Fɔʼɔ 8

1 Sɔɔ nɔ nə bɛ́ŋ mbɔ b̈ə yí Shitifɛ̄ŋ.

Bə chɔ́ŋhə bʉə ndə bɔ̂ŋ kə bɛ́ŋ Nyii bɔ̂ŋ nyʉ́ʉ wɔ̀ʼnə

Nɔ nə bɛ mu bəchî-ghɔ̄, bə chʉ́ʉhə məchɔ́ŋhə bʉə ndə bɔ̂ŋ kə bɛ́ŋ Nyii mu chɔshi-Jɛlosalɛŋ shʉ́əshʉ́ə, bɔ̂ŋ nyʉ́ʉ wɔ̀ʼnə gɛ̀ mu lɔʼ-bətə̂ŋ-tə mu Judia leʼnə Samalia yaʼkɛŋ mbʉ bəlɔntəŋNyii. 2 Bʉəbɛʼbə ndə bɔ̂ŋ nɔʼ kə kɔ́ ŋwɔŋ-yʉə tʉ Nyii gwè tyúu Shitifɛ̄ŋ bɔŋleʼ gwía kwu-i shʉ́əshʉ́ə. 3 Sɔɔ kə́ bə́ʼ kwii-chɔshi, kə́ tòʼ fyú hə mu njaa sʉ́ʉ mu njaa, tòʼ yátə bəke ghɔŋbə bələŋ ndə bɔ̂ŋ nɔʼ bɛ́ŋ Nyii, dùutə bɔŋ gɛ̀ fʉ̀əŋ mu njaa-chaŋ.

Fili lɔ̀ʼ ŋgieNyiikə mu Samalia

4 Bɔŋ bʉə ndə bɔ̂ŋ nɔʼ kə bɛ́ŋ Nyii mu Jɛlosalɛŋ nyʉ́ʉ wɔ̀ʼnə gɛ̀ bəyəŋbəyəŋ, gɛ̀ kə́ lɔ̀ʼ ntəŋjyujyu te Jiso. 5 Fili shíʼ gɛ̀ mu Samalia ndə bɛ yəŋkwɛʼtəŋkə gɛ̀ lɔ̀ʼ ntəŋjyujyu te Jiso mbɔ ɔ la bɛ mbʉ Wo ndə Nyii Kùŋ Tə́ŋ. 6 Bʉə buŋmbi kɛŋ ŋɔ́ʼhə tyunəbə-ʉə ndə məyʉ́ nukə ndə Fili kə́ gìe bʉʼka bɔ̂ŋ kə yʉ́ fɔŋ-bəcheʼ ndə ɔ kə kə́ chìi bɔŋleʼ nyíɛ nə shʉ-yʉə. 7 Lyʉʉhəbʉəbʉəbə buŋmbi kə́ tíitə ndə bə tʉʼ fyúhə bɔŋ mu mbʉə-bʉə-hə ndə bɔ̂ŋ nɔʼ kə ŋíi chɔ. Bʉə buŋmbi ndə bɔ̂ŋ nɔʼ kə kwú kəviakəmɔʼ ghɔŋbə bìbə ndə bɔ̂ŋ nɔʼ kə lɛ́ŋ, kie nchʉʼ. 8 Ndʉʉmɛ, tʉʉjyu yɔ́ŋyɔ́ŋ wɔ̀ʼnə mu mbʉ kəyəŋkwɛʼtəŋ.

9 Wobɛʼ ndə bə kə́ tíi ɔ nə Samu, nɔ nə bɛ wo fʉ́ʉ fê ndə ŋgʉʼhə buŋmbi mu kəyəŋkwɛʼtəŋ-ghɔ̄, kə́ chíe chu bʉə-Samalia dʉ̀ʼ ŋwɔŋ-ɛŋ ndə məbɛ wo shʉ́əshʉ́ə. 10 Bʉə bənchəŋ, vâaŋgwehə ghɔŋbə vâa-fɔŋ kə́ ghɔ̀ŋ mbɔ, "Wo-ɔ̄ nɔ bɛ mbʉ kəghʉəʼ Nyii, mbʉ Fɔŋ-kəGhʉəʼ." 11 Bɔ̂ŋ nɔ kɛŋ kə́ yʉ́ haʼ kəghɔ-ɔ bʉʼka lʉ̀ hə ŋgʉʼŋgʉʼhə ɔ nɔʼ kə chíe chu-yʉə nə fʉbə-i ndə ɔ kə́ chìi. 12 Bɔŋ nuɔ-bʉə-buŋmbi bɛ́ŋ ntəŋjyujyu ndə Fili kə́ lɔ̀ʼ te Sɔ́ʼ-Nyii bɔŋleʼ te yie-Jiso Klai. Bʉʼka yɔ̄ŋ-yə, bəke ghɔŋbə bələŋ buŋmbi fí muu. 13 Buŋ Samu ghɔ nə mbəŋ-ɛŋ bɛ́ŋ Nyii ghɔ fí muu, kə́ tòʼ ghɔŋ Fili mɔʼɔ gɛ̀ bəyəŋbəyəŋ. Ɔ kʉ̂ʉ nyíɛ nubəcheʼbə ghɔŋ nufinəkwɛʼtəŋbə ndə Fili kə́ chìi, i chíe chu-i.

