ጾሳይ ኤላሳ ሳሉዋ አፌዳ
1 መና ጎዳይ ኤላሳ ጎትያን ሳሉዋ አፋናዉ ሀንያ ዎደ፥ ኤላስነ ኤልሳእ ገልጋላፐ ደንዲደ ቤድኖ። 2 ኤላስ ኤልሳአ፥ "መና ጎዳይ ታና ቤቴለ ካታማ ኪቴዳ ድራዉ፥ ሀያና ኔን ሀዋን ታካሻ" ያጌዳ።
ሽን ኤልሳእ፥ "መና ጎዳይ ኤሮ! ነ ሸምፑ ኤሮ! ታን ኔፐ ሻከትከ" ያጌዳ። ኡንቱንቱካ ዱገ ቤቴለ ዎድኖ።
3 ቤቴለን ደእያ ትምቢትያ ኦድያዋንቱ ጭታይ ኤልሳአኮ ከሲደ፥ "መና ጎዳይ ሀቼ ነ ጎዳ ኔፐ ሻክ አፋናዋ ኔን ኤራይ?" ያጊደ ኦቼድኖ።
ኤልሳእ፥ "ኤ ኤራይ። ሽን ህንተንቱ ጮኡ ጊተ" ያጊደ ዛሬዳ።
4 ሄዋፐ ጉይያን፥ ኤላስ ኤልሳአ፥ "መና ጎዳይ ታና ያርኮ ኪቴዳ ድራዉ፥ ሀያና ኔን ሀዋን ታካሻ" ያጌዳ።
ሽን ኤልሳእ፥ "መና ጎዳይ ኤሮ! ነ ሸምፑ ኤሮ! ታን ኔፐ ሻከትከ" ያጊደ ዛሬዳ። ሄዋ ድራዉ፥ ኡንቱንቱ ያርኮ ቤድኖ።
5 ያርኮን ደእያ ትምቢትያ ኦድያዋንቱ ጭታይ ኤልሳአኮ ከሲደ፥ "መና ጎዳይ ሀቼ ነ ጎዳ ኔፐ ሻክ አፋናዋ ኔን ኤራይ?" ያጊደ ኦቼድኖ።
እ፥ "ኤ ኤራይ። ሽን ህንተንቱ ጮኡ ጊተ" ያጊደ ዛሬዳ።
6 ሄዋፐ ጉይያን፥ ኤላስ ኤልሳአ፥ "መና ጎዳይ ታና ዮርዳኖሳ ሻፋ ኪቴዳ ድራዉ፥ ሀያና ኔን ሀዋን ታካሻ" ያጌዳ።
ኤልሳእ፥ "መና ጎዳይ ኤሮ! ነ ሸምፑ ኤሮ! ታን ኔፐ ሻከትከ" ያጌዳ። ኡንቱንቱ ላአቱካ እትፐ ቤድኖ።
7 ትምቢትያ ኦድያዋንቱፐ እሻታሙ አሳቱ ኡንቱንታ ካሊደ፥ ዮርዳኖሳ ሻፋ ጋካናዉ ቤድኖ። ኤላስነ ኤልሳእ ሻፋ ዶናን ኤቂደእሽን፥ ትምቢትያ ኦድያዋንቱ ኡንቱንቱፐ ላፋ ሃኪደ ኤቄድኖ። 8 ሄ ዎደ ኤላስ ባረ ካባ አኪደ ጻጺደ፥ አን ሃ ሾጬዳ። ሃይ ያነ ሃነ ሻከቴዳ፤ መላ ቢታ የደ ፕኔድኖ። 9 ኤላስ ኤልሳአ፥ "ታን ኔፐ አከታክቻናፐ ካሰታደ፥ ነዉ አያ ኦና ማላ ኮያይ? አነ ኦዳ" ያጌዳ።2:9 ዛረ. 21:17
ኤልሳእ፥ "ታን ኔና ኮችያ ዎደ፥ ነ አያናይ ታዉ ላኡ ዳኩዋ ግዳና ማላ፥ ታን ኔና ዎሳይ" ያጊደ ዛሬዳ።
10 ኤልሳአ፥ "ኔን መትያ ኦሻ ኦቻዳ። ሽን ታን ኔፐ ሻከታ ሳሉዋ ብያ ዎደ ኔን ታና ጼልያዋ ግዶፐ፥ ሄዌ ነዉ ሀናና። ሄዌ ዮፐ ሀነና" ያጌዳ።
11 ሄዋፐ ጉይያን፥ ኡንቱንቱ እትፐ ሃሳዪድ ሀመትሽን፥ ታማ ፓራቱነ ኡንቱንቱ ጎችያ ታማ ጋሪ አኬከናን ፑቱ ጊደ፥ ኡንቱንቱ ላኡዋፐ ግዱዋን ገሊደ፥ ሻኬዳ። ኤላስ ጎትያን ሳሉዋ ከሴዳ። 12 ኤልሳእ ሄዋ በኢደ፥ "ታ አዎ፥ ታ አዎ! ኔን እስራኤልያ አሳዉ ዎልቃነ ጎንዳለ ሽን!" ያጊደ ዋሴዳ። ሄዋፐ ስሚደ፥ እ ኤላሳ ኡባካ በእቤና።2:12 2 ካታ. 13:14
