत्‌यार इसाक बेसकु थर-थर कापतु जाय्‌न कह्‌यु, "ती चु कुण हतलो, जु सीकार करीन मार धड़े लीन आवलु, ने मे तारे आवणे सी पेहेल आखा मां सी ईतरोक-ईतरोक खाय लेदु ने तीनाक संयबरकत आप देदु? ने हंय जी संयबरकत लागली रवसे।"

34 आपसा बासेन जी वात सामळतेत एसाव जुरे ने दुख सी भरला अवाज सी आयड़ीन आपसा बास सी कह्‌यु, "मारा बास, मेसे बी संयबरकत दी दे!"

35 ती हयु कह्‌यु, "तारु भाय मेसे धुकु दी देदु ने तारी संयबरकत काजे लीन जाती र्‌यु।"

36 चु कह्‌यु, "तेरो नाव याकुब ते नी हय? चु मेसे काजे दुय कावा धुकु देदु। मे पेहलु पुर्‌यु बाकुन हयु तीना जागा काजे लीत लेदलु; ने हंय देख, हयु संयबरकत बी ली लेदु।" ती हयु कह्‌यु, "काय तु मार वाटे संयबरकत बचाड़ीन नी राख्‌यु?"

37 इसाक एसाव काजे जपाप आपीन कह्‌यु, "सामळ, मे तीनाक तारु मालीक ठहरायु, ने तेरा आखा भायस काजे तेरे हक मां कर देदु, ने दाणा ने नवला अंगुरेन रस आपीन तीनाक खुस करलु छे। तेरेमां हंय, ए मारा पुर्‌या, मे तारे वाटे काय करों?"

38 एसाव आपसा बास काजे कह्‌यु, "ए मारा बास, काय तार धड़े एकुत संयबरकत छे? मारा बास, मेसे काजे बी संयबरकत आप।" असु कय्‌न एसाव ढळो-ढळो रड़्‌यु।✝

39 तेरु बास इसाक तीनाक कह्‌यु, सामळ,

तारु रहणेन खत वाळी खेती नी रहे, ने सरग सी उस्‌टो नी पड़े।✝

40 तु आपसान तलवारेन ताकुत सी जीवतु रहे,

ने आपसा भायन हक मां ते हवे;

बाकुन जत्‌यार तु तेरे हकेम सी छुटणे करीन लड़ाय करसी ती,

तु तेरा हकेम सी छुट जासी। ✝

41 एसाव याकुब सी भुंडु हय ज्‌यु, काहाकी तेरु बास याकुब काजे संयबरकत देदलु; ने हयु असु वीच्‌यार कर्‌यु की, "मारा बासेन मरनेन धड़ेत छे, अळतेन मे मारा भायस याकुब काजे मारीस।"

42 जत्‌यार रीबका काजे तेरु पेहलु पुर्‌यु एसावेन जी वात सामळी, तत्‌यार हयी आपसा नानला पुर्‌या याकुब काजे बुलायन कय, "सामळ, तारु भाय एसाव तुसे मारने करीन सुची र्‌यु। 43 तेरेमां हंय, ए मारा पुर्‌या, मारी सामळ, ने हारान देस मां मारु भाय लाबानेन चां जाती रव; 44 ने थुड़ाक दाहड़ा लग, मतलब जत्‌यार लग तारा भायन रीस नी सेळाये तत्‌यार लग तेरेत धड़े रवजी। 45 ने थुड़ाक दाहड़ा मां तारु भाय वीसरी जासे, ने तेरी रीस सेळाय जासे। तत्‌यार मे तुसे काजे चां सी बुलावणे करीन पावर्‌याक मकलीस। ने तु आवती रवजी। असो नी हवणु चाहजे की, एकुत दाहड़े तुहुंं लड़ायन मर जावु। मे तुहुंं दुयु काजे खुवणे नी हींड्‌ती।"

46 तत्‌यार रीबका इसाक काजे कय, "तारु पुर्‌यु एसाव ते हीत्‌ती जातीन बायरा काजे बणाय लेदु, मे तीनु बायरा सी घाबराय गुयु, काहाकी चे बायरा आपणा माणसे माय्‌न नी हय। कांखुर माय्‌न याकुब बी हीत्‌ती जातीन बायरा बणाय लेसे, ती ते मेसेक जीवणे सी मरनु वारु छे।"