1 Ndʉʉmɛ, mbʉ tiefɛ̀ʼndɛŋkwɛʼtəŋNyii bíʼtə tʉ Shitifɛ̄ŋ mbɔ, "Nubə-ɔ̄ŋ ndə bə gìe kətʉ-a inchəŋ nɔ bɛ haʼ shʉəŋ mɛ?"

2 Shitifɛ̄ŋ bə̀ŋhə mbɔ, "Bəliŋ-bɔŋ ghɔŋbə bətie-bɔŋ, b̈ii yʉ́ nukə ndə mɔ kie ndə məgìe tʉ bii. Nyii-yʉʼʉ ndə ɔ gʉ́ə daa nɔ nə kɛ̀ʼ ŋwɔŋ-ɛŋ tʉ tie-yʉʼʉ Ablahaŋ vɛʼ ndə ɔ kə bɛ Mɛsobotemia, ɔ buŋ lɔ̀ gɛ̀ Halaŋ. 3 Nyii ghɔ̀ŋ tʉ ɔŋ mbɔ, ‘Mɛ̀ʼtə lɔʼɔ-a, mɛ̀ʼtə bʉə-ba, gwè ndə yəŋkə ndə mɔ bu dʉ̀ʼ tʉ a.’ 4 Ndʉʉmɛ, Ablahaŋ lɔ̀ hə lɔʼɔ Chadia gɛ̀ Halaŋ, chí chɔ tə tie-e nə sɛŋ kwú. Nyii lʉ̀ ɔ hə chɔ, gwè nə nɔŋ fɛ̄ŋ ndə bii tʉʼ chí chɔ nduɔ nɔ. 5 Nyii kə kɔ́ yi-yə fɔbə fɛ, buŋ laa ɔ, tə laa vaakəŋkʉə-sê məniʼ, bɔŋ bɛ le Nyii kɔ̀ʼnə ɔŋ mbɔ mbʉ lɔʼɔ inchəŋ la bu nə bɛ yi-yə ghɔŋbə ŋgwie-wo-e, bɔŋ nə kə buŋ bɛ vɛʼ-ghɔ̄ təmə ɔ nɔʼ kie vaa fɛ. 6 Nyii bɔŋleʼ ghɔ̀ŋ tʉ ɔŋ mbɔ ŋgwie-wo-e la bu nə bɛ bəntoʼŋgwe lɔʼɔbɛʼ, nyíɛ ŋgʉəʼ chɔ nə fʉəhə ndə ŋgʉʼhə təghyʉʉ kwi. 7 Nyii ghɔ̀ŋ mbɔ, ‘Mɔ bɔŋ bu nə kɔ́ ŋgʉəʼ tʉ mbʉ lɔʼɔ kətə̂ŋ ndə bɔ̂ŋ tʉʼ fɔ̀ʼ fʉəhə tʉ bɔŋ, bɔŋ nə kəliʼ nɔ, bɔ̂ŋ fyú chɔ, gwè kə́ lə̀ʼtə mɔ kəyəŋ-fɛ̄ŋ.’ 8 Vɛʼ-ghɔ̄, Nyii gwìa ŋkaamə ghɔŋ Ablahaŋ ndə cheʼkə-i bɛ mbɔ ɔ̈ kə́ fɔ̀ʼ vâa-bi. Vɛʼ ndə bə bí Aisi, Ablahaŋ tie-e fɔ̀ʼ ɔ, ɔ kə bɛ chîbə fɔ̂ŋ. Aisi kóʼ bí Jakɔ, Jakɔ bí vâa-bi njuɔ bûu nə wuŋ, ndə bɔ̂ŋ kóʼ mɔʼɔ lɔʼɔ-Juu.

