7 अळतेन युसुफ आपसा बास याकुब काजे बी फीरोन राजान चां मांही बुलायन तेरी उळखाण राजाक कराड़्यु। ने याकुब फीरोन राजा काजे संयबरकत आप्यु। 8 अळतेन फीरोन राजु याकुब काजे पुछ्यु, "तु कतरा सालेन छे?"
9 याकुब फीरोन काजे कह्यु, "मे दीसरा देस मां दुख झेलीन एक सव तीस साले काट लेदु; मारा आड़ा-बुड़ा दीसरा-देसेम जतरा साल लग जीया, ततरा साल मारा नी हया।" 10 ने याकुब फीरोन राजा काजे एक कावा अळी संयबरकत आप्यु, ने तेरेन चां सी जाती र्यु। 11 युसुफ, फीरोन राजान हुकुम मानीन आपसा बास ने आपसा भायस्ये काजे मीसर देसेन, रामसेस नावेन सहर मां वारलु जागा आप दीन वसाड़ देदु। 12 युसुफ आपसा बासेक, भायसेक ने तींद्रा बायरा-छुराक, तींद्री गिन्तीन अनसारे खाणान तज्बु कर्यु।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)