ኤርማሳ ቲንቢቴ 2

ኢስራኤሌ ኣሳይ ኦዳ ናጋራ

1 ጎዳ ቃላይ ዪዲ ታስ፥ 2 «ባ! ባዳ ዋሳ፤

ዬሩሳላሜ ኣሳ

ሃይን ሲሳ፤

ጎዳይ፥ ‹ኔኒ ናቴቴን

ኣይ ኬና ኣማኔቲዳኮ፥

ቃሴ ኔኒ ቡሮ ሚሺራን ዳሼ

ታና ኣይ ኬና ሲቂዳኮ፥

ዜሬ ዜሬቶንታ

ባዞ ቢታን

ኔ ዎስታ ካሊዳኮ

ታ ኣኬካይስ።

3 ሄ ዎዴ ኢስራኤሌይ

ጎዳስ ጌሻ፥

ኮይሮ ሺሺዛ

ጼራ ካ ማላ፤

ኢዞ ሚቲዳይቲ

ሞራንቻ ጊዲዳ፤

ኢስታ ቦላ ባሺ ዪዴስ› » ጌስ።

4 ኢንቴኖ ያቆቤ ኬ ኣሳቶ!

ኢስራኤሌ ዛሬ ኡባቶ!

ጎዳ ቃላ ሲዪቴ!

5 ጎዳይ፥ «ካሴ ኢንቴ ኣዋቲ

ታፔ ሃኪዳይ፥

ሃዳ ዮኦ ካሊዳይ፥

ባ ሁኤሲካ

ጎኣይ ባይንዳይታ ጊዲዳይ

ታፔ ኣይ ሞሮ ዴሚዲ?

6 ኢስቲካ፥ ‹ኑና ጊብጼፔ ኬሲዳይ፥

ባዞን ሳሚዳ ኦጌራ፥

ኩንዱኩርጮ ቢታራ፥

ሜላኔ ማ ቢታራ፥

ኣሲ ኣንታሶራ

ኑና ካሌ ኤሂዳ

ጎዳይ ኣዋን ዲዜ?›

ጊ ኦይቺቤቴና።

7 ኢንቴ ኢዚ ኣይፌኔ

ኢዚ ኣንጆ ማና ማላ

ታኒ ኢንቴና ኣራዳ ቢታ ኤሃዲስ፤

ጊዶ ኣቲን ኢንቴ ዪዲ

ታ ቢታ ቱኒሲዴታ፤

ታ ጺንጾዮ

ሃራሴታና ማላ ኦዴታ።

8 ቄሴቲካ፥ ‹ጎዳይ ኣዋን ዲዜ?›

ጊ ኦይቺቤቴና፤

ታ ዎጋይ ኢስታ ኩሼን ዲዛ

ኣሳቲካ ታና ኤሪቤቴና።

ዴሬ ካሌዛይቲካ

ታ ቦላ ማካሊዳ።

ናቤቲ ባኣሌ ሱንን

ቲንቢቴ ዮቲዳ፤

ጎኦንታ ሚሻታካ

ካሊዳ» ጊዴስ።

9 ቃሴካ ጎዳይ፥

«ሄሳ ጊሻስ ታኒ

ኢንቴናራ ቡሮ ፒርዴታና፤

ኢንቴ ናይታ ናይታራካ ሞቴታና።

10 ኪቲሜ ፒኒ ጼሊቴ፤

ቄዳሬ ኪቲዲ

ሎኤ ጾሞሲቴ፤

ሂስቲዲ ኣኔ ሃይሳ ማላ ሃኖይ

ካሴ ሃኒ ኤሪዛኮ ቤኢቴ።

11 ኢስቲ ቱሙ ጾሳታ

ጊዶንታ ኣጊኮካ ባ ኤቃ ጾሳታ

ላሚዳ ካዎቴ ዲዜ?

ታ ዴሬይ ጊዲኮ

ኢስታስ ቦንቾ ጊዲዳይሳ

ላሚዴስ» ጌስ።

12 ቃሴካ ኡባፌ

ዎልቃማ ጎዳይ፥

«ሳሎቶ፥ ‹ሃኖ ፖራ!› ጊቴ፤

ኬሂ ዳጋሚዲ ኮኮሪቴ!

13 ታ ዴሬይ ናምኡ

ኢታ ሚሻታ ኦዴስ፤

ዴኦ ሃ ፑልቶ ጊዲዳ

ታና ኣጊዴስ፤

ሃ ኦይካናስ ዳንዳዮንታ

ሉኬቲዳ ኦላታ ባስ ቦኪዳ።

14 ኢስራኤሌይ ካሬፔ ዪዳ ኣይሌ?

ዎይኮ ሶን ዬሌቲዳ ኣይሌ?

ሂስቲን ኣይስ

ቦንቃስ ኣ ኢሜቲዴ?

15 ጋሞቲ ኢዛ ቦላን ጻጊዳ፤

ኢስቲ ባንታ ቃላ ቁ ሂስቲዲ

ኢዛ ቦላ ጋርማሚዳ፤

ኢስቲ ኢዛ ቢታ ቡላ ኬሲዳ፤

ኢዛ ካታማቲካ ጹጌቲዳኔ ካይዚዳ።

16 ቃሴካ ሜምፒሳኔ

ጻፊናሴ ኣሳቲ

ኔ ሁኤ ቡሉሲዳ።

17 ኦጌ ኔና ካሌዛይሳ

ጎዳ ኔ ጾሳ ኣጋዳ

ሃይሳ ኔ ቦላ ኤሂዳይ

ኔና ጊዲኪ?

18 ሺሆሬ ሻፋፔ ሃ ኡያናስ፥

ኣይ ኤካናስ

ዱጌ ጊብጼ ዎዲ?*2፡18 ሺሆሬ ሻፋይ ናይሌ ሻፋስ ጋባራ ሃ።

ዎይኮ ኤፊራጺሴ ሻፋፔ

ሃ ኡያናስ

ዱጌ ኣሶሬ ቤ

ኣይስ ኮሺዴ?

19 ኔ ኢታቴ ኔ ቦላ

ቂጻቴ ጋና፤

ኔ ታና ካዶይሲ ኔ ቦላ

ሃንቆ ኤሃና።

ጎዳ ኔ ጾሳ ኔ ኣጊሺን፥

ታስ ያሻቴ

ኔ ዉዱ ጎንታ ኢጺሺን

ኣይ ማላ ኢታይኔ

ጫሞ ሚሺ

ኔ ቦላ ጋካናኮ ቆፓ፤

ኣኔ ኣኬካ» ጌስ።

20 ኡባ ሃሪዛ ጎዳይ፥

«ቤኒፔ ዶማዳ ታኒ

ኔ ቃምባራ ሜንዲስ፤

ኔና ቃቺዳ

ሚሺካ ዱዲስ።

ሂስቲንካ፥

‹ታኒ ኔስ ኦኬ› ጋዳሳ።

ሂስታዳ ቃ ዙምቡላታ

ኣቻን ሚ ጋርሳን

ላይማታናስ ኢቻዳሳ።

21 ታኒ ኔና ሙሩታ

ዜሬፌ ኤካዳ፥

ሎኦ ዎይኔ ቱራ ማላ ቶካዲስ።

ሂስቲን ኔኒ ዋና ጉዬ ሲማዳ

ዎራን ሞኪዲ ሞሬቲዳ

ዎይኔ ቱራ ማላ ጊዳዲ?

22 ኔኒ ሃዲንጬን ሜጬቲኮካ፥

ዎይኮ ዳሮ ሳሙናን ሜጬቲኮካ

ኔ ሞሮ ቂታይ ሃኢካ

ታ ሲንን ዴስ» ጌስ

ኡባ ሃሪዛ ጎዳይ።

23 ኔኒ ዋናዳ፥ «ታኒ ቱናቤኬ፤

ታኒ ባኣሌ ኤቃታስ

ጎይናናስ ዎጻቤኬ»

ጋናስ ዳንዳያይ?

ኔኒ ሾባን ኦዳይሳ

ኣኔ ቆፓ፤

ኔኒ ኦዳይሳ ኣኔ ኣኬካ፤

ኔኒ ያኔ ሃ ዎጼሬቲዛ

ጋሜላ ማላ ጊዳዳሳ።

24 ኔኒ ባዞ ቢታን ባስ ዶሴ

ሂስታዳ ዚታ ኬዛ

ሲንጌሼ ዎጺዛ

ሃርዲዳ ማላ ጊዳዳሳ፤

ኢዛ ቢራሳስ ኬዛይቺኮ

ኦኔ ኢዞ ቴቃናስ ዳንዳይዛይ?

ኢዛ ቢራስ ኬዚን

ኢዞ ኮይዛይቲ ኡባቲ

ዋዮንታ ዴሜቴስ።

25 ኔ ቶሆይ ኣርጋጫና

ጋካናስ ዎጾፋ፤

ኔ ዶናይ ሳሞን ሜላና

ጋካናስ ቶይላቶፋ፤

ኔ ጊዲኮ፥ «ጮ ዳቡሮፓ፤

ታኒ ኤቃ ጾሳታ ዶሳዲስ፤

ታኒ ኢስታ ካላና» ጋዳሳ።

26 «ካይሶይ ኦይኬቲዲ ዬላቲዛ ማላ

ኢስራኤሌ ኣሳይ ዬላቲዴስ፤

ኢስቲካ፥ ኢስታ ካዎቲ፥

ኢስታ ሹሜቲ፥

ኢስታ ቄሴቲኔ ኢስታ ናቤቲ

ኡባይ ሄሳ ዬላታና።

27 ኢስቲ ሚ፥

‹ኔኒ ታ ኣዋ› ጌቴስ፤

ቃሴ ሹች፥

‹ኔኒ ታና ዬላዳሳ› ጌቴስ።

ኢስቲ ታስ ባ ሲን

ዛራናይሳ ኣጊዲ

ዞኮ ዛሪዳ፤

ጊዶ ኣቲን ኢስታ

ሜቶይ ጋኪዳ ዎዴ፥

‹ያዳ ኑና ኣሻ› ጌቴስ።

28 ሂስቲን ኣኔ ኢንቴ ኢንቴስ

ሜዳ ጾሳቲ ኣዋን ዲዞ?

ዩሁዳ፥ ኢንቴ ሜቶቲዛ ዎዴ

ኢስቲ ኢንቴና ኣሻናስ

ዳንዳይኮ

ኣኔ ኢንቴና ዪዲ ኣሼቶ!

ኢንቴኖ ዩሁዳ ኣሳቶ!

ኢንቴ ጾሳቲ ኢንቴ

ካታማታ ማላ ጮራ» ጊዴስ።

29 ጎዳይ፥ «ኢንቴ ታናራ

ኣይስ ሞቴቴቲ?

ኢንቴ ኡባይካ

ታ ቦላ ማካሊዴታ።

30 ታኒ ኢንቴ ናይታ

ጮ ሜላ ቃጻያዲስ፤

ኢስቲ ጊዲኮ ባይቤቴና፤

ጋፊዳ ጋሞ ማላ

ኢንቴ ማሻይ

ኢንቴ ናቤታ ሚዴስ» ጌስ።

31 ኢንቴኖ ሃ ዎዴ ዬሌታቶ!

ጎዳ ቃላ ዩሺ ቆፒቴ፤

«ታኒ ኢንቴስ ኢስራኤሌ

ኣሳስ ባዞ ማላ

ዎይኮ ሳካና ማይ ዲዛ

ቢታ ማላ ጊዳዲና?

ሂስቲን ኣይስ ታ ኣሳይ፥

‹ኑኒ ኑ ሼኔ ማላ ሃናና፤

ሲሚዲካ ኔኮ ዮኮ› ጊዜ?

32 ጌላኦይ ባ ኣሌቆ ዎይኮ

ሚሺራያ ባ ሚሺራቴ

ማይኦ ባላ ኤራዜ?

ታ ዴሬይ ጊዲኮ

ታና ዳሮ ዎዴ

ጋካናስ ባሊዴስ።

33 ዚታን ኣስ ኦይካናስ

ኔ ኣይ ማላ ኤራንቻ?

ሁስኩ ሁስኪዛ

ኢታ ማጫሳቲካ

ኔ ሃኖቴፌ ዳሮ

ኢታ ሚሽ ታማሬቴስ።

34 ኔ ኢስታ ካይሶቴን ኦይኮንታ

ጺሎ ማንቆታ ሱ

ኔ ማይኦ ቦላ ቤቲዴስ።

ኔኒ ሃይሳ ኡባ

ኦ ዎዳካ፥

35 ‹ታኒ ጺሎ፤ ቱማፔ ኢዛ ሃንቆይ

ታና ጋኬና› ጋሳ።

ኔኒ፥ ‹ታኒ ናጋራ

ኦቤኬ›

ጊዛ ጊሻስ

ታኒ ኔ ቦላ ፒርዳና።

36 ሂስቲን ኔ ኦጌ ላማ ላማ

ኣይስ ዎጻይ?

ካሴ ኔና ኣሶሬ ቢታይ

ካዉሺዳ ማላ

ጊብጼ ቢታይ ኔና ካዉሻና።

37 ኔኒ ኣማኔቲዛይታ

ጎዳይ ካዉሺዳ

ጊሻሲኔ

ኢስታፌካ ማዶ

ዴሞንታ ጊሻስ

ሃይሳፌካ ኔ ሁኤ ኩሼን

ባቃ ኦይካዳ ኬዛና።