9 "Bəbɛʼbə vâa-Jakɔ bàa shʉ Jɔsɛ, lʉ̀ ɔ fɛ̀ŋ ndə fʉə, bə gɛ̀ nə nɔŋ Iji. Bɔŋ Nyii kə́ bɛ ghɔŋ ɔŋ mɔʼɔ, 10 chʉ̀ʼ tʉkə-i hə mu ŋgʉəʼ. Nyii kɔ́ mukətʉ súunə tʉ Jɔsɛ bɔŋleʼ chìi Fɛlo ndə ɔ kə bɛ Fɔŋ bʉə-Iji dʉ̀ʼ buuŋjyu tʉ ɔŋ, vɛʼ ndə ghɔŋ kə bɛ mɔʼɔ. Nɔ Fɛlo dùʼhə ɔŋ, ɔ kə́ lɛ́nə lɔʼɔ Iji nchəŋnchəŋ, bɔŋleʼ dùʼhə ɔŋ ndə wokwɛʼtəŋ mu ntoʼ nchəŋnchəŋ-ɛŋ.

11 "Bɔŋ chyʉʉ gwù mu lɔʼɔ Iji leʼnə lɔʼɔ Kana. Fɔyubə mì kəghɔ-bətietie-baʼa inchəŋ, bɔ̂ŋ nyíɛ fɔŋ-ŋgʉəʼ. 12 Bɔŋ Jakɔ yʉ́ mbɔ fɔyubə la bíe Iji, ndʉʉmɛ, ɔ tə́ŋ vâa-bi chɔ ndə məgɛ̀ nyúɔ ibɛʼ-yə. 13 Bɔ̂ŋ kʉ̂ʉ bʉ̀nə bìʼ gɛ̀ ndə biitəkə, Jɔsɛ kɛ̀ʼ ŋwɔŋ-ɛŋ tʉ bəliŋ-bi, lʉ̀ bɔŋ gɛ̀ dʉ̀ʼ tʉ Fɛlo. 14 Ndʉʉmɛ, Jɔsɛ dùhə ntəŋ mbɔ tie-e, J̈akɔ la gwè ghɔŋbə bʉə-bi bənchəŋ bìatə ɔŋ Iji. Nchəŋnchəŋ-yʉə ndə bɔ̂ŋ kə gɛ̀ nɔ kə bɛ bʉə njuɔ taa nə wuŋ təkwiitia. 15 Jakɔ gɛ̀ Iji, chí tə kwútə chɔ ghɔŋbə vâa-bi vâabələŋ bənchəŋ ndə bɛ bətietie-bʉʼʉ. 16 Bə lʉ̀ ŋkwubə-ʉə bʉ̀nə gɛ̀ nə yɔŋ Shikɛŋ, gɛ̀ tyúu bɔŋ mu sě ndə Ablahaŋ kə nyúɔ kəghɔ-vâa-Hamɔ, lɔʼɔ Shikɛŋ.

17 "Ndʉʉ kʉ̂ʉ kə́ kʉ̀ʼnə gwè ndə Nyii bu fɔ̀ʼ nukə ndə ɔ nɔʼ kə kɔ̀ʼnə tʉ Ablahaŋ, bʉə baʼa mu Iji kɛŋ bìʼ yɔ́ŋyɔ́ŋ daa. 18 Bɔŋ ndʉʉmɛ, fɔŋ fefe kóʼ kəkʉə lɔʼɔ Iji təmə leʼ kínə Jɔsɛ fɛ. 19 Fɔŋ-ɔ̄ŋ yə̀ŋ tiɛŋ bətietie-baʼa, chɔ́ŋhə bɔŋ, kə́ kwɛ̀ŋhə bɔŋ ndə məké vâa-bʉə, bɔ̂ŋ chʉʼ kwútə.