14 Ndʉʉ ndə bəlɔntəŋNyii ndə bɔ̂ŋ kə káa Jɛlosalɛŋ, yʉ́ mbɔ bʉə-Samalia la nɔʼ bɛ́ŋ ŋgieNyiikə, bɔ̂ŋ tə́ŋ Bita ghɔŋ Jɔŋ kɔ́ chɔ. 15 Ndʉʉ ndə bɔ̂ŋ tuŋ dàa chɔ, bɔ̂ŋ gháaNyii tʉ mbʉ bʉə fefe ndə bɔ̂ŋ kə bɛ́ŋ Nyii mbɔ bɔ̂ŋ kie LyʉʉhəNyiikə. 16 LyʉʉhəNyiikə chʉʼ kə shíʼ ndəŋ wo hə mu bɔŋ fɛ, bʉʼka bɔ̂ŋ nɔ nə fí muu bə haʼ yie-Jiso Tiekətʉ. 17 Ndʉʉmɛ, Bita ghɔŋ Jɔŋ mɔ̀ʼ ghɔbə-ʉə ndəŋ bʉə-bɔ̄ŋ ndə bɔ̂ŋ nɔʼ kə bɛ́ŋ Nyii nɔ, bɔ̂ŋ kie LyʉʉhəNyiikə.

18 Ndʉʉ ndə Samu kə nyíɛ ndə mbʉ bəlɔntəŋNyii mɔ̀ʼ ghɔbə-ʉə ndəŋ mbʉ bʉə, bɔ̂ŋ kie LyʉʉhəNyiikə, ɔ fyúhə kyʉə ndə mənyúɔ ghʉəʼkə-ɔ̄ŋ chɔ. 19 Ghɔ̀ŋ mbɔ, "Fɛ̀ŋ ghʉəʼkə-ɔ̄ŋ tʉ mɔ ghɔ, mbɔ mɔ chʉʼ kə́ mɔ̀ʼ ghɔkə-ɔŋ ndəŋ wo nɔ, ɔ leʼ kie LyʉʉhəNyiikə ghɔ!"

20 Bɔŋ Bita bə̀ŋhə mbɔ, "Kwú bɛ́ biibə kyʉə-a-ghɔ̄ ndə a kwɔ̀ʼtə mbɔ bəkɔ bə fɛ̀ŋ LyʉʉhəNyiikə ndə kyʉə nɔ. 21 A kie nukə ndəŋ yɔ̄ŋ-yə fɛ, bʉʼka fyii-a bɛ ndyʉndyʉ tʉ Nyii fɛ. 22 Shìe liɛŋ-aŋ hə ndəŋ fia-bʉəbʉə-tə-ɔ̄ŋ, gwía tʉ Tiekətʉ, ndʉʉbɛʼ ɔ sʉ̀fyii-i hə ndəŋ ŋkwɔʼtə-bʉəbʉə-a, 23 bʉʼka mɔ nɔ nyíɛ kechʉʼ fyii-a ilə́ŋnə, a bɔŋleʼ kə́ bɛ fʉə mu bʉ̂ʼʉ."

24 Samu gwùʼtə ghɔ̀ŋ mbɔ, "B̈ii gwía tʉ Tiekətʉ mbɔ ntɛ-kənu-bʉəbʉə-ɔ̄ mə fyú chíe mɔ fɛ!"

25 Ndʉʉ ndə Bita ghɔŋ Jɔŋ kə fʉ̀ʼtə nubə ndə bɔ̂ŋ kə kínə te Jiso bɔŋleʼ lɔ̀ʼ ŋgie-Tiekətʉ-kə mu Samalia liʼ, bɔ̂ŋ bʉ̀nə gɛ̀ Jɛlosalɛŋ. Ndə bɔ̂ŋ tʉʼ bʉ̀nə, bɔ̂ŋ tə́nə mu lɔʼ-bətə̂ŋ-tə mu Samalia buŋmbi ndə məlɔ̀ʼ ntəŋjyujyu-ɔ̄.

Fili ghɔŋ wokwɛʼtəŋ-Itobia ndə bə nɔʼ yɔ́ʼhə ɔŋ

26 WontəŋTiekətʉ ghɔ̀ŋ tʉ Fili mbɔ, "Lɔ̀ hə sê shíʼ gɛ̀ byûumbɔŋ fia kwɔŋkəyəŋnə ndə i tíŋ hə Jɛlosalɛŋ gɛ̀ Gasa." 27 Ndʉʉmɛ, Fili lɔ̀ hə sê gɛ̀. Ndə ɔ tʉʼ gɛ̀, ɔ bìatə wokwɛʼtəŋ-Itobia sêfia ndə ɔ lɔ̀ hə Jɛlosalɛŋ ndə mələ̀ʼtə Nyii. Ɔ nɔ kə bɛ wo ndə bə nɔʼ yɔ́ʼhə ɔŋ bɔŋleʼ kə́ bɛ vaafɔ̀ʼ-Wontoʼ-Itobia ndə ɔ nə kə́ lə̀ŋ kyʉə-ɛ. 28 Ɔ kə́ bɛ fia bʉ̀nə chunjaa, kə́ dùʼ mu matu ndə b̃ənyaa-bəkatə dùu, kə́ tíi ŋwɔʼnə ndə Adaya yʉkəŋgieNyii kə nyɔ̀ʼ.

