1 ጎዳይ ታና፥ «ባዳ ላይኖፔ ኦሴቲዳ ዳንጮ ሻማዳ ኔ ጼሳን ዳንጫ፤ ጊዶ ኣቲን ሃን ቦሺሶፓ» ጊዴስ። 2 ሄሳ ጊሻስ ታኒ ጎዳይ ኣዛዚዳ ማላ ዳንጮ ሻማዳ ታ ጼሳን ዳንጫዲስ።

3 ጎዳ ቃላይ ናምኣን ታኮ ዪዲ፥ 4 «ኔኒ ሻማ ዳንጪዳ ዳንጮዛ ኤካዳ ኤፊራጺሴ ሻፋ ባ፤ ሂስታዳ ዛላ ዛኣ ጊዶን ቆታ» ጊዴስ። 5 ሂስቲን ታኒ ጎዳይ ታስ ዮቲዳ ማላ ኤፋዳ ኤፊራጺሴ ሻፋ ላንቄን ቆታዲስ።

6 ዳሮ ጋላሳፌ ጉዬ ጎዳይ፥ «ዴንዳ ኤፊራጺሴ ሻፋ ባዳ ታኒ ኔና፥ ‹ሄን ቆታ› ጊዳ ዳንጮዛ ኬሳ» ጊዴስ። 7 ሂስቲን ታኒ ኤፊራጺሴ ሻፋ ባ ቦካዳ ዳንጮዛ ታ ቆቲዳሶፔ ኬሳዲስ፤ ጊዶ ኣቲን ሄ ዳንጮዚ ሞሬቲዲ ሙሌራ ጎኦንታዝ ጊዲዴስ።

8 ሄሳፌ ጉዬ ጎዳ ቃላይ ታኮ ዪዲ፥ 9 «ጎዳይ ታኒ ዩሁዳ ኣሳ ኦቶሬቴኔ ዬሩሳላሜ ኣሳ ጬቄቴ ሄሳ ማላ ይሳና። 10 ታ ቃላ ሲዮንታ ኢጺዲ፥ ባንታ ዎዚና ሙሜቴ ካሊዲ፥ ኤቃ ጾሳታስ ኦናሲኔ ጎይናናስ ቢዛ ሃ ኢታ ኣሳይ ሃይሳ ዳንጮዛ ማላ ሙሌካ ጎኦንታይሳ ጊዳና። 11 ዳንጮይ ኣሳ ጼሳ ባቂ ኦይኪዛ ማላ ዩሁዳ ኣሳይ ኡባይኔ ኢስራኤሌ ኣሳይ ኡባይ ታኮ ሺጵ ጋና ማላኔ ታ ሱንስ ጋላታኔ ቦንቾ ኢማና ማላ ታ ኦን ኢስቲ ታ ጊዛዝ ሲዪቤቴና» ጌስ።

12 ቃሴካ ጎዳ ኢስራኤሌ ጾሳይ፥ «ኤርማሳ! ኣሳስ፥ ‹ኦቶ ኡባን ዎይኔ ኡሻይ ኩማና› ጌስ። ኢስቲ ኔስ ዛሪዲ፥ ‹ኦቶ ኡባን ዎይኔ ኡሺ ኩማናይሳ ዋኒ ኑ ኤሮኮኒ?› ጊኮ፥ 13 ኔኒ ኢስታስ፥ ‹ጎዳይ ታኒ ሃ ቢታን ዲዛ ኣሳ ኡባ፥ ዳዊቴ ካዎቴ ኣራታን ኡቲዛ ካዎታ፥ ቄሴታ፥ ናቤታኔ ዬሩሳላሜን ዲዛ ኣሳ ኡባካ ታ ዎይኔ ኡሻን ማሳና። 14 ታኒ ኢሲ ኣስ ሃራ ኣሳራ፥ ኣዋ ናራ ኦሻና፤ ታኒ ኢስታ ይሳና ኣቲን ኢስታስ ሚሼቲኬ፤ ቃቲኬኔ ማሪኬ› ጌስ ጋ» ጊዴስ።

