1 तत्‌यार भगवान नुह ने तेरा पुर्‌याक संयबरकत आप्‌यु ने तीनुक कह्‌यु, "वेल वदु ने धरती पर वस जावु।" 2 ने तुंद्‌रो बीहाणो ने तुंद्‌रु धाक आखा जानवर्‌या मां, ने सरगेन चिरला मां, ने धरती पर घीसड़ायन चालन्‌या जानवर्‌या मां, ने दरीयान माछा मां रवसे। ने मे तीनु आखा काजे तुंद्‌रा हातेम आप देदु। 3 जसु मे पेहले तुहुंं काजे नीळ्‌ळी भाजी खाणे करीन आपलु; तसुत हंय मे आखा चालन्‌या-फीरन्‌या जानवर्‌या खाणे करीन आपो। ने जे आखा तुंद्‌रेत वाटे छे। 4 बाकुन तुंद्‌रे वाटे जानवर्‌यान मास जीव भेळेत मतलब लुही भेळेत घुण खावु। 5 ने मे छाचलीन तुंद्‌रा लुहीन मतलब जीवेन बदलु लीस ने जानवर्‌या ने माणसे दुयुन बदलु लीस। माणसेन जीवेन बदलु मे एक-एकेक भाय सी लीस। 6 "मे भगवान, माणसे काजे आपसान सीका मां घड़लु छे। तेरेमां कुय काहना बी माणसे काजे मारीन खुन उहवाड़से, तेरे वाटे मे खुनेन बदलु लीस।"

7 "हंय तुहुंं धरती पर वेल अधे ने धरती पर वस जावु।"

8 भगवान नुह काजे ने तेरा पुर्‌या काजे अघु कवतुत गुयु, 9 "सामळु, मे तुंद्‌रे भेळु ने तुंद्‌रे पछळ जी तुंद्‌री अवल्‌यात आवसे, तींद्‌रे सी बी वायदु करु; 10 ने आखा जीवतेला जानवर्‌या सी बी बुली बांदो, जे ढंड्‌याम सी खयड़े आवला छे। चिरला साते, ने आखा जानवर्‌या साते बुली बांदो। 11 हंय सी कदी बी मुसळ-धार्‌यु पाणी पाड़ीन मे माणसे काजे ने जीव जानवर्‌या काजे नी मारो। मे ईनी बुली काजे कदी नी वीसरो।" 12 अळी भगवान कह्‌यु, "मे तुंद्‌रे साते ने आखा जीवतेला जीवे सी जी बुली करलु, ची बुली पीड़ीडीट बणली रवसे; तीना वायदान सहलाणी जी छे: 13 मे वादळा मां बाम मेल दम। जु बाम धरतीन ने मारे ईचमां जु वायदु हवलु छे, तेरी सहलाणी रवसे। 14 ने जत्‌यार मे धरती पर वादळा फेलाय्‌स तत्‌यार जु बाम देखाव पड़से। 15 तत्‌यार मारी जी बुली तुंद्‌रे ने आखा जीवला जे डील मां छे तीनु जीवे सी करलु छे; तीनुक मे हेर करीस, तत्‌यार असो मुसळ-धार्‌यु पाणी नी पड़से ने चे आखा जे जीवला छे चे बची जासे। 16 वादळा मां जु बाम रवसे मे तीनाक देखीन जी सदान बुली हेर करीस, जी बुली भगवानेन ने धरती परुन आखा जीवला डील मां छे तीनु जीवेन ईचमां बांदलु छे।" 17 भगवान नुह काजे अळी कह्‌यु, "जी बुली मे धरतीन आखा जीवतेला जीवे साते करलु छे, तेरी सहलाणी जु बामुत छे।"

18 नुहान पुर्‌या जे ढंड्‌या मां सी नीकळ्‌ला चे सेम्‌यु, हाम ने येपेत्‌यु हतला। ने हाम्‌यु ते कनान्‌यान बास हतलु। 19 नुहान तीन पुर्‌या जेत हतला, ने हींद्‌रेत सी धरतीन आखा माणसेन वेल अध्‌यु।

20 कळ धुवाय गुय ने अळतेन नुह खेती करने बाजी ज्‌यु, ने चु आपसा खेते मां अंगुरेन वाड़ी लागाड़्‌यु। 21 अंगुर पाक ज्‌या ने अळतेन चु अंगुरेन रस बणाय्‌न पीदु, ने बेसकु छाक ज्‌यु ने तेरी पुथल्‌या समाळनेन बी सान नी रय। तेरेमां चु आपसा तम्‌बा मां पुथल्‌या पाखुर सुय ज्‌यु। 22 ती कनानेन बास हाम आपसा बास नुह काजे पुथल्‌या पाखुर सुय रहलु देख्‌यु, ती चु खयड़े जाय्‌न आपसा भाय काजे बास पुथल्‌या पाखुर सुय र्‌यु, करीन कय देदु। 23 आपसा भायस हाम्‌यान वात सामळीन सेम्‌यु ने येपेत्‌यु पुथल्‌यो आपसा खांदा पर सी वासा पछळ टांगायतो करीन पछ-मुंड्‌या गुयु ने आपसा बास पर पुथल्‌या पाखुर सुय रवलु ती डील ढाक देदा, ने चे पछ-मुंड्‌या हतला, तेरेमां आपसा बासेक पुथल्‌या पाखुर नी देख्‌या। 24 अळतेन तेरी नस्‌यु उतरी गुय ने चु सुय्‌न उठ्‌यु ती तीनाक मालम पड़्‌यो की: मारु इजगाळ्‌यु पुर्‌यु हाम्‌यु मार साते कसु वेहवार करलु। 25 तेरेमां नुह कह्‌यु,

"ए हामेन पुर्‌या कनान्‌या! मे तुसे काजे सराप दम,

तु आपसा भाय-बंदीन पावर्‌यु बण जायस।"

26 नुह अळी कवतु गुयु, "ए सेम्‌या, तारु यहोवा भगवान बरकत वाळु छे, बाकुन कनान्‌यु ने तेरी अवल्‌यात,

तारा ने तारी अवल्‌यातेन पावर्‌यु बण जाय करीन।

27 भगवान येपेत्‌यान अधाड़ीन तेरा वाटा काजे बी वदाड़े करीन;

ने येपेत्‌यु ने तेरी अवल्‌यात, सेम्‌यान ने तेरी अवल्‌यातेन तम्‌बा मां मेळीन रहे करीन,

ने कनान्‌यु येपेत्‌यान अवल्‌यातेन पावर्‌यु बणीन रहे करीन।"

28 मुसळ-धार्‌यु पाणी पड़ीन हीटी गुयु ने अळतेन नुह तीन सव पचास साल लग अळी जीवत्‌लु रह्‌यु। 29 तसु करीन नुह नव सव पचास साल लग जीवत्‌लु रह्‌यु; ने अळतेन चु मर ज्‌यु।