ጊብጼ ጊሻስ ዮቴቲዳ ኪታ
1 ካዎቴታ ጊሻስ ናቤ ኤርማሳኮ ዪዳ ጎዳ ቃላይ ሃይሳፌ ካሊ ዲዛይሳ፤
2 ጊብጼ ጊሻስ ዩሁዳ ካዎ ኢዮሲያሳ ና ኢዮኣቄሜይ ካዎቲዳ ኦይዳን ላይን፥ ኤፊራጺሴ ሻፋ ማታን ዲዛ ካርካሚሼን፥ ባቢሎኔ ካዎ ናቡካዳናጾሬይ ጾኒዳ ጊብጼ ካዎ ኒካ ኦላ ኣሳ ቦላ ዮቴቲዳ ኪታይ ሃይሳፌ ካሊ ዲዛይሳ፤46፡2-26 ኢሳ 19፡1-25፤ ሂዚ 29፡1—32፡32
3 «ኢንቴ ዎጋ ጎንዳሌኔ
ቄሪ ጎንዳሌ ጊግሲቴ፤
ሂስቲዲ ኦላስ ኬዚቴ!
4 ኢንቴ ፓራታ ኮሪዲ ቶጊቴ፤
ኢንቴ ሁኤን
ቢራታ ቆቤ ዎዲ፥
ኢንቴ ሶሆ ሶሆ ኦይኪቴ!
ኢንቴ ቶራ ሌፍቴ፤
ኢንቴ ኦላ ማይኦካ ማይኢቴ!
5 ጊዶ ኣቲን ሃይሲ
ታኒ ቤኢዛይ ኣዜ?
ኬሂ ያዪዲ ጉዬ ኡንዱዴቴስ፤
ዎልቃማ ኢስታ ኦላንቻቲ
ጾኔቲዳ፤
ጉዬ ሲሚ ጼሎንታ
ኤሶን ባቃቴቴስ፤
ኡባሶን ሺሮይ ዴስ።
6 ፒላታይ ባቃቲ ኣቴና፤
ሚኖይካ ኬሲ ኤኪ ኣቴና፤
ፑዴሃ ባጋን ኤፊራጺሴ ሻፋ
ማታን ጴቲ ኩንዲዳ።
7 ሃይሲ ኣባዬ ሻፋ ማላ
ኪጺዲ ጉፒዛይ
ቃሴ ዲኦ ሃ ማላ
ጎጊዛይ ኦኔ?
8 ጊብጼይ ኣባዬ ሻፋይ
ኪጺዲ ጉፒዛ ማላ ጉፔስ፤
ዲኦ ሃ ማላ ጾንጌቴስ፤
ጊብጼይ፥ ‹ታኒ ኬዛዳ
ቢታ ካማና፤
ካታማታኔ ኢስታን ዲዛ
ኣሳ ይሳና› ጌስ።
9 ፓራቶ ጉፒ ኬዚቴ፤
ፓራ-ጋሬቶ ኣዳራሲቴ፤
ጎንዳሌ ኦይኪዳ
ቶጵያ ኣሳይኔ
ፑጼ ኣሳይ፥
ዎንዳፌ ዋጺ ኦይኪዳ
ሚኖ ጊዲዳ ሉዲሜ ኣሳቲ፥
ኢንቴ ሚኖ ኦላንቻቲ
ኦላስ ዴንዲቴ።
10 ሄ ጋላሳይ ጎዳ
ኡባፌ ዎልቃማ
ጾሳ ጋላሳ፤
ኢዚ ባ ሞርኬታ ቦላ
ሃሎ ኬሲዛ ጋላሳ፤
ማሻይ ካላና
ጋካናስ ማና፤
ሳሞ ኣላና ጋካናስካ
ሱ ኡያና፤
ጎዳይ ኡባፌ ዎልቃማ
ጾሳይ ፑዴሃ ባጋን ኤፊራጺሴ
ሻፋ ማታን
ኢስታስ ያርሾ ጊግሲ ዎዴስ።
11 ሃኔ ጊብጼ ጌላኦዬ!
ፑዴ ጋላኣዴ ኬዛ፤
ቲዬቲዛ ሌ ኤካ ያ፤
ጊዶ ኣቲን ኔኒ
ሌ ጮ ሜላ ዳርሳሳ፤
ኔ ፓጻካ።
12 ካዎቴቲ
