Mateus 2

Smat ta rpandena dem ototafca ningale si rlafo bo rcuba Yesus

1 Yesuse ntub mali Betlehem batang Yudea, oras cia Herodese ndadi kolano pulina. Oras cia, smat sifis ta rpande dem ototafca ningale, si rlafo polao malei rfan lali bendar isa ngahnyo Yerusalem. 2 Si rfautno smat ta puli nana, "Manca e, smat Yahudina riri kolano ta ntub poca? Ningalena, amame kem ototaf isa polao ta ndadi fafayal i ntube to. Gabe tane amame klafo bo ksuba I."

3 Rlonga si du en kolano ta po Ica, kolano Herodese wlona kangela, laina bena re smat ta en mali bendar Yerusalemna. 4 Gabe, kolano Herodese ncula rfayalo smat Yahudina riri imam ta rfaboboko sina fare guru agama Yahudi ta rto Musa ni kitab silim tasa. Taga nfautno si, "Co fabinga ya, i manca Mesias, Kolano ta Jou Lahatalla njaji cia osta ntub?"

5 Si rcanglo, "I bo ntub mali Betlehem, mali batang Yudea, ningalena tantuba mali be, Jou Lahatalla nua ni nabina, ga tina rlefo mali Jou ni Kitabca laitane,

6 ‘Mewe smat Betlehem mali batang Yudea.

Biarega nimew bendarca nena, ga osta ndadi bendar ta nfoloi mali farumi bendar ta en mali Yehudana.

Ningalena mali nimew bendar cia osta en smat isa ta bo nfaboboko Ya nik smatna, smat Israelna, laisa smat ta rjaga riri dombana.’ "

7 Nlonga tina, kolano Herodese n’gogan i, taga nololaw smat ta rpande tasa dem ototaf cia. Fare nfautno si, bo nto molang popise i si dem ototaf cia ncapangna. 8 Fola tina, i ncula si rfan lali Betlehem. I nua si, "Mewe ffane to lali Betlehem, fare fningo I famafia Wai cia. Gabe laisa fduk i to, flolai mali fabinga bo ya ma ifan lali bena isuba I."

9 Rlonga kolano Herodese nu fola tina, si ma rfan. Oras si rfanna, si rgaranyanna ototaf ta si demi bahnga to polao malica nfane ntuba mali sili fare nfola mali gagaw ta Wai cia ntubna. 10 Oras ta si dem ototaf cia, si rcangnangna gaole. 11 Gabe oras ta si rcung namul ebaica, si dem wai cia i re hnye, Maria. Fare si rcuba Wai cia. Si rcalawe riri arata gagaona taga rcapnga okosesi ta mulona mamagal bo doce Wai cia. Okosesi ta si rpona: guraci, kemenyan fare egat mur ta pauna mafia.

12 Fola tina, Jou Lahatalla nfaem mahngel lali smat ta rpandena bo dem ototaf cia. Jou Lahatalla nua si bo mati rlolai lali kolano Herodes i na to. Gabe si duwe lali si riri batangna rderera lalinge nesa.