ኢዮባ 34

1 ቃይካ ኤልሁ ሀዋዳን ያጌዳ፥ 2 "ህንተኖ፥ አዳ ኤራንቻቶ፥ ታን ሃሳይያ ሃሳያ ስስተ። ህንተኖ፥ ኤራንቻቶ፥ ህንተ ሀይ ታኮ የግተ። 3 እንጻርሳይ ቁማ ማልኡዋ ኤርያዋዳን፥✝34:3 ኢዮባ 12:11 ሀይይካ የዉዋ ሻኪደ ኤሬ። 4 አነ ኑን ልከባነ ሎኦባ ሻኪደ ኤሮይተ።

5 "ኢዮብ፥ ‘ታን ጽሉዋ፤ ሽን ጾሳይ ታ ሱረ ፕርዳ ታና ድጌዳ። 6 ታን ልከ ግዳደ፥ ዎርዳንቻዳን ፓይደታድ። ታናን ባይዙ ባይናንካ፥ እ ታና ፓጸናዳን ማዱዳ’ ያጌዳ።

7 "ጾሳ ቦላ እዮበዋዳን ቅሊጭያ አሳይ ደኢ? 8 እ ኢታባ ኦያዋንቱና ዙፐቴ፤ ናጋራንቻቱዋናካ ሀመቴ። 9 አያዉ ጎፐ፥ እ፥ ‘አሳይ ጾሳ ናሸቻና ጊደ ኦያዌ አይነ ማደና’ ያጌ።

10 "ሄዋ ድራዉ፥ ህንተኖ፥ አኬካንቻ አሳቶ፥ ታን ኦድያዋ አነ ስስተ! ኡባ ዳንዳይያ ጾሳይ ኢታባ ሙለካ ኦና። 11 ጾሳይ አሳዉ አ ኦሱዋዳን እሜ፤ አ ኦግያዳን አዉ ጭጌ።✝34:11 ማዝ. 62:12 12 ጾሳይ ቱሙዋፐ ኢታባ ኦና፤ ኡባ ዳንዳይያ ጾሳይ ሱረ ፕርዳ ጌላየና። 13 ሳኣ ቦላን ጾሳዉ ማታ እሜዳዌ ኦኔ? ቃይ ቢታ ኡባ ቦላ አ ሱንዳዌ ኦኔ? 14 ጾሳይ ባረ አያናነ ባረ ደኡዋ ሸምፑዋ ባረኮ ዛሪደ አክንቶ፥ 15 አሹዋ ማዬዳ ኡባይ እትፐ ያና፤ አሳይ ቢታዉ ዱገ ስማና።

16 "ህንተ አኬካንቻ ግዶፐ፥ ሀዋ ስስተ፤ ታ ሃሳይያዋካ ሀይዝተ። 17 ሱረ ፕርዳ እጽያዌ ቢታ ሞዳናዉ ዳንዳዪ? ያትና፥ ኔን ጽሉዋነ ዎልቃማ ግድያ ጾሳ ፕርዳይ? 18 ጾሳይ ካተቱዋ፥ ‘ህንተ ሹፉሮቱዋ’ ያጌ፤ ቃይ ቢታ ሞድያዋንታካ፥ ‘ህንተ ኢታ’ ያጌ። 19 ካፓቱዋ ሶምኡዋ ጼሊደ ማደና፤ ዱርያካ ማንቁዋፐ አደ ጼለና። አያዉ ጎፐ፥ ኡንቱንቱ ኡባይካ አ ኦሶቱዋ። 20 ኡንቱንቱ ሄካ ብላሄ አኬከናን ሀይቃና፤ አሳይ ኡባይካ ኮኮሪደ ያና፤ ዎልቃማቱካ አይ አሳ ኩሺነ ቦቼናን ክቻና።

21 "ጾሳይ አሳ ሄመታ ጼሌ፤ አ ታንጉዋ ኡባካ ዎቼ። 22 ኢታ ኦያዋንታ ጾሳፐ ገንናዉ ዳንዳይያ ጵ ጎ ም ባዋ። 23 ጾሳይ አሳ ቦላ ፕርዳናዉ፥ አሳይ አ ስን ሺቃናዳን ኬሩዋ እመና። 24 ዎልቃማቱዋ አይነ ኦቼናን መንሬ፤ ያቲደ ኡንቱንቱ ሳኣን ሀራቱዋ ዎ። 25 እ ኡንቱንቱ ኦሱዋ ኤርያ ድራዉ፥ ኡንቱንታ እት ቃማ ማታፐ ዎደ ይሴ። 26 ኡንቱንቱ ኢታተ ድራዉ፥ አሳይ ኡባይ በኢያሳን እ ኡንቱንታ ሙሬ። 27 ኡንቱንቱ አ ካለናን እጺደ፥ አ አዛዙዋካ አጌዳ ድራሳ። 28 ኡንቱንቱ ህዬሳቱዋ ኡቁኒደ፥ ኡንቱንቱ ጾሳኮ ዋሳናዳን ኦድኖ፤ እካ ህዬሳቱዋ ዋሱዋ ስሴዳ። 29 ጾሳይ ጮኡ ጎፐ፥ አ ፕርዳናዌ ኦኔ? እ ባረ ሶምኡዋ ዎራ ዛሮፐ፥ አሳ ማድያዌ ባዋ። እ አሳፐካ ጮራፐካ ዳራ። 30 ሄዋዳንካ፥ ጾሳዉ ያየና አሳቱ ሞደናዳንነ አሳስካ ግተ ግደናዳን፥ አሳይ ኡባይ ድጋናዉ ዳንዳየና።

31 "ኢዮባ፥ ነ ናጋራ ጾሳዉ ፓጻዲ? ቃይ ዛራደ ናጋራ ኦናዳን ገፓዲ? 32 ነ ባይዙዋ ነዉ ቆንጭሳና ማላ፥ ጾሳ ዎሳዲ? ስንናዉ ኢታ ኦሱዋ ኦናን አጋናዉ ኤኖ ጋዲ?

33 "ኔን ጾሳይ ኦያዋ እጻደ፥ ነ ጋቲ ኔን ዶስያዋዳን ሀናናዉ ኮያይ? ስም ቆፋ ቃቻናዌ ኔናፐ አትና፥ ታና ግድከ። ሄዋ ድራዉ፥ ኔን ቆፕያዋ ታዉ ኦዳ። 34 አኬካንቻ አሳቱ ታን ኦድያዋ ኤኖ ጊኖ፤ ታን ኦድያዋ ስስያ አዳ ኤራንቻቱካ ሀዋዳን ያጊኖ፤ 35 ‘እዮበ ኤራይ ፓጭና፥ ሀዋ ሃሳዬ፤ እ ሃሳይያዎ ብለይካ ባዋ’ ያጊኖ። 36 ኢዮብ ኢታ አሳቱዋዳን ዛሩዋ እሜዳ ድራዉ፥ ዉርሰ ጋካናዉ ፓጨቴዳ ግዴረኔሻ! 37 አያዉ ጎፐ፥ እ ባረ ናጋራ ቦላ ማካላ ጉጄ፤ ኑ ስንን ጾሳ ቅሊጬ። ባረ ቃላካ ዳርሲደ፥ ጾሳ ቦላ ብዴ" ያጌዳ።