Daut Jlikjnis vom rikjen Maun
13 Dan säd oba eena von ut de Volkjshäad to Am: Liera, saj mienem Brooda, daut hee met mie daut Oafgoot deelen saul. 14 Hee oba säd to am: Mensch, wäa haft Mie to eenem Rechta un Oafgoot Endeela äwa junt jesat? 15 Un Hee säd to äant, seet doano un heet junt fa de Habsucht, wiels kjeenem sien Läwen besteit, derch dän Äwafluss von waut hee haft.
16 Un Hee vetald äant een Jlikjnis un säd: Een jewessa rikja Maun sien Launt haud väl enjebrocht. 17 Un hee äwaläd bie sikj selfst un docht: Waut saul ekj doonen? Wiels ekj hab nich, wua ekj miene Frucht saumlen saul. 18 Un hee säd: Dit well ekj doonen: Ekj well miene Schienen dolbräakjen un jratre buen un well doa aul mien Jeträajd un miene Jieta toopsaumlen. 19 Un ekj well to miene Seel sajen: Seel, du hast väle Jieta fa väle Joaren; hab nu Ru, at, drinkj, un sie froo! 20 Oba Gott säd to am: Du Noa! Dise Nacht woat diene Seel von die jefoddat woaren; un fa wäm woat daut sennen, waut du reedjemoakt hast? 21 Soo jeit däm daut, dee fa sikj selfst Schaza saumelt un nich rikj es en Gott.
Vetruen, bäta aus Sorjen
Mat 6:25-34
22 Un Hee säd to siene Jinja: Doawäajen saj Ekj junt: Sorcht nich fa jun Läwen, waut jie äten sellen, uk nich fa junen Kjarpa, waut jie auntrakjen sellen. 23 Daut Läwen es mea aus daut Äten un de Kjarpa mea aus de Kjleedunk. 24 Beseet junt de Kraujen: dee seien nich un arnten nich, dee haben nich Komasch uk nich Schienen, un Gott näat dee doch. Woo väl mea wieet sent jie aus de Väajel? 25 Wäa von junt kaun siene Hecht derch Sorjen eene Ell biesaten? 26 Wan jie nu daut Jerinjste nich doonen kjennen, wuarom sorj jie dan fa daut Äwaje? 27 Beseet de Lelje, woo dee waussen; dee oabeiden nich, uk spennen dee nich. Ekj saj junt oba, daut uk Salomo en aul siene Harlichkjeit nich soo jekjleet wia aus eene von dise. 28 Wan oba Gott daut Graus, daut vondoag opp de Stap steit un morjen en dän Owen jeschmäten woat, soo kjleet; wooväl mea junt, Oo jie Kjliengloowsche! 29 Un jie, sorcht nich doaräwa, waut jie äten ooda waut jie drinkjen sellen, un räajcht junt nich opp; 30 wiels no soont aules sieekjen de Heiden von dise Welt; oba jun Voda weet, daut jie daut brucken. 31 Oba tracht no Gott sien Rikj, un aul dise Dinja woaren junt biejelajcht woaren.
Een Schauz em Himmel
Mat 6:19-21
32 Fercht die nich, du kjliene Häad; wiels daut haft junem Voda goot jefollen, junt daut Rikj to jäwen. 33 Vekjeept jun Hab-un-Goot un jäft Aulmoosen; moakt junt Jelttauschen, dee nich oolt woaren, een Schauz em Himmel, dee nich vejeit, wua kjeen Stäla dichtbie kjemt un de Motten daut nich vedoawen. 34 Wiels wua jun Schauz es, doa woat uk jun Hoat sennen.