ኤርማሳ ቲንቢቴ 22

ኤርማሲ ዩሁዳ ካዎ ኬ ኣሳስ ዮቲዳ ቃላ

1 ጎዳይ፥ «ዱጌ ዩሁዳ ካዎ ሶ ባዳ፥ 2 ‹ኔኖ ዳዊቴ ካዎቴ ኣራታ ቦላ ኡቲዳ ዩሁዳ ካዎ! ኔኒኔ ኔ ሹሜቲ፥ ሃ ፔንጌታራ ጌሊዛ ኣስ ኡባይ ጎዳ ቃላ ሲዪቴ› ጋ» ጌስ። 3 ጎዳይ፥ «ሱሬ ፒርዳኔ ጺሎ ኦቴ፤ ቦንቄቲዳይታ ኡንኤዛይታ ኩሼፔ ኣሺቴ፤ ቤቴታ፥ ዪኦታኔ ኣምኤታ ቆሆፒቴ፤ ሃ ሶሆንካ ጺሎ ሱ ጉሶፍቴ። 4 ሃይታ ኣዛዞታ ኢንቴ ሎኤ ናጊኮ ዳዊቴ ካዎቴ ኣራታ ቦላ ኡቲዛ ካዎቲ ባ ሹሜታራኔ ባ ዴሬ ኣሳራ ፓራ-ጋሬኔ ፓራ ቶጊዲ ሃይሳ ካዎቴ ኬ ፔንጌራ ጌላናኔ ኬዛና። 5 ጊዶ ኣቲን ኢንቴ ታ ኣዛዞታ ናጎንታ ኢጺኮ፥ ‹ሃ ካዎቴ ኬይ ሙሌራ ያና› ጋዳ ታኒ ታርካ ታናን ጫቃይስ» ጊዴስ።

6 ጎዳይ ዩሁዳ ካዎ ኬስ፥

«ኔኒ ታስ ጋላኣዴ ቢታኔ

ሊባኖሴ ዙማ ጼራ ማላ

ሎኢኮካ ታኒ ኔና

ኣዳፌ ባዞኔ

ኣሲ ኢዛን ባይንዳ

ካታማ ኦና።

7 ታኒ ኔና ኦሊዛይታ ሁኤን ሁኤን

ኦላ ሚሽ ኦይዳ

ኔ ቦላ ዬዳና፤

ኢስቲ ዚጋፔ ማሴቲዳ ቱቄታ

ቃንጼሬዲ ታማን ዬጋና።

8 «ዱማ ዱማ ካዎቴፌ ዪዳ ኣሳይ ሃ ካታማይራ ኣ ቢሼ፥ ‹ጎዳይ ሃኖ ጊታ ካታማዮ ኣይስ ሃይሳ ኦዴ?› ጊዲ ባ ጋርሳን ሃሳዬታና።

9 «ኢስቲ፥ ‹ጎዳ ባንታ ጾሳራ ጫቄቲዳ ጫቆ ኣጊዲ ኤቃ ጾሳታስ ጎይኒዳ ጊሻሲኔ ኢስታስ ኦዳ ጊሻሳ› ጋና» ጌስ።

ኤርማሲ ሻሉሜ ጊሻስ ዮቲዳ ቃላ

10 ሃይቂዳ ካዎ

ኢዮሲያሳስ ዬኮፍቴ

ዎይኮ ካዮቶፍቴ፤

ሄሳ ኣጊዲ ዲኤቲ ቢዳ

ሻሉሜስ ሚሼቲዲ ዬኪቴ።

ጋሶይካ ኢዚ ሙሌካ

ጉዬ ሲሜና፤

ባ ዬሌቲዳ ቢታ

ናምኣን ቤኤና።

11 ባ ኣዋ ሶሆን

ዩሁዳን ካዎቲዲ ዲሼ

ሃ ሶሆፔ ቢዳ

ኢዮሲያሳ ና ሻሉሜ ጊሻስ

ጎዳይ፥ «ኢዚ ሙሌካ

ጉዬ ሲሜና።

12 ኢዚ ዲኤቲ ቢዳ ቢታን

ሄን ሃይቃና፤

ሲሚ ዪዲ ሃ ቢታዮ ቤኤና።

ኤርማሲ ኢዮኣቄሜ ጊሻስ ዮቲዳ ቃላ

13 «ባ ካዎቴ ኬ

ጌኔን ኬጺዛይሳስ፥

ፒርዳ ጌላሲዲ

ፖቄ ኬጺዛይሳስ፥

ኣስ ጮ ሜላ ኦሲሲዛይሳስ፥

ኢዛ ዎልቃ ዋጋ ጪጎንታዴስ፥

14 ኢዚ፥ ‹ጊታ ፖቄኔ

ኣሆ ካዎቴ ኬ

ታስ ኬጻና› ጊዛዴስ

ኣዬ ኣና!

ኢዚ ባ ኬስ

ጊታ ማስኮቴታ ኬሴስ፤

ዚጋ ሚን ኣሌቂሴስ፤

ዞኦ ቃላሜካ ቲዬስ።

15 «ኔ ካዎቴ ኬ

ዳሮ ዚጋ ሚን ኬጺዳይሲ

ኔስ ካዎቲዳ ሚሳቲዜ?

ኔ ኣዋይ ሱሬ ፒርዳኔ

ጺሎ ኦዳ ጊሻስ

ሚዛዚኔ ኡዪዛዚ ፓጪዴ?

