1 इस्‌राएल्‌यु आपसु आखु बीडारु बांदीन मीसर देस भीणी चाल पड़्‌यु, ने बेरसेबा पुगीन चां आपसा बास इसाकेन भगवान काजे जानवर मारीन बादा चड़ायु, ने तेरी भक्‌ती कर्‌यु। 2 तत्‌यार राती भगवान, इस्‌राएल्‌या काजे जागता-सपना मां कह्‌यु, "ए याकुब! ए याकुब!" इस्‌राएल कह्‌यु,

"काय वात छे कव, मे जां छे।"

3 चु कह्‌यु, "मे भगवान छे, तारा बासेन भगवान छे।" तु मीसर देस जाणे सी मां बीहे काहाकी मे तार सी चां एक मट्‌ली अवल्‌यातेन अवल्‌यात बणावीस। 4 मे तारे पुठ्‌ये-पुठ्‌ये मीसरे देस मां चालीस, ने मे चां सी मे जरुर पछु ली आवीस ने युसुफ आपसान हाते सी तारा डुळा काजे बंद कर देसे। 5 अळतेन याकुब बेरसेबा सी मीसर देस मां जाणे तीयार हय ज्‌यु: ती फीरोन राजु ली मकेल्‌लु, तीनु घुड़ा-गाडी पर इस्‌राएल्‌यु आपसा पुर्‌या ने तींद्‌रा बायरा-छुरा भेळे बसीन मीसर देस भीणी चाल पड़्‌यु। 6 ने आपसा गाडरा ने बुकड़ा, गावड़ी, ने बेल ने अळी कनान देस मां जो माल-धन भेळो करलु आखो धन लीन मीसरे देस मां पछु आयु। 7 ने याकुब आपसा पुर्‌या पारी ने पुर्‌यान पुर्‌या पारीक मतलब आखा घरन्‌या काजे आपसा पुठ्‌ये मीसरे देस मां ली आयु।

8 याकुबेन मतलब इस्‌राएल्‌यान पुर्‌या ने तींद्‌रा पुर्‌यान-पुर्‌या, जे मीसर देसो मां आवला, तींद्‌रा नावे जे छे: इस्‌राएलीन पेहलु पुर्‌यु रुबेन हतलु। 9 ने रुबेनेन पुर्‌या: हनोक, पल्‌लु, हेसर्‌यु ने कर्‌मी हतला। 10 इस्‌राएल्‌यान दुसरु पुर्‌यु सीमोन हतलु। सीमेन्‌यान पुर्‌या: यमुयेल्‌यु, यामीन्‌यु, अहद्‌यु, याकीन्‌यु ने सहर्‌यु ने सावुल हतला। सावुल कनानी जातीन बायरी सी पयदा हवलु। 11 इस्‌राएल्‌यान तीसरु पुर्‌यु लेवी हतलु। लेवीन पुर्‌या: गेरसोन्‌यु, कहात्‌यु, ने मरार्‌यु हतला। 12 इस्‌राएल्‌यान चोवथु पुर्‌यु यहुदा हतलु। यहुदान पुर्‌या: एर्‌यु, ओनान, सेला, पेरेस, ने जेरह हतला। एर्‌यु ने ओनान कनान देस मां मर गुयला। पारस्‌यान पुर्‌या: हेबरोन्‌यु ने हामुल हतला। 13 इस्‌राएल्‌यान पुर्‌यु इस्‌साकार्‌यु बी हतलु। ईस्‌साकार्‌यान पुर्‌या: तल्‌यु, पुव्‌वु, यासुब्‌यु ने सीम्‌रोन्‌यु हतला। 14 इस्‌राएल्‌यान पुर्‌यु जबुलुन बी हतलु। जबुलुनेन पुर्‌या: सेरेद्‌यु, एलोन्‌यु, ने योहलेल्‌यु हतला। 15 पद्‌दनराम मां लीया सी पयदा हवला याकुबेन पुर्‌या ने तींद्‌रा पुर्‌यान-पुर्‌या जेत हतला। ईना घराणा मां तीस ने तीन अदमी हतला। याकुबेन एक पुरे बी हतली, तेरो नाव दीना हतलो।

16 इस्‌राएल्‌यान पुर्‌यु गाद बी हतलु। गाद्‌यान पुर्‌या: सीयोन्‌यु, हग्‌गीयु, सुनीयु, एसबोन्‌यु, एरीयु, आरोदीयु ने आरेलीयु हतला। 17 इस्‌राएल्‌यान पुर्‌यु आसेर बी हतलु। आसेरेन पुर्‌या: ईम्‌नायु, ईसवायु, ईसवीयु, ने बेरीयायु हतला। ने बेरीयान पुर्‌या: हेबेर्‌यु ने माल्‌कीएल्‌यु हतला। ने आसेरेन एक पुरे बी हतली, तेरो नाव सेरा हतलो। 18 जे आखा जील्‌पा सी पयदा हवला याकुबेन अवल्‌यात हतला। लाबान जी जील्‌पा, लीया काजे आप्‌लु। ईना घराणा मां सुळ्‌ळे जणा हतला।

