ይሁዳ ካትያ አካዛ
(2 ኦዱዋ 28:1-27)
1 ራማልያ ናአይ ፓቁህ ካተቴዳ ታማነ ላፑን ላይን፥ እዮኣታማ ናአይ አካዝ ይሁዳን ካተቴዳ። 2 እ ካተትያ ዎደ ላይይ አዉ ላታማ፤ የሩሳላመን እ ታማነ ኡሱፑን ላይ ካተቴዳ። አ ማይዛ አዉ ዳዊተ ሱረባ ኦዳዋዳን፥ መና ጎዳ ባረ ጾሳ ስንን እ ሱረባ ኦቤና። 3 እ ካሰ ደኤዳ እስራኤልያ ካተቱዋ ኦግያን ሀመቴዳ። ቃይ መና ጎዳይ እስራኤልያ አሳ ስንፐ ላጊደ ከሴዳ አሳቱ ደኡዋ ዎጋ፥ ሄ ሸነይያዋ ቁሊደ፥ ባረ የሌዳ ናኣ አዳ ታማን ጹጊደ፥ ኤቃዉ ያርሼዳ።16:3 ዛረ. 12:31 4 አካዝ አሳይ ጎይንያ ቃ ድራዉነ፥ ደረቱዋ ሁጲያንነ ዳሻ ም ኡባ ጋርሳን ያርሹዋ ያርሼዳነ እጻና ጩዋዬዳ።
5 ሄዋፐ ጉይያን፥ ሶርያ ካቲ ራጺንነ ራማልያ ናአይ፥ እስራኤልያ ካቲ ፓቁህ የሩሳላመ ኦላናዉ ዪደ ዶዴድኖ፤ ሽን አካዛ ጾናናዉ ዳንዳይበይክኖ። 6 ሄ ዎደ ሶርያ ካቲ ራጺን ኤላታ ግያ ካታማ ዛሪደ አኪደ፥ ይሁዳ አሳ ላጊደ ከሴዳ። ያትና ኤዶማ አሳቱ ኤላታ ካታማ ዪደ፥ ሀቼ ጋካናዉ ያን ደኢኖ።
7 ሄዋ ድራዉ፥ አካዝ አሶረ ካትያ ትግላት-ፓለሴራዉ ኪታ የዲደ፥ "ታን ነ ናኣነ ነ ቆማ። ሀያና ሃያ፤ ታና ኦልያ ሶርያ ካትያ ኩሽያፐነ እስራኤልያ ካትያ ኩሽያፐ ታና አሻ" ያጌዳ። 8 ቃይ አካዝ መና ጎዳ ጌሻ ጎልያንነ ካትያ ጎልያ ሚሻ ምንጅያሳን ደእያ ብራነ ዎርቃ አኪደ፥ አሶረ ካትያዉ እሞ ኦደ የዴዳ። 9 አካዝ ጌዳዋ አሶረ ካቲ ማዪደ፥ ዳማስቆ ካታማ ኦለቲደ ኦይቄዳ። አሳ ኦሞዲደ፥ ቂራ ግያ ሳኣ አፌዳ፤ ካትያ ራጺናካ ዎዳ።
10 ሄዋፐ ጉይያን፥ ካቲ አካዝ አሶረ ካትያ ትግላት-ፓለሴራና ጋከታናዉ ዳማስቆ ቤዳ። ዳማስቆን ደእያ ያርሽያ ሳኣ በኢደ አ ማላትያ ያርሽያ ሳኣ ኬጻና ማላ፥ ሄ ያርሽያ ሳኣ ምስልያነ ኬጽያ ሀኖታ ቄስያ ኦርዮናዉ ኪቴዳ። 11 ሄዋ ድራዉ፥ ካቲ አካዝ ዳማስቆፐ ስሚደ ያናዉ፥ ቄስያ ኦርዮን ሄ ሌምሱዋ ማላትያ ያርሽያ ሳኣ ጊግሴዳ።
12 ካቲ ዳማስቆፐ ስሜዳ ዎደ፥ ያርሽያ ሳአይ ኦሰቲደ ፖለቴዳዋ በእ ያርሽያ ሳኮ ሺቂደ፥ 13 ባረ ጹግያ ያርሹዋነ ባረ ካ ያርሹዋ ያርሼዳ። ቃይ ባረ ኡሻ ያርሹዋ ጉሴዳ፤ ባረ እትፐተ ያርሹዋ ሱካ ያርሽያ ሳኣ ቦላ ጫጫፌዳ። 14 ናሃስያ ግያ ብራታፐ ኦደ፥ መና ጎዳዉ ዱማይ ዎዳ ያርሽያ ሳአይ ኦራ ያርሽያ ሳፐነ ጌሻ ጎልያፐ ግዱዋን ደኤ። ያትና አካዝ ሄ ኤጫ ያርሽያ ሳኣ ደንደ፥ ባረ ኦስሴዳ ኦራ ያርሽያ ሳፐ ሁጲሳ ባጋና ዎዳ።16:14 ከሳ 27:1-2፤ 2 ኦዱዋ 4:1
15 ሄዋፐ ጉይያን፥ ካቲ አካዝ ቄስያ ኦርዮና ሀዋዳን ያጊደ አዛዜዳ፤ "ሀ ዎጋ ኦራ ያርሽያ ሳኣ ዎንታ ጹግያ ያርሹዋ፥ ኦማርስ ሺሽያ ካ ያርሹዋ፥ ካቲ ሺሽያ ጹግያ ያርሹዋነ ካ ያርሹዋ፥ አሳይ ኡባይ ሺሽያ ጹግያ ያርሹዋ፥ ኡንቱንታ ካ ያርሹዋነ ኡንቱንታ ኡሻ ያርሹዋ ያርሽያ ሳኣ ኦ። የንኮ ናሃስያፐ መቴዳ ያርሽያ ሳኣ ታን ታዉ ኦችያ ሳኣ ከሳና" ያጌዳ። 16 ቄስያ ኦርዮን ካቲ አካዝ አዛዜዳዋዳን መዳ።
17 ካቲ አካዝ ጌሻ ጎልያ ግዶን ጎኤትያ፥ ናሃስያ ብራታፐ መቴዳ ጋረቱዋ ሎቻ ብራታ ቃንጺደ፥ ምይያፐ ድጊደ ሜጨትያ ከረቱዋ ጋረቱዋ ቦላፐ ደንዳ። ቃይ አባ ሳኒያ፥ አ ዘምፕሴዳ ናሃስያ ቦራቱዋ ምስለቱዋ ቦላፐ ደንደ፥ ሹቻ ባሱዋ ቦላ ዎዳ።16:17 1 ካታ. 7:23-39፤ 2 ኦዱዋ 4:2-6 18 አሶረ ካትያ ድራዉ፥ አካዝ ባረ ካዉተ አራታ ካሰ ዎያ ሳፐ ድጌዳ። ቃይ አፐ ካሰ ደኤዳ ካተቱዋ መና ጎዳ ጌሻ ጎልያ ገልያ ፐንግያ ጎርዴዳ።
19 ካቲ አካዝ ሀኔዳ ሀራባይነ እ ኦዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ። 20 አካዝ ሀይቂደ፥ ባረ ማይዛን ጋከቴዳ፤ ዳዊታ ካታማን ባረ ማይዛ አዎቱዋና ሞገቴዳ። አ ኮታን አ ናአይ ህዝቂያሰ ካተቴዳ።16:20 ኢሳ. 14:28