1 जत्‌यार आदम आपसी बायर हवा साते सोवसार कर्‌यु, ती ची भारीस हय ने तेरु एक पुर्‌यु हयु, ने ची कय, "यहोवा भगवानेन मदत सी मारु एक पुर्‌यु हयु।" ने ची पुर्‌यान नाव केन पाड़ी। 2 अळी हवान एक दीसरु पुर्‌यु बी हयु, तेरो नाव हाबील पाड़्‌या, ने चु गाडरा चारन्‌यु बण गुयु, बाकुन केन ते खेती मां कमाय करनेवाळु कीरसान बण गुयु। 3 थुड़ाक दाहड़ा हय ज्‌या ने मेर काटणेन टेम आय ती केन आपसी मेरेम सी थुड़ोक लीन यहोवा भगवान धड़े भेट चहड़ायु।✝ 4 ने हाबील बी आपसा गाडरान पेहला पीला माय्‌न मातला पीला काजे मार्‌यु, ने तेरेम सी वारलु काळजो, ने चरबी ने सीकार चड़ायु; ने यहोवा भगवान हाबील काजे ने तेरा भेट काजे मानी लेदु।✝ 5 बाकुन भगवान केन काजे ने तेरी भेट काजे नी मान्‌यु। तत्‌यार केन बेसकु रीसाय पड़्‌यु, ने केनेन मुंहडो उतरी गुयो। 6 तत्‌यार यहोवा भगवान केन काजे पुछ्‌यु, "तु काहा रीसवाय रयु? ने तार नुरपाणी काहा उतरी रयो?" 7 कदी तु भलो करसी ती मे भेट काजे नी मानो काय? छाचलीन मानीस। ने कदी तु भलो नी करे, ती पाप बारना पर बस रवे, ने तारी हय तेर भीणी रवसे, ने तु तेरे पर हक जमाड़जी।

8 तत्‌यार केन आपसा भाय हाबील काजे काय कह्‌यु; ने जत्‌यार चे खयड़ा मां हतला तत्‌यार केन आपसा भाय हाबील काजे उचकाणुन दीन मार नाख्‌यु।

9 तत्‌यार यहोवा भगवान केन काजे पुछ्‌यु, "तारु भायस हाबील कां छे?"

तत्‌यार केन जपाप आप्‌यु, "काय जाणु?" काय मे मारा भायसेन गुवाळी करो काय?

10 तत्‌यार यहोवा भगवान केन काजे कह्‌यु, "तारा भायसेन लुही धरतीम सी आयड़ीन मारे धड़े वीन्‌ती-दुवा करने बाजी रयो!" तु असु काहा करलु?✝ 11 हेरेसी हय धरती तारा भायसेन लुही पीणे करीन आपसान मुंहडो उगाड़ लेदी, हेरेसी तु धरती भीणी सी गरा वाळु छे। 12 पछला दाहड़ा मां तारी मेर वारु पाकी, बाकुन हय सी तारी मेर वारु नी पाके, धरती पर तुसेक घर बणायन नी रवाये ने उजाड़्‌यु जां वां भटकायतु फीर्‌या करसी।

13 तत्‌यार केन यहोवा भगवान सी कह्‌यु, जु डंड बेसकु भारी छे, मेसेक नी सेण हवे। 14 सामळ, तु मेसे काजे खेत मां सी नीकाळ देदु, ने मे तार सी छेटु रय्‌स, ने धरती पर मेसेक घर बणाय्‌न नी रवाये ने मे उजाड़्‌यु जां वां भटकायतु फीर्‌या करीस, ने जु काहनुक बी मेसेक देख्‌से चु मेसेक मार नाखसे।

15 तत्‌यार यहोवा भगवान केन काजे कह्‌यु, "मे तु कह्‌यु तसों नी हवणे दम। कदी काहनुक तुसेक मारसे, ती मे तीनाक सात गुणा डंड आपीस।" ने अळी यहोवा भगवान केन पर एक सहलाणीन छाप लगाड़ देदु। जु सहलाणीन छाप जो देखाड़तेलु की, केन काजे काहनु नी मारनु चाहजे। 16 तत्‌यार केन यहोवा भगवानेन चां सी जात रयु, ने नोद नावेन देस मां रवणे बाजी गुयु, जो अदन मुलुकेन उगवणो हतलो।

17 जत्‌यार केनेन ईयाव हय-ज्‌यु ने चु आपसी बायरी साते सोवसार कर्‌यु, ने ची भारीस हय गुय, ने तेरु एक पुर्‌यु हयु, ने तेरो नाव हनोक पाड़्‌या। ने केन एक सहर बसाड़्‌यु ने तीना सहरेन नाव बी आपसा पुर्‌यान नाव हनोक पाड़ देदु। 18 हनोक सी ईराद पयदा हयु, ने ईराद सी महुयायेल पयदा हयु, ने महुयायेल सी मतुसायेल पयदा हयु, ने मतुसायेल सी लेमेक पयदा हयु। 19 लेमेक दुय बायरा बणाय लेदु: तींद्‌रेम सी एकेन नाव आदा, ने दीसरीन नाव सील्‌ला हतलो। 20 आदानेन एक पुर्‌यु हयु, तेरो नाव याबाल पाड़्‌या। चु अगु जाय्‌न कळीन आखान पेहलु ढुरे पाळन्‌यु बण्‌यु। ने ढुरे काजे पाळने करीन जागे-जागे रवणे करीन तम्‌बु मां रवतेलु; ने चु तम्‌बु मां रवण्‌यान ने ढुरे पाळन्‌यान डाहलु बास कह्‌वाये। 21 ने आदानेन बायरीन दीसरु पुर्‌यु हयु। तेरो नाव युबाल पाड़्‌या। जु युबाल्‌यान भायस हतलु। अगु जाय्‌न युबाल बासुरी ने पावळी बणायु ने कळीम आखान पेहले वाजाड़नेन काम करने बाजी गुयु। ने चु पावळी वाजाड़न्‌यान डाहलु बास कह्‌वाये। 22 सील्‌ला बायरीन बी एक पुर्‌यु हयु। तीना पुर्‌यान नाव तुबलकेन पाड़्‌या। तुबलकेन अगु जाय्‌न पीतळेन ने लुहड़ान हत्‌यार बणावणेन काम करतेलु। चु तुबेलकेन्‌यु लुहार्‌यान डाहलु-बाबु कहवाये। ने ईना तुबलकेन एक बहणीस हतली, तेरो नाव नामा हतलो।

23 एक दाहड़ु लेमेक आपसा बायरा अगळ असु कहीन मटाय करने बाज-ज्‌यु;

"ए आदा ने सील्‌ला, मारी वात सामळु; ए लेमेकेन लाड्‌या, मारी वात धीयान दीन सामळु:

एक अदमी मार भीणी जुर करीन मारे देदु ने मेसेक घाव वाळु कर देदु,

मे तेरे पछु वाळ देदु। ने तीना जुवान्‌या काजे मे मारीत नाख्‌यु।

24 भगवान कहलु, जु कुय केन काजे मारसे तीनाक ते सात गुणा डंड आपणु पड़से,

बाकुन मे कह, जु कुय मेसेक मारनेन करसे, मे लेमेक काजे सत्‌तर ने सात गुणा डंड आपीस।"

25 आदम आपसी बायर हवा साते अळी सोवसार कर्‌यु, ने ची भारीस हय गुय, ने तेरु एक अळी पुर्‌यु हयु, ने ची तेरो जो कय्‌न नाव सेत पाड़ी की, भगवान मेसे काजे हाबीलेन बदले एक अवल्‌यात बी आप्‌यु, तीना हाबील काजे केन मारीन नाख देद्‌लु।✝ 26 अळी सेत आपसी बायर साते सोवसार कर्‌यु, ने तेरु एक पुर्‌यु हयु। तेरो नाव चे एनोस पाड़्‌या। तीनी टेमे सी माणसे भगवान काजे यहोवा कय्‌न तेरे सी दुवा करने बाजी गुया।