Marcos 5

Yeso a ta Vra Riwa a Kuu Shɨme ran Den Waa ri Lilo

21 Riwa Yeso a kɨma hi ri gran nne ri kuri wan, ijɨbu nji waka kagon wan ri nyu nne-a. 22 Inji ri rimi wa rinkon ri tra bubu kabru nji Yahuda ri riwa wa yo nde wa ri Yayirus, ka ye ri bubu riwa a to Yeso ran kɨbu mgbazhu ri kusi wan. 23 Ka sondu ran bre Yeso ri,<<Ivra won tsitsa a ran he si ran me bre wu ritu wu ri ye bre wu wo no fe si ran son ri sii.>> 24 Imba Yeso ka hu wa hi ri ko-a. Ijɨbu nji waka hu wari ran ima-u. 25 Iwa ri a he ri bubu wan riwa a ran zhu yii ri se wurudon hari. 26 Iwa-a a so yaa bran ri wo wawa wa de gbugblu nga ran wuu kongye riwa a he ri wu kre ritu riwa no fe si ama lilo-a ka sondu ran sro nga. 27 Riwa iwa-a a wo tre Yeso ka dzu rimi jɨbu nji-a ran ye zhu kugon Yeso nga ran bre wo ri nyun tsro Yeso, 28 ritu a ran rimɨren rimi kpa wan ri,<<Ko wawu bre wo ri tsro wan kakre wawu ri fe sii.>> 29 Ri bubu wan izhu yii-a ka kukri nga ka wo rimi kpa wan iri wa den wawu.

30 Ri bubu wan Yeso ka wo ri kpa wan ri gbengbren ri zhu rimi kpa wan. Ka kɨma ya jɨbu nji ran miyen ri, <<ingha ri bre wo ri tsro won?>>

31 Imiri ndu wan waka tre ri,<<Wu to bibi riwa ijɨbu nji wa kagon wen ki, wu ri ri mɨyen ri ingaa bre wu wo?>> 32 Ama Yeso ka sondu ran ya kagon ritu ran to ko ingaa nye bre wu wo. 33 Imba iwa-a riwa a to kya riwa wa ti ri wu ka ye kɨbu mgbazhu kusi Yeso raa ran wiri kpa ritu sisiri, nga ran la Yeso kpunji tre iri wawu nye bre wu wo. 34 Yeso ka tre wu ri,<<Ivra won ikpanyɨme wen kpa-u chuwo. Hi ngawen ri sii kpa wa den kpa chuwo rimi lilo wen.>>

35 Riwa Yeso a ran tre nganyi, nji wari wa zhu ri ko Yayirus rinkon ri tra kabrutu riwa nji Yahuda wa ye wari tre ri,<<Ivra wen kuu ko ngye ti wu kawen ri wa tre ri nji ri tsro?>>

36 Yeso ka ran srenton ri kya riwa wa tre ran, ama ka la nji rinkon ri tra bubu kabrutu riwa nji Yahuda-a ri,<<Ran ti sisiri ran; kpanyɨme kakre.>> 37 Yeso a ran no njo no hu hi ri ko Yayirus ran ara Bitrus, ri Yakubu nga Yonana vayi Yakubu. 38 Riwa wa ke ri ko Yayirus Yeso ka to wa kpagro wari ri yii ko kutan. 39 Yeso ka gra rimi ko-a ran tre ri wa ri,<<Ritu ngye ko bi yii bi ri ri kpagra ko kutan? Ivra nyi ran kuu ran ari kru nna nye.>> 40 Imba waka nza-u ri tsri, ka dzu wa zhu raa wawu ran yo ti vra-a ri yi vra-a nga wa miri ndu wan wawa wa he ri wu ri bubu wan, nga wari gra rimi tra riwa ivra-a he rimi wan. 41 Yeso ka vu wo vra-a ran tre ri,<<Talita kumi!>>Riwa ari tre ri,<< Vi vra, walunde.>> 42 Ri bubu wan ivra-a ka wulunde ran zren. Ise wan a he wuru don hari riwa a ti ngamba a waka gra ti sisiri bran bran. 43 Yeso ka fen wa ton ri no wa ran la njo kya riwa a ti ran, ran la wa ri no wa wa kya no ri.