ኢዛስ ኡባ ሚሺካ ኢንጄቲዴስ።

16 ኢዚ ማንቆታሲኔ ሜቶታንቻታስ

ፒርዳ ጌላሲቤና፤

ሄሳ ጊሻስ ኡባ

ሚሺካ ኢዛስ ኤኖ ጊዴስ፤

ታስ ኤሮ ጉሲ ሄሳ ጊዴኔ?

17 ጊዶ ኣቲን ኔ ኣይፌይኔ

ኔ ዎዚናይ ሼምፒዳይ

ሃ ሄ ሾጬቾን

ዴሚዛ ጎኣን፥

ጺሎታ ሱ ጉሶን፥

ኣሳ ኡንኤኒኔ

ጌኔ ኦሶና» ጌስ።

18 ሄሳ ጊሻስ ጎዳይ

ዩሁዳ ካዎ ኢዮሲያሳ ና

ኢዮኣቄሜ ጊሻስ፥

«ዎ ታ ኢሻዉ!

ዋይ ዋይ ታ ሚቼ!

ቃሴ፥ ‹ታ ጎዳዉ ዎ ዎ!

ኔ ጊታቴ ዎ ዎ!›

ጊዲ ዚላሌቴና።✝22፡18 2ካዎ 23፡36—24፡6፤ 2ታሪ 36፡5-7

19 ሃሬይ ሞጌቲዛ ማላ

ኢዚ ሞጌታና፤

ኢዛ ኣሃይ ዬሩሳላሜ

ፔንጌታፔ ጎሼቲዲ

ካሬ ኦሌታና» ጌስ።

ዬሩሳላሜ ጊሻስ ኤርማሲ ዮቲዳ ቃላ

20 ጎዳይ ዬሩሳላሜ፥

«ፑዴ ሊባኖሴ ባዳ ዋሳ፤

ኔ ቃላካ ባሳኔን ሲሳ፤

ኣባሪሜን ኤቃዳ ዋሳ፤

ጋሶይካ ኔስ ኦላ ላጌቲ

ኡባይ ዉሪዳ።

21 ኔኒ ሳሮ ዲሺን

ታ ኔስ ሚን ዮታዲስ፤

ጊዶ ኣቲን ኔኒ፥ ‹ሲዪኬ› ጋዳሳ።

ዬላጋቴፌ ዶሚን

ኔ ኦጌይ ሃይሳ፤

ኔኒ ታስ ኣዛዜቶንታ ኢጻዳሳ።

22 ኔ ሄንንቻታ ኡባ

ጫርኮይ ኤፋና፤

ኔ ላጌቲ ኡባይ ዲኤቲ ባና፤

ኔ ኢታቴ ኡባ ጋሶን

ዬላታናኔ ካዉያና።

23 ሃኔ ሊባኖሴን ዲዛሬ!

ኔ ኬ ዚጋ

ሚፌ ኬጺዳሬ!

ሚጻይ ኦይኪዳ ማጫሳ ማላ

ሜቶይ ኔ ቦላ ዪሺን

ዋና ዋሳንዲ!» ጌስ።

24 ጎዳይ፥ « ‹ታኒ ታ ዴኦን ጫቃይስ› ዩሁዳ ካዎ ኢዮኣቄሜ ና ኢኮኒያኔ ኔኒ ታስ ኡሻቻ ኩሼ ቃላባቴ ማታሜ ጊዲዳኮካ ታ ኔና ኬሳ ኦላና።✝22፡24 2ካዎ 24፡8-15፤ 2ታሪ 36፡9-10 25 ኔና ዎናስ ኮይዛይታስ፥ ኔኒ ያዪዛ ባቢሎኔ ካዎ ናቡካዳናጾሬሲኔ ኢዛ ኦላንቻታስ ታኒ ኔና ኣ ኢማና። 26 ታኒ ኔናካ ኔና ዬሊዳ ኔ ኣዬዮካ ኢንቴ ዬሌቶንታ ኣላጋ ቢታን ኦላ ኣጋና፤ ኢንቴካ ሄን ሃይቃና። 27 ኢንቴ ሲማናስ ላሞቲዛ ቢታዮ ሙሌካ ሲሜኬታ» ጌስ።

28 ሃይሲ ኢኮኒያኔይ ካቲዲ

ሜቂዳ ኦቶ ማላ

ኦኒካ ኮዮንታ ሚሼ?

ኢዚኔ ኢዛ ናይቲ

ኣይስ ካሬ ኦሌቲ ኣቲዶ?

ኢስቲ ባ ኤሮንታ ኣላጋ ቢታን

ኣይስ ዬጌቲ ኣቲዶ?

29 ሃኔ ቢታዬ፥ ሃኔ ቢታዬ!

ጎዳ ቃላ ሲያ!

30 ጎዳይ፥ «ዩሁዳ ኣይሳናስ

ኣሲ ባይንዳ ጊሻስ፥

ዳዊቴ ኣራታን ኡታና

ኢሳዴይካ ኬኦንታ ጊሻስ፥

ኢሲ ፓጻ ኣሲ ኬዞንታ ጊሻስ

ኢዛስ ዴኦ ላይ

ኡባን ኢንጄቶንታ

ን ኣስ ጊዲ ጻፍቴ» ጌስ።