ኤልሳእ ሄዋን ካዮቲደ፥ ባረ ማዩዋ ላኡ ከሲደ፥ ፖሽ ኦሌዳ። 13 ያቲደ ኤላሳፐ ዎዳ ካባ እ ደንደ፥ ጉየ ስሜዳ፤ ዮርዳኖሳ ሻፋ ዶናን ኤቄዳ። 14 ኤላሳፐ ዎዳ ካባ አኪደ፥ ሃ አን ሾጪደ፥ "መና ጎዳይ ኤላሳ ጾሳይ ሀቃን ደኢ?" ያጌዳ። ኤልሳእ ሃ ሾጬዳ ዎደ፥ ሃይ ያነ ሃነ ሻከቴዳ፤ ሻፋ ፕኔዳ።
15 ያርኮፐ ዬዳ ትምቢትያ ኦድያዋንቱ ጭታይ ኤልሳአ በኤዳ ዎደ፥ "ኤላሳ አያናይ ኤልሳአ ቦላ ሸምፔዳ" ያጌድኖ። ኡንቱንቱ አናና ጋከታናዉ ዪደ፥ አ ስንን ሳኣን ጉፋኔድኖ። 16 ያቲደ ኡንቱንቱ አ፥ "በአ፥ ኑን ነ ቆማቱ እሻታሙ ምኖ አሳቱ ሀዋን ደኤቶ። ሀያና ኑን ነ ጎዳ ኮያናዉ ባና። ኦን ኤሪ፥ መና ጎዳ አያናይ አ አኪደ፥ እት ደርያ ሁጲያን ዎይ ዛንጋራ ግዶን የጌደንቶነ" ያጌድኖ።
ኤልሳእ፥ "ሀነና፥ ቦፕተ!" ያጌዳ።
17 ሽን እጻድ ጋናዌ አ ዬላያና ጋካናዉ፥ ኡንቱንቱ አ ዎሲደ አገናን እጽና፥ "ቢተ" ያጌዳ። ኡንቱንቱ እሻታሙ ቤድኖ። ሄዙ ጋላሳ ኮዪደ፥ አ ደምቤይክኖ። 18 ኤልሳእ ያርኮን ታክ ደእሽን፥ ኡንቱንቱ አኮ ስሚደ ዪና፥ "ዎን ታን ህንተንታ ‘ቦፕተ’ ያጋበይክታ?" ያጌዳ።
ኤልሳእ ኦዳ ማላልስያባቱዋ
19 ሄዋፐ ጉይያን፥ ያርኮ ካታማን ደእያ አሳቱ ኤልሳአ፥ "ኔን ኑ ጎዳይ በእያዋዳን ሀ ካታማይ ደእያ ሳአይ ሎአ። ሽን ሃይ ኢታ፤ ቃይ ቢታይካ አይፈና" ያጌድኖ።
20 እ ኡንቱንታ፥ "አነ ኦራ ከርያን ማጽንያ ቆሊደ፥ ታዉ አኪደ ዪተ" ያጊደ አዛዜዳ፤ አዉ አሄድኖ። 21 ኤልሳእ ፑልትያ ቢደ፥ ማጽንያ አን የጊደ፥ "መና ጎዳይ፥ ‘ታን ሀ ሃ ፓድ፤ ሀዋፐ ስንናዉ ሀ ሃይ ሀይቁዋስ ጋሶ ግደና፤ ቢታይካ አይፋናዋ’ ያጌ" ያጌዳ። 22 ኤልሳእ ሃሳዬዳዋዳንካ ሀቼ ጋካናዉ፥ ሄ ሃይ ጽሎ ግዴዳ።
23 ኤልሳእ ያፐ ደንዲደ፥ ፑደ ቤቴለ ከሴዳ። እ ኦግያን ቢሽን፥ ያላጋ አቱማ ናናይ ካታማፐ ከሲደ፥ "ላ ሀ ሁጲያና ቦአዉ፥ ፑደ ከሳ! ላ ሀ ሁጲያና ቦአዉ፥ ፑደ ከሳ!" ያጊደ አ ቦላ ቅሊጬድኖ።
24 ጉየ ስም ጼሊደ፥ ኡንቱንታ መና ጎዳ ሱንን ሸቄዳ። ያትና ባባን ጌተትያ ላኡ ማጫ ዶአቱ ዎራፐ ከሲደ፥ ናናቱዋፐ ኦይታማነ ላኡ ያላጋቱዋ ፑዘረደ ዎድኖ። 25 ኤልሳእ ሄዋፐ ደንዲደ፥ ቃርመሎሳ ደርያ ቤዳ፤ ቃይ ሄዋፐካ ሳማርያ ስሜዳ።