20 "Nɔ kə bɛ ndʉʉ-ghɔ̄, bə bí Mushi, ndə ɔ bʉ̀ʉ shʉ-Nyii daa. Bətie-bi kie ɔ ndə bəchi itia. 21 Kəliʼ, bə bɛ ndə məmɛ̀ʼ ɔŋ, vaa-fɔŋ-bəke-Fɛlo bɛ́nə ɔŋ, chìnə ɔŋ ndə vaa-ɛ. 22 Bə dàhə Mushi nə ndaa bʉə-Iji inchəŋ, ɔ shʉ́ə ndə kwəʼ-ɛ ghɔŋ nchiinə bənu-i daa.

23 "Ɔ kʉ̂ʉ dàa ŋgʉʼhə wuŋ kwi, kwɔ̀ʼtə ndə məgɛ̀ mətòʼ tʉ bəliŋ-bi, bʉə-Isilɛ. 24 Ɔ kʉ̂ʉ gɛ̀ nyíɛ liŋ-iŋ, wo-Isilɛ, wo Ijibɛʼ kə́ núʼhə ɔŋ, ndʉʉmɛ Mushi gwè túunə tʉkə-i tyú mbʉ ŋgʉəʼ, yí mbʉ wo Iji. 25 Mushi kə́ kwɔ̀ʼtə mbɔ mbʉ bəliŋ-bi bu chèʼnə mbɔ Nyii bu kwáa tʉkə-ʉə tíŋ hə bɔ̌ŋ mbəŋ-ɛŋ təmə bɔ̂ŋ chèʼnə fɛ.

26 "Mbi kʉ̂ʉ sɛŋ fíi, ɔ bìʼ gɛ̀ mətòʼ chɔ, nyíɛ bəliŋ-bi bʉə-Isilɛ bəbûu, bɔ̂ŋ kə́ gwúu byuʼu. Ɔ kɔ̀ɔtə ndə məlìʼ ntuu-yʉə bɔŋleʼ ghɔ̀ŋ mbɔ, ‘Bii nɔ bɛ bəliŋ, kə́ gwúu byuʼu ka?’

27 "Bɔŋ wo ndə ɔ chìi fyùufyùu tʉ́ʉhə Mushi kɔ́ bɔ̌ŋ, bíʼtə tʉ ɔŋ mbɔ, ‘Dùʼhə nda dùʼhə a ndə mə-kə́-sɔ́ʼ baʼa ndə fɔŋ bɔŋleʼ kə́ kwɛ̀ fɛʼɛ-yaʼ. 28 A tʉʼ kʉ́ʉ yí mɔ haʼ ndə a kə yí wo Iji-i yɔ̂ŋ le mɛ?’ 29 Ndʉʉ ndə Mushi yʉ́ yɔ̄ŋ-yə, ɔ nyʉ́ʉ fyú mbʉ mu lɔʼɔ gɛ̀ bɛ ntoʼŋgwe lɔʼɔ Mediaŋ, kəyəŋ ndə ɔ bí vâabələŋ-bi chɔ bəbûu.

30 "Ŋgʉʼhə kʉ̂ʉ tíŋ wuŋ kwi, wontəŋNyii fyú tʉ ɔŋ kwɔŋkəyəŋnə mbʉə Kwɔŋ Sina nə lɛɛŋhə-viʼi-kə mu vaa-yuu ndə i tʉʼ kyʉ́ʉ. 31 Mushi nyíɛ kə́ kwɔ̀ʼtə ntɛ-kəfɔ ndə i bɛ yɔŋ. Ndʉʉ ndə ɔ kwɛ̀ʼtə gɛ̀ mbʉə ghɔ ndə mənyíɛ, gyʉʉ-Tiekətʉ gìe tʉ ɔŋ mbɔ, 32 ‘Mɔ nɔ bɛ Nyii-bətietie-ba, Nyii-Ablahaŋ, Aisi, leʼnə Jakɔ.’ Mushi gwònə nə faakə təmə leʼ mùutə ndə məlɛ́nə fɛ.