29 LyʉʉhəNyiikə ghɔ̀ŋ tʉ Fili mbɔ, "Kwɛ̀ʼtə gɛ̀ kə́ tòʼ hə mbʉə mbʉ matu."

30 Fili nyʉ́ʉ gɛ̀ mbʉə ɔ, yʉ́ ɔ kə́ tíi ŋwɔʼnə-Adaya yʉkəŋgieNyii. Ndʉʉmɛ, ɔ bíʼtə tʉ ɔŋ mbɔ, "A tʉʼ tíi nɔ bɔŋ-kə́-leʼ kínə nu-ghɔ̄-kə mɛ?"

31 Mbʉ wo-ghɔ̄ bə̀ŋhə mbɔ, "Mɔ bu kínə ntɛ təka təmə wo bɛ ghɔ ndə məfʉ̀ʼtə tʉ mɔ fɛ?" Ɔ fʉ̀ʉtə Fili mbɔ ɔ̈ kóʼ mu mbʉ matu dùʼ ghɔŋ ɔŋ mɔʼɔ. 32 Mbʉ kəyəŋ ndə ɔ kə́ tíi mu ŋwɔʼnə-Nyii nɔ bɛ mbɔ,

"Ɔ nɔ nə bɛ ndə binjyʉʉ ndə bə kə́ gɛ̀ síi ɔ.

Kə́ bɛ ndə vaa-binjyʉʉ ndə bə tʉʼ shyìi nyuhə-i,

ɔ líitə mbɔ loʼo, təmə ŋɔ́ʼhə chu-i fɛ.

33 Bə jɛ́ŋhə ɔŋ təmə wo bɛ ghɔ ndə məkwɛ̀ ŋkwɛ-ɛ jyujyu fɛ.

Bɛ nda kəlɔŋ-ɔŋ ndə ɔ bu nə shi fʉ̀ʼtə,

bʉʼka bə nɔ chʉ̀ə məchimbi-i hə kəwʉʉnəmbi."*8:33 Adaya 53:7-8.

34 Mbʉ woyɔ́ʼhə bíʼtə tʉ Fili mbɔ, "Mbʉ yʉkəŋgieNyii kə́ kwə́ʼ te mbəŋ-ɛŋ mɛ kə wokədɔŋ?" 35 Ndʉʉmɛ, Fili chʉ́ʉhə nə mbʉ kəyəŋ-ghɔ̄ ndə məfʉ̀ʼtə bìʼ ibɛʼ-yə ŋgiebə chɔ ndə məshyíi ɔ nə ntəŋjyujyu te Jiso.

36 Ndə bɔ̂ŋ kə́ gɛ̀, bɔ̂ŋ gɛ̀ nyíɛ muubɛʼmə, mbʉ woyɔ́ʼhə gìe tʉ ɔŋ mbɔ, "Nyíɛ! Muu nɔ, bu chìi ka təmə mɔ fí muu fɛ?" 37 [Fili ghɔ̀ŋ mbɔ, "Bəkɔ a fí, kaʼ a bɛ́ŋ Nyii nə fyii-a inchəŋ." Mbʉ wo-ghɔ̄ bə̀ŋhə mbɔ, "Mɔ nɔ bɛ́ŋ mbɔ Jiso nɔ bɛ VaaNyii."] 38 Ndʉʉmɛ, Fili téʼ mbʉ matu tə́nə, bɔ̂ŋ shíʼ mu mbʉ muu, ɔ fí muu hə kəghɔ-Fili.

39 Ndʉʉ ndə bɔ̂ŋ kóʼ hə mbʉ mu muu, LyʉʉhəTiekətʉkə jɔ̀ Fili gɛ̀ nə nɔŋ. Təmə mbʉ woyɔ́ʼhə leʼ nyíɛ ɔŋ fɛ, ɔ bɔŋ gɛ̀ tʉʉ-i kə́ tòʼ bʉ̀ʉ. 40 Bɔŋ Fili nyíɛ ŋwɔŋ-ɛŋ mu kəyəŋkwɛʼtəŋbɛʼ ndə bə kə́ tíi nə Asuto. Fili kə́ lɔ̀ʼ ntəŋjyujyu chɔ leʼnə mu-bəyəŋkwɛʼtəŋ-hə ndə ɔ tíŋ sêfia tə gɛ̀ dàa Kasalia.