Daut Wuat woat Fleesch
1 Em Aunfank wia daut Wuat, un daut Wuat wia bie Gott, un daut Wuat wia Gott. 2 Dit wia em Aunfank bie Gott. 3 Aules wort derch Am jemoakt, un onen Am es nuscht jemoakt, waut doa jemoakt es. 4 En Am wia daut Läwen, un daut Läwen wia daut Licht fa de Menschen. 5 Un daut Licht schient en de Diestanis, un de Diestanis haft daut nich venomen.
6 Doa wia een Mensch, von Gott jeschekjt, dee heet Johanes. 7 Disa kjeem toom Zeichnis, om von daut Licht to zeijen, daut see aula muchten derch Am jleewen. 8 Hee wia nich daut Licht, oba hee sull von daut Licht zeijen. 9 Daut wia daut woarhauftje Licht, daut aule Menschen Licht jeft, dee en dise Welt nenkomen. 10 Hee wia en de Welt, un de Welt wia derch Am jemoakt, un de Welt kjand Am nich. 11 Hee kjeem no daut Sienje; oba de Sienje neemen Am nich opp. 12 Oba soo väl aus Am oppneemen, to dee jeef Hee de Macht, Gott siene Kjinja to woaren, dee aun sienen Nomen jleewen; 13 dee nich vom Bloot uk nich vom Wellen vom Fleesch uk nich vom Wellen vom Maun, oba von Gott jebuaren sent. 14 Un daut Wuat wort Fleesch un wond mank ons, un wie sagen siene Harlichkjeit, eene Harlichkjeit soo aus von däm Eenjebuarnen vom Voda, voll Jnod un Woarheit.
15 Johanes zeijd von Am, roopt un säd: Disa wia dee, von däm ekj säd: Dee no mie kjemt, es ver mie jewast, wiels Hee wia ea aus ekj. 16 Un von siene Vollmot hab wie aula jenomen Jnod om Jnod. 17 Wiels daut Jesaz wort derch Moses jejäft; oba de Jnod un Woarheit es derch Jesus Christus jeworden. 18 Kjeena haft Gott jeemols jeseenen; de eenjebuarna Sän, dee en däm Voda siene Schoot es, dee haft Am jeopenboat.
Mat 3:1-12; Mrk 1:1-8; Luk 3:1-18