Jesus frajcht: Leefst du Mie?
15 Aus see ieescht jejäten hauden, sajcht Jesus to Simon Petrus: Simon, Jona sien Sän, leefst du Mie mea aus dise? Hee sajcht to Am: Jo, Har, Du weetst, daut ekj Die leew. Sajcht Hee to am: Weid miene Lama! 16 Hee sajcht wada toom tweedemol to am: Simon, Jona sien Sän, leefst du Mie? Hee auntwuad Am: Jo, Har, Du weetst, daut ekj Die leew. Sajcht Hee to am: Weid miene Schop! 17 Hee sajcht toom dreddemol to am: Simon, Jona sien Sän, leefst du Mie? Dan wort Petrus truarich, daut Hee toom dreddemol to am säd: Leefst du Mie? un säd to Am: Har, Du weetst aules; Du weetst, daut ekj Die leew. Jesus sajcht to am: Weid miene Schop! 18 Woarhauftich, woarhauftich, Ekj saj die: Aus du jinja wieescht, bungst du die selfst dän Gort om un jinjst han, wua du wust; wan du oba ieescht oolt sennen woascht, woascht du diene Henj utstrakjen, un een aundra woat die dän Gort ombinjen un hanbrinjen, wua du nich han west. 19 Dit säd Hee oba, om aun to dieden, derch waut fa een Doot hee Gott veharlichen wudd. Un aus Hee dit jesajcht haud, sajcht Hee to am: Folj Mie no.