ሌሚሶስ ሜቂዳ ጎምቦ
1 ጎዳይ ኤርማሳስ፥ «ባዳ ማናፔ ጎምቦ ሻማ፤ ሂስታዳ ኔናራ ዴሬ ጪማታፔኔ ቄሴታፔ ጉታ ኤካዳ፥ 2 ኮንኣ ሜቆ ፔንጌ ኣቻራ ኣዳ ሄኖሜ ና ሾባ ባ፤ ሄን ታኒ ኔስ ዮቲዛ ቃላ ኣዋጃ።19፡2 2ካዎ 23፡10፤ ኤር 7፡30-32፤ 32፡34-35 3 ‹ኢንቴኖ ዩሁዳ ካዎቶ! ዬሩሳላሜን ዲዛ ዴሬዞ! ጎዳ ቃላ ሲዪቴ! ኡባፌ ዎልቃማ ጎዳ ኢስራኤሌ ጾሳይ፡ ሲያናስ ሃይስ ኢቲዛ ሚሽ ሃ ቢታ ቦላ ታኒ ኤሃና። 4 ጋሶይካ ኣሳይ ታና ኣጊዲ ሃይሳ ሃ ሶሆዛ ኤቃ ጎይኒዛሶሆ ኬሲዴስ፤ ኢስቲ ጊዲን ዎይኮ ካሴ ኢስታ ኣዋቲ፥ ዎይኮ ዩሁዳ ካዎቲ ኤሮንታ ኤቃ ጾሳታስ ያርሺዳ፤ ሃይሳ ሃ ሶሆዛን ጺሎ ሱ ጉሲዳ። 5 ቃሴ ታኒ ኢስታ ኣዛዞንታይሳ፥ ዎይኮ ኢስታስ ዮቶንታይሳ፥ ዎይኮ ታ ዎዚናን ቆፖንታይሳ ባንታ ኣቱማ ናይታ ባኣሌስ ታማን ጹጊ ያርሻናስ ጎይኒዛሶሆ ዙምቡላታ ኦዳ።19፡5 ሌዌ 18፡21 6 ሄሳ ጊሻስ ኣሳይ ሃ ሶሆዛ ሹካ ሾባ ጋናፔ ኣቲን ቶፌቴ ዎይኮ ሄኖሜ ና ሾባ ጊ ጼይጎንታ ዎዴይ ያና።
7 « ‹ሃ ሶሆን ዩሁዳ ሃልቾኔ ዬሩሳላሜ ሃልቾ ታ ላላና፤ ኢስቲ ባንታ ሞርኬታ ማሻኒኔ ባንታና ዎናስ ኮይዛይታ ኩሼን ሃይቃና ማላ ታኒ ኦና፤ ኢስታ ኣሃ ሳሎ ካፎታሲኔ ዎራ ዶኣታስ ቁማ ሂስታ ኢማና። 8 ታኒ ሃ ካታማዮ ሙሌራ ይሳና፤ ሚቻስካ ኬሳና፤ ኢዚ ማታራ ኣዛ ኣሳይ ኡባይ ሃኖ ፓላ! ጊ ቂ ካኣና። 9 ኢስቲ ባንታ ማጫ ናይታ ኣሾኔ ባንታ ኣቱማ ናይታ ኣሾ ማና ማላ ታኒ ኦና፤ ኢስታ ዎናስ ኮይዛ ኢስታ ሞርኬቲ ኢስታ ጊዶን ኢስቲ ኡባይ ኢሶይ ኢሳ ኣሾ ማና› ጌስ።
10 «ሄሳፌ ጉዬ ኔናራ ኢሲፌ ቢዳ ኣሳታ ሲንን ሄ ጎምቦዛ ሜን። 11 ሂስቲዲ ኢስታስ ኡባፌ ዎልቃማ ጎዳ ጾሳይ፥ ‹ማናዛ ጎምቦይ ሜቂዳይሳኔ ሲሚ ኮሌታና ዳንዳዮንታይሳ ታኒ ሃ ካዎቴኔ ሃ ካታማ ሄሳ ኦና፤ ኣሳይ ኣሃ ሞጊዛሶይ ባይንዳ ጊሻስ ቶፌቴን ሞጋና። 12 ታኒ ሃ ሶሆዛኒኔ ኢዛን ዲዛ ኣሳ ቦላ ሄሳ ኦና፤ ታኒ ሃ ካታማዮ ቶፌቴ ማላ ኦና። 13 ባንታ ኬ ካራ ቦላ ሳሎ ሜቴታስ ኤጻኔ ጩዋሲዲኔ ኤቃ ጾሳታስ ኡሹ ሺሺዳይቲ ዬሩሳላሜ ኣሳ ኬቲኔ ዩሁዳ ካዎታ ኬቲ ቶፌቴ ማላ ቱናና› ጌስ።19፡13 ኬ ካራ ቦላ ኤጻኔ ጩዋሶይ ኢስራኤሌ ኣሳይ ባ ኬ ቦላ ፖቄ ማላ ኦዲ ያርሾ ሺሺዛ ዎጋ።
14 «ሄሳፌ ጉዬ ኤርማሲ ጎዳይ ቲንቢቴ ዮታናስ ኪቲዳ ቶፌቴፔ ሲሚ ዪዲ ጎዳ ኬ ዱቡሻን ኤቂዲ፥ 15 ኡባፌ ዎልቃማ ጎዳ ኢስራኤሌ ጾሳይ፥ ‹ሲዪቴ! ኢስቲ ባንታ ዎዚና ሹቻሲዲ ታ ቃላ ሲዮንታ ኢጺዳ ጊሻስ ታኒ ሃ ካታማ ቦላኔ ኢዛ ማታን ዲዛ ሞታ ኡባ ቦላ ኤሃና ጊዳ ኢታ ሚሽ ኡባ ኢስታ ቦላ ኤሃና ጋይስ› ጌስ» ጊዴስ።