Evangelium Lukas 8

Jairus siene Dochta un de kranke Fru

40 Un daut passieed, aus Jesus trigjkjeem, neem Am daut Volkj freidich opp, wiels see luaden aula no Am. 41 Un kjikj, doa kjeem een Maun met Nomen Jairus, dee wia een Synagogen-Väastona, un hee foll Jesus ver de Feet un prachad Am, en sien Hus nenn to komen; 42 wiels hee haud eene eensje Dochta, soo bie twalw Joa, un dise lieech aum Stoawen. Un aus Hee hanjinkj, drenjden Am de Volkjshäaden. 43 Un eene Fru, dee aul twalw Joa met eenem Blootfluss wia, dee aul äa Läwens-Meddel aun Doktasch vebrukt haud un kunn von kjeenem jeheelt woaren, 44 kjeem von hinjen un schieed dän Soom von sien Kjleet aun; un fuaz bleef äa Blootfluss stonen. 45 Un Jesus säd: Wäa haft Mie aunjeschieet? Wiels aula daut veluagen, säd Petrus un dee met am wieren: Liera, de Volkjshäaden drenjen un drekjen Die, un Du sajchst: Wäa haft Mie aunjeschieet? 46 Oba Jesus säd: Mie haft irjentwäa aunjeschieet; wiels Ekj weet, daut Krauft von Mie rutjegonen es.

47 Aus oba de Fru sach, daut see nich onbemoakjt jebläwen wia, kjeem see met Zetren un foll ver Am dol un säd ver aul de Menschen, wäajen waut fa Uasoak see Am aunjeschieet haud un woo see fuaz wia jesunt jeworden. 48 Hee oba säd to ar: Sie jetroost, Dochta, dien Gloowen haft die jeheelt; go han en Fräd!

49 Aus Hee noch räd, kjeem eena von däm Synagogen-Väastona sien Hus un säd to am: Diene Dochta es jestorwen, bemieej dän Liera nich. 50 Oba aus Jesus daut hieed, auntwuad Hee am un säd: Fercht die nich; jleew bloos, un see woat jesunt woaren! 51 Un aus Hee en daut Hus nenkjeem, leet Hee kjeenen met nengonen, buta Petrus un Jakobus un Johanes un dän Voda von daut Kjint un de Mutta. 52 See hielden oba aula un jaumarieeden om ar. Hee oba säd: Hielt nich; see es nich jestorwen, oba see schlapt. 53 Oba see lachten Am ut, wiels see wisten, daut see jestorwen wia. 54 Hee oba schekjt äant aula rut, neem ar aun de Haunt, roopt un säd: Kjint*8:54 Ooda: Mejal., sto opp! 55 Un äa Jeist kjeem trigj, un see stunt fuaz opp; un Hee befool, ar Äten to jäwen. 56 Un äare Elren wieren buta sikj; Hee oba jeboot äant, kjeenem to sajen, waut passieet wia.