33 "Tiekətʉ ghɔ̀ŋ tʉ ɔŋ mbɔ, ‘Shùɔ takwubə-a, bʉʼka a nɔ tə́nə ndəŋ yəŋ-kəchɔŋ-kə. 34 A nɔ kie ndə məkínə mbɔ mɔ nɔʼ nyíɛ ŋgʉəʼ ndə bʉə-bɔŋ tʉʼ nyíɛ mu Iji. Mɔ nɔʼ yʉ́ gwia-yʉə. Mɔ nɔʼ gwè ndə məchʉ̀ʼ tʉkə-ʉə. Nduɔ gwè, mɔ bu tə́ŋ aŋ, a gɛ̀ Iji.’ 35 Nɔ bɛ mbʉ Mushi nɔ ndə bɔ̂ŋ kə́ tɛ́ŋ ɔŋ kə́ ghɔ̀ŋ mbɔ, ‘Dùʼhə nda dùʼhə a ndə mə-kə́-sɔ́ʼ baʼa nə fɔŋ bɔŋleʼ kwɛ̀ fɛʼɛ-yaʼ?’ Nɔ bɛ wo nɔ ndə Nyii kə tə́ŋ ɔŋ ndə məgɛ̀ bɛ fɔŋ-yʉə bɔŋleʼ bɛ ŋkwaa-yʉə tíŋ hə bɔ̌ŋ wontəŋNyii ndə ɔ kə gwè tʉ ɔŋ mu vaa-yuu ndə i kə́ kyʉ́ʉ. 36 Ɔ chìi nuchíechubə ghɔŋbə fɔŋ-bəcheʼ, ndə məfyúhə bɔŋ hə Iji, tíŋ nə bɔŋ hə mu muukwɛʼtəŋmə ndə bə tíi nə muu-kəMbuu-mə. Ɔ gɛ̀ tòʼ ghʉ́ʉ ghɔŋ bɔŋ mu kwɔŋkəyəŋnə ndə ŋgʉʼhə wuŋ kwi kə́ gɛ̀ nə shʉbə gwè nə bɔ̌ŋ.

37 "Nɔ mbʉ Mushi nɔ ndə ɔ ghɔ̀ŋ tʉ mbʉ bʉə-Isilɛ mbɔ, ‘Nyii nɔ bu nə fyúhə yʉkəŋgie-e nə mɔ hə mu bəliŋ-bii ŋgʉʼʉbɛʼ.’ 38 Nɔ bɛ mbʉ Mushi nɔ ndə ɔ kə bɛ ghɔŋbə bʉə-Nyii mu kwɔŋkəyəŋnə ndʉʉ ndə wontəŋNyii kə kwə́ʼ tʉ ɔŋ ndəŋ Kwɔŋ Sina. Nɔ kə bɛ ghɔŋbə bətie-bʉʼʉ chɔ mɔʼɔ. Ɔ nɔ kə fí mbʉ ntəŋ ndə i gwè nə məchímbi hə kəghɔ-Nyii, téʼ tʉ bʉʼʉ.

39 "Bɔŋ bətietie-bʉʼʉ chɔ́ʼ chu Mushi, kíahə ŋwɔŋ-yʉə ndəŋ ɔŋ, kə́ kʉ́ʉ ndə məbʉ̀nə gɛ̀ Iji. 40 Bɔ̂ŋ gìe tʉ Alo mbɔ, ‘Chìi bənyii tʉ baʼa ndə bəkɔ bɔ̂ŋ bɛ bəntəŋbəshʉ-baʼa, bʉʼka baʼa leʼ kínə nukə ndə i nɔʼ fyú chíe Mushi-ɔ̄, ndə ɔ lʉ̀ baʼa fyú nə yɔŋ hə mu lɔʼɔ Iji fɛ.’ 41 Ndʉʉmɛ, bɔ̂ŋ bɔ́ŋ naʼ ndə məbɛ nyii-yʉə. Bɔ̂ŋ kə́ fɛ̀ʼ ɔ, tʉʉ-yʉə kə́ bʉ̀ʉ ndəŋ mbʉ kəfɔ ndə bɔ̂ŋ chìi. 42 Ndʉʉmɛ, Nyii shìe liɛŋ tʉ bɔŋ, chɔ̀ʼhə bɔ̂ŋ kɔ́ ndə mə-kə́-lɛ́ɛŋ chichi, chisuu leʼnə bəlɔʼɔ ndə nyii-yʉə. Nɔ bɛ haʼ ndə bə kə nyɔ̀ʼ mu ŋwɔʼnə-bʉəyʉkəŋgieNyii mbɔ,