15 ጎዳይ ዮቲዴስ፤

ዎዚናን ዎ ሲዪቴ፤

ኣጊቴ ኦቶራንቻ ጊዶፒቴ።

16 ኢዚ ማ ኤሆንታ ዲሺን

ሚዳ ዙማታ ቦላ ኢንቴ ቶሆይ

ጴቶንታ ዲሺን

ጎዳስ ኢንቴ ጾሳስ

ቦንቾ ኢሚቴ፤

ኢንቴ፥ «ፖኦይ ያና»

ጊዲ ናጌታ፤

ጊዶ ኣቲን

ኢዚ ማን ላማና፤

ሳካና ማ ኦና።

17 ኢንቴ ሲዮንታ ኢጺኮ፥

ኢንቴ ኦቶሬቴ ጊሻስ

ታ ሼምፖያ ጌማን ዬካና፤

ጎዳ ዉዴይ

ዲኤቲ ቢቺዳ ጊሻስ

ታኒ ጫሞ ዬሆ ዬካይስ፤

ታ ኣይፌፔ ኣፉን

ሃ ማላ ጎጌስ።

18 ጎዳይ ታና፥ «ካዎዛሲኔ

ኢዛ ኣዮ ጎዳቴይስ፥

‹ኢንቴ ቦንቾ ካላቻይ

ኢንቴ ሁኤፔ

ዎና ጊሻስ፥

ኢንቴ ካዎቴ ኣራታፔ

ዱጌ ዎቴ።

19 ኔጌቤ ቢታን ዲዛ ካታማቲ

ኡባይ ጎርዴታና።

ኢስታ ዶያናዴይካ ዴና፤

ዩሁዳ ኣሳይ ኡባይ

ዲኤቲዲ ባና፤

ኢስታ ኦጌይካ

ጎርዴታና› ጋ» ጊዴስ።

20 ቃሴካ ጎዳይ፥ «ኣኔ ቁ ጊዲ

ፑዴሃ ባጋፌ ዪዛይታ ጼሊቴ፤

ኢንቴስ ኢሜቲዳ ዉዴይ፥

ኢንቴ ጬቄቲዛ ዶርሳቲ

ኣዋን ዲዞ?

21 ኔኒ ኔስ ዳቦ ጊዳና ማላ

ኮዪዳይቲ ኔና ጾኒዲ

ሃሪዛ ዎዴ

ኔ ኣይ ጋኔ?

ዬሎ ሚጻይ ኦይኪዳ

ማጫሳ ማላ

ኔና ሚጻይ ኦይኬኔ?

22 ኔኒ ኔ ዎዚናን፥

‹ሃይሲ ኡባይ ታ ቦላ

ኣይስ ጋኪዴ?› ጊኮ፥

ኔ ማይኦይ ቃሬቲን

ኔ ሱጌቲዳይ፥

ኔ ኣሳ ኩሼን ዋዬ ቤኢዳይ

ኔ ናጋራይ ዳሪዳ ጊሻሳ።

23 ቱሙ ቶጵያ ኣሲ ባ ሜ፥

ዎይኮ ማሄይ ባ ማሳራቴ

ላማናስ ዳንዳይዜ?

ኢንቴ ኢታ ኦ ሜዜቲዳይቲ

ሎኦ ኦናስ

ዳንዳዬኬታ» ጊዴስ።

24 ጎዳይ፥ «ባዞ ጫርኮይ

ሱላ ላሊዛ ማላ

ታኒካ ኢንቴና ላላና።

25 ኢንቴ ታና ዶጊዳ ጊሻሲኔ

ዎርዶ ጾሳታን

ኣማኔቲዳ ጊሻስ

ኢንቴ ሳማይኔ

ኢንቴ ቃዳይ ሃይሳ።

26 ኢንቴ ካሎቴ

ቤታናሼ ጋካናስ

ታኒ ኢንቴ ማይኦ ቃራዳ

ኢንቴ ሲን ካማና።

27 ኢንቴ ዙምቡላታ ቦላኔ

ዴምባን ኦዳ ሃራሲዛ ኦሶ

ታኒ ቤኣዲስ፤

ኢንቴ ላይማቴኔ ኢንቴ ዚታ

ሃኖታ ታ ቤኣዲስ፤

ዬሩሳላሜ ኔስ ኣዬ ኣና!

ኔኒ ኣይዴ ጋካናስ

ኔ ቱናቴፌ

ጌዮንታ ዳኔ?» ጌስ።