Marcos 8

Jesus jeft 4,000 to äten

1 En dee Doag, aus sea väl Volkj doa wia un see nuscht to äten hauden, roopt Jesus siene Jinja no sikj un säd to äant: 2 Mie jaumat daut äwa de Volkjshäad, wiels see sent hia aul dree Doag bie Mie un haben nuscht to äten. 3 Un wan Ekj dee onen jejäten wudd no äa Hus gonen loten, dan wudden see oppem Wajch veschmachten, wiels eenje von äant sent von wietauf jekomen. 4 Un siene Jinja auntwuaden Am: Wuahäa wudd eena dise hia en de Wiltnis met Broot saut moaken? 5 Un Hee fruach äant: Woo väl Brood hab jie? See säden: Säwen. 6 Un Hee befool daut Volkj, sikj opp de Ieed dol to saten; un Hee neem de säwen Brood, dankt, bruak dee un jeef siene Jinja dee, daut see dee väaläden; un see läden daut Volkj dee väa. 7 Un see hauden uk een poa kjliene Fesch. Un aus Hee dee jesäajent haud, befool Hee dee uk väa to lajen. 8 Un see eeten un worden saut un hoowen de äwajebläwne Brocken opp, säwen Kjarw voll. 9 Un dee doa jejäten hauden, wieren bie vea-dusent; un Hee leet äant gonen.