‘Bʉə-Isilɛ, bii nə kə́ gwè nə fɔ-fɛ̀ʼndɛŋ-bə-īŋ kwɔŋkəyəŋnə,

mu ŋgʉʼhə-īŋ wuŋ kwi le, kə́ gwè kɔ́ bə tʉ mɔ mɛ?

43 Mbee, bii nɔ kə bɛ̀ʼ,

lɛʼ-Mulɛ-kə,

lɔʼ-nyii-Lafɛŋ,

ghɔŋbə fɔ-kɔ́ŋ-bə ndə bii kə chìi ndə mə-kə́-lə̀ʼtə.

Mɔ bu jə̀ŋ bii kɔ́ tʉ bii gɛ̀

dàa lɔ̂ŋ-Babilɔŋ.’*

44 Bətietie-bʉʼʉ nɔ nə bɛ̀ʼ lɛʼ-Nyii-kə ndə i dʉ̀ʼ mbɔ Nyii bɛ ghɔŋ bɔŋ, kə́ tòʼ ghʉ́ʉ nə yɔŋ mu kwɔŋkəyəŋnə. Bɔ̂ŋ nɔ kə chìi haʼ ndə Nyii kə fʉ̀ʼtə tʉ Mushi mbɔ ɔ̈ chìi, haʼ ndə ntɛhə ndə Mushi kə nyíɛ. 45 Mbi kʉ̂ʉ nə sɛŋ fíi, bətietie-bʉʼʉ ndə bɔ̂ŋ nə kie mbʉ kəlɛʼ hə kəghɔ-bətie-bʉə, bɛ̀ʼ gɛ̀ nə yɔŋ ghɔŋbə Joshua ndʉʉ ndə bɔ̂ŋ kə fí sê lɔʼ-bətə̂ŋ-tə ndə Nyii nɔʼ kə jə̀ŋ bɔŋ mu kəyəŋ-fɛ̄ŋ hə bəshʉ bətie-bʉʼʉ. I káa chɔ tə gɛ̀ dàa ndəŋ ŋgʉʼʉmbi ndə Dɛbi nə sɛŋ sɔ́ʼ Fɔŋ.

46 "Tʉʉ-Nyii nə sɛŋ bʉ̀ʉ ndəŋ Dɛbi, ɔ gháa fia ndə məfʉ̀ə yəŋ-chí-kə tʉ Nyii-Jakɔ. 47 Bɔŋ kəliʼ kia bɔ́ŋ bə Salamu bɔ́ŋ mbʉ njaa. 48 Buŋ ndə nɔ, Chaabəfɔŋ mə chí mu njaa ndə bɔ́ŋ woməsʉʉ nə ghɔkə-i fɛ. Haʼ ndə yʉkəŋgieNyii kə nyɔ̀ʼ mbɔ,

49 ‘Tiekətʉ nɔ bʉ́ mbɔ, "Yuo nɔ bɛ yetəkə-ɔŋ,

chisêkə kə́ bɛ yəŋ-tʉ́ʼ-nchɔʼhə-kə-ɔŋ.

Bəkɔ bii bɔ́ŋ njaafɛ̀ʼndɛŋ i bʉ̀ʉ bɛ nə yɔŋ mɛ?

Bəkɔ bii bɔ́ŋ yəŋ-chí-kə-ɔŋ mɛ?