19 युसुफ ने बीन्‌यामीन बी याकुबेन पुर्‌या हतला। जे तेरी घरवाळी राहेल सी पयदा हवला। 20 युसुफेन दुय पुर्‌या: मनेस्‌यु ने एप्‌रेम हतला। जे युसुफेन लाडी आसनातीस मीसर देस मां पयदा हया। जी आसेनाती, सन सहर मां रहण्‌या पोतीपेरा पुजारान पुरे हतली। 21 बीन्‌यामीन पुर्‌या: बेला, बेकेर्‌यु, आसबेल्‌यु, गेरा, नामान्‌यु, एहीयु, रोस, मुप्‌पीम्‌यु, हुप्‌पीम्‌यु ने आरद्‌यु हतला। 22 जे आखा राहेली सी पयदा हवला, याकुबेन पुर्‌या ने पुर्‌यान-पुर्‌या हतला। ईना घराणा मां चोवदे जणा हतला।

23 इस्‌राएल्‌यान पुर्‌यु दान बी हतलु। दान्‌यान पुर्‌यु: हुसीम हतलु। 24 इस्‌राएल्‌यान पुर्‌यु नप्‌ताली बी हतलु। नोपताल्‌यान पुर्‌या: याहसेल्‌यु, गुनीयु, येसेर्‌यु, ने सील्‌लेम्‌यु हतला। 25 जे आखा बील्‌हान ने याकुबेन पुर्‌या-पारी हतला। जी बील्‌हा राहेलेन पावरनी हतली। ईनी बील्‌हा काजे लाबान आपसी बेटी राहेली वाटे आपलु। ईना घराणा मां सांत जणा हतला।

26 याकुबेन उहड़ीस्‌या काजे छुड़ीन याकुबेन घराणा मां आखा मेळीन तीन-वीसु ने छव जणा हतला। जे मीसर देस मां आवला। 27 मीसर देस मां पयदा हवला, चे युसुफेन दुय पुर्‌या हतला। ईने रीते मीसर देस मां याकुबेन घराणा मां आखा मेळीन सत्‌तर जणा हतला।

28 याकुब, यहुदा काजे आपसा सी अगळ युसुफेन चां मकली देदु। ने अळतेन इस्‌राएल्‌यु पछळ सी आपसा घराणा भेळ गोसेन नावेन जागा भीणी चाल पड़्‌यु। 29 अळतेन युसुफ, मीसर देसेम सी आपसी घुड़ा-गाडी जुपाड़ीन आपसा बास इस्‌राएल्‌या काजे भेळा हवणे करीन गोसेन नावेन जागा मां आयु, ने तीनाक भेळा हय्‌न तीनाक बाथलाटीन रड़तुत रयु। 30 तत्‌यार इस्‌राएल्‌यु, युसुफ काजे कह्‌यु "हंय मे तुसेक जीवतेलु देख लेदु; तेरेमां मे हंयत मर जाम तेबी काय नी हय।"

31 जो सामळीन युसुफ आपसा भायसेक ने तींद्‌रा पुर्‌या-पारीक, ने आपसा बास काजे कह्‌यु, "मे फीरोन राजा काजे जाय्‌न असु कय्‌स की, ‘मारा भायस ने मारु बास ने तेरो आखो घराणो, जो कनान देस मां रवतेलो, चो मारेन चां आवती रहलो छे। 32 ने चे गुवाळ्‌या छे, काहाकी चे ढुरे पाळे; ने चे आपसा गाडरा ने बुकड़ा, गावड़ी ने बेल, ने जो काय तींद्‌रे धड़े छे, चो आखो ली आवला छे।’ 33 ने जत्‌यार फीरोन राजु तुहुंं काजे पुछे की, ‘तुंद्‌रु काय धंदु छे?’ 34 तत्‌यार तुहुंं तीनाक कवजु, ‘हामु तारा गुलाम पावर्‌या छे, ने हामु नानला हतला, ती सीत गुवाळ्‌या छे ने बुकड़ा, गाडरा ने ढुरे चारता आय र्‌या। ने हामरा आड़ा-बुड़ा बी असात ढुरे चारतेला।’ असा कवसु तीत चु तुहुंं काजे गोसेन नावेन खयड़ा मां वसणी देसे; काहाकी आखा मीसर मां रहण्‌या माणसे गुवाळ्‌या सी छीट पाळे।"