1 ኢንቴኖ ኢስራኤሌ ኣሳቶ!

ጎዳይ ኢንቴስ ዮቲዛ ቃላ ሲዪቴ!

2 ጎዳይ፥ «ካዎቴታ ኦጌ

ኢንቴ ታማሮፒቴ።

ኢስቲ ሳሎ ቦላ

ማላታ ቤኢዲ ሺሮቲኮካ፥

ኢንቴ ሺሮቶፒቴ።

3 ጋሶይካ ዴሬታ ዎጋይ ሃዳ።

ኢስቲ ሚ ዎራፔ ቃንጼቴስ፤

ሂላይ ማሲ ጊጊሴስ።

4 ኢስቲ ቢራኒኔ

ዎርቃን ኣሌቂሴቴስ፤

ቃጾንታ ማላ ናሪቃራ

ሚሲማሬን ሺኪዲ

ኦይቴስ።

5 ኢስታ ኤቃ ጾሳቲ

ኢስታ ካ ጊዶን

ዶኣ ዳጋንናስ

ኤሲዛ ሚስሌ ማላ።

ሃሳያናስ ዳንዳዬቴና።

ሄሜታናስ

ኢስቲ ዳንዳዮንታ ጊሻስ

ኣሳይ ኢስታ ቶኬስ።

ኢስቲ ኢታ ጊዲን

ዎይኮ ሎኦ ሚሽ

ኢንቴ ቦላ ኦናስ

ዳንዳዮንታ ጊሻስ

ኢስታስ ሙሌካ ያዮፍቴ» ጌስ።

6 ኣቤት ጎዳዉ!

ኔ ማላይ ኦኒካ ዴና።

ኔኒ ጊታ፤

ኔ ሱንይካ ጊታኔ ዎልቃማ።

7 ኣቤት ካዎቴታስ ካዎ!

ኔስ ያዮንታይ ኦኔ?

ኔስ ቦንቾይ ቤሴስ፤

ጋሶይካ ኣ ኤራንቻታ

ጋርሳኒኔ

ኢስታ ካዎቴታ ኡባ ጋርሳን

ኔ ማላይ ዴና።✝

8 ሃዳ ጊዲዳ ሚፌ ማሴቲዳ

ኤቃ ጾሳታፔ

ቲሚርቴ ታማርዛ ኡባይ

ኤያኔ ዳማ።

9 ሄ ኤቃ ጾሳቲ ታርሴሴፔ

ዪዳ ቢራኒኔ

ኡፋዜፔ ዪዳ

ዎርቃን ኣሌቄቲዳ።

ኢስቲ ዎይኔ ኡሻኒኔ

ኦቻ ቴራ ሚሳቲዛ

ሜራ ዲዛ

ማይኦን ካሜቲዳ።

ኢስቲ ኡባይ ኩሼ ኦሶ

ሂላታን ኦሴቲዳ።

10 ጊዶ ኣቲን ጎዳይ ቱሙ ጾሳ፤

ኢዚ ዴኦ ጾሳኔ ሜርና ካዎ።

ኢዚ ሃንቄቲዛ ዎዴ

ቢታይ ቃጼስ፤

ካዎቴቲካ

ኢዛ ዪሎ ዳንዳዬቴና።

11 ጎዳይ፥ «ኢንቴካ፥ ‹ሄይቲ ሳሎኔ

ሳኣ ሜንታ ጾሳቲ

ሳኣፔኔ ሳሎ ጋርሳፌ

ያና› ጌታ» ጌስ።

12 ባ ዎልቃን ሳኣ ሜዳይ፥

ባ ኣ ኤራቴን

ኣላሜ ኤሲዳይ፥

ባ ኣኬካን

ሳሎ ሚጪዳይ ጎዳ።

13 ኢዚ ጉሚዛ ዎዴ፥

ሳሎን ዲዛ ኡባይ ቃጼስ።

ኢዚ ሻራ ሳኣ ጋጻፔ

ፑዴ ዴንስ።

ኢዚ ኢራራ ዳዳ ዬዴስ፤

ጫርኮካ ባ ሚንጃሶፔ ኬሴስ።

14 ኣሲ ኡባይ ኤራ ይዲ ዳሚዴስ፤

ዎርቃ ሴሪሲዛ ኣሲ ኡባይ

ባ ኦዳ ኤቃ ጾሳታን

ዬላቲዴስ።

ጋሶይካ ኤቃ ጾሳቲ ዎርዶ፤

ኢስታስ ሼምፖይ ዴና።

15 ኢስቲ ጮ ቂስ

ሜቲዳ ሚሻ።

ፒርዳይ ኢስታ ቦላ ጋኪዛ ዎዴ

ኢስቲ ያና።

16 ጊዶ ኣቲን ያቆቤ ቃዳይ

ሄይታ ማላ ጊዴና።

ጋሶይካ ኢዚ ኡባ ሜዳይሳ፤

ኢስራኤሌይ ዶሬቲዳ ዴሬ።

ኢዛ ዶሪዳይሳ ሱንይ

ኡባፌ ዎልቃማ

ጎዳ ጾሳ።

17 ኢንቴኖ ሞርኬይ ጊዶዳይቶ!

ዲዛ ሚሽ ዲዛሶፔ ሺሺቴ።

18 ጋሶይካ ጎዳይ፥

«ታኒ ሃ ሳኣ ቦላ ዲዛ ኣሳ

ሃኢ ጌዴ ካሬ ኬሳዳ ጎዳና።

ኢስታስ ኤሬታና ማላ

ታ ኢስታ ቦላ ሜቶ ኤሃና» ጌስ።

19 ዋኖ ኣይ ሃኖ!

ታ ማዱንይ

ፓጾንታ ማዱን።

ጊዶ ኣቲን ታ ታና፥

«ሃይሲ ታ ሃርጌ፤

ታኒ ዳንዳያናስ ቤሴስ» ጋዲስ።

20 ታ ዱንካኔይ ላሌቲዴስ፤

ኢዛ ዎዶሮይ ኡባይ ዱጼሬቲዴስ።

ታ ናይቲ ኡባይ

ታፔ ሻኬቲዲ ቢቺዳ፤

ሃይሳፌ ጉዬ ሲሜቴና፤

ታ ዱንካና ዛሪዲ ቶላናስ

ዎይኮ ታ ማጋላሻ ካቃናስ

ሃኢ ኢሲ ኣሲኔ ኣቲቤና።

21 ሄንንቻቲ ዳሚዳ፤

ኢስቲ ጎዳ ኦይቺቤቴና።

ሄሳ ጊሻስ ኢስታስ ኢንጄቲቤና፤

ኢስታ ዉዴ ኡባይ ላሌቲዴስ።

22 ሲዪቴ! ኢታ ዮኦይ ዩሳ ቦላ ዴስ፤

ሄሲ፥ «ፑዴሃ ባጋራ ዲዛ

ካዎቴን

ጊታ ቡልኣኬቴ

ዩሳን ዴስ» ጊዛይሳ።

ኢዛ ኦላንቻቲ ዪዲ

ዩሁዳ ካታማታ ባዞኔ

ዎራካናታ ዱሳሶ ኬሳና።

23 ኣቤት ጎዳዉ! ኣሳ ዴኦይ

ኢዛዴ ኩሼን ዶንታይሳኔ

ባ ሄሜታካ ባርካ

ባ ሼኔ ማላ

ሎኤና ዳንዳዮንታይሳ

ታ ኤራይስ።

24 ኣቤት ጎዳዉ! ታና ሴራ፤

ጊዶ ኣቲን ጊናራ ጊዶ።

ታኒ ሙሌራ ዮንታ ማላ

ኔኒ ሃንቆራ ታ ቦላ ዮፓ፤

25 ያቆቤ ሙሌራ

ሚ ሚቲዳይታ ቦላኔ

ኔ ሱን ጼይጎንታ

ኣሳታ ቦላ ጉሳ።

ኢዛ ዱሳሶካ

ካይዚሲዳ ጊሻስ

ኔኒ ኔ ሃንቆዛ ኔና ኤሮንታ

ዴሬታ ቦላኔ

ኔ ሱን ጼይጎንታ

ካዎቴታ ቦላ ጉሳ።