50 Chìi mɔ chìi fɔbə nchəŋnchəŋ mu yuo ghɔŋbə chisêkə fe?" ’*

51 Bii bʉə-kwɛ̀ŋhə! Bii nɔʼ shʉ́əhə fyiihə-ii bɔŋ-nɔʼ-leʼ fʉ̀əŋ tyunəbə-ii ndə məyʉ́ shʉəŋ. Bii bu kə́ tɛ́ŋ haʼ LyʉʉhəNyiikə ndə bətie-bii kə tɛ́ŋ, bii lʉ̀ hə kəwu-bɔŋ mɛ? 52 B̈ii núhə mbyu yʉkəŋgieNyii imɔʼ ndə bətie-bii gòʼ təmə chɔ́ŋhə ɔŋ fɛ! Bɔ̂ŋ buŋ yí wo ndə ɔ kə lɛ́ŋhə hə bəshʉ mbɔ Wo ndə ɔ bɛ Ndyʉndyʉ la tʉʼ gwè, mbʉ Wo ndə Nyii kə Kùŋ Tə́ŋ, kə́ bɛ wo ndə bii kə fɛ̀ŋ bɔŋleʼ yí ɔ. 53 Bii nɔʼ kə kie mbʉ nuʼ hə kəghɔ-bʉəntəŋNyii, bɔŋ chaachaa tɛ́ŋ ndə mətʉ́ʼ."

54 Ndʉʉ ndə bɔ̂ŋ yʉ́ yɔ̄ŋ-yə, tʉʉ-yʉə byʉ́ʼ, bɔ̂ŋ kwó gyʉəʼtə-ʉə te Shitifɛ̄ŋ. 55 Bɔŋ bʉʼka Shitifɛ̄ŋ nɔʼ jyʉ́ʉ hə kəghɔ-LyʉʉhəNyiikə, ɔ tʉ́ʼ shʉ-i lɛ́nə yuo nyíɛ məgʉə-Nyii, bɔŋleʼ nyíɛ Jiso ɔ kə́ tə́nə kwiiləŋ Nyii. 56 Ɔ gìe tʉ bɔŋ mbɔ, "B̈ii nyíɛ, mɔ nɔʼ nyíɛ njəŋ-yuo-hə i kə́ tə́nə ighʉ́ʉnə bɔŋleʼ nyíɛ Vaa-Woməsʉʉ, ɔ kə́ tə́nə kwiiləŋ Nyii."

57 Ndʉʉmɛ, mbʉ bʉə mu kaŋsotə tíitə bənchəŋ, chíe tyunəbə-ʉə nə ghɔbə-ʉə, nyʉ́ʉ gɛ̀ mbʉə ɔ vɛʼ mɔʼ, 58 gɛ̀ dùu ɔ, fyúhə mu lɔʼɔ, kə́ túŋtə ɔŋ nə ŋgoʼhə. Ndʉʉmɛ, mbʉ bʉə ndə bɔ̂ŋ kə bɛ sê shùɔ ndyi-fəʼə-hə-ʉə, mɔ̀ʼ bəshʉ vaakəyɔwobɛʼ ndə yie-e kə bɛ Sɔɔ.

59 Ndə bɔ̂ŋ kə́ túŋtə ɔŋ, Shitifɛ̄ŋ gháaNyii ghɔ̀ŋ mbɔ, "Tiekətʉ-ɔ Jiso, mɔ nɔ mɛ̀ʼtə lyʉʉhəkə-ɔŋ tʉ a." 60 Ndʉʉmɛ, Shitifɛ̄ŋ bè kweʼtəbə-i sê, tíi nə ghʉəʼkə ghɔ̀ŋ mbɔ, "Tiekətʉ, kə a mə yá bʉ̂ʼʉ-ɔ̄ kətʉ-bɔ̄ŋ fɛ!" Ɔ kʉ̂ʉ gìe yɔ̄ŋ-yə le, kwú nə wi.