Paulus sien ieeschta Breef aun de Korinta 6

Jleewende toom Jerecht nämen

1 Woacht sikj irjentwäa mank junt, wan hee eene Sach jäajen dän aundren haft, nom Jerecht to gonen ver de Onjerajchte un nich ver de Heilje? 2 Weet jie nich, daut de Heilje de Welt rechten woaren? Un wan de Welt saul von junt jerecht woaren, sent jie dan onwirdich, de jerinjste Dinja to rechten? 3 Weet jie nich, daut wie Enjel rechten woaren? Woo väl mea noch Dinja, waut to dit Läwen jehieren? 4 Wan jie nu Dinja von dit Läwen to rechten haben, dan sat jie soone doahan, dee en de Jemeent läajch-je-acht sent. 5 Ekj saj dit to june Schaund. Es doa kjeen Weisa mank junt? Es doa nich eena, dee doa kaun rechten tweschen siene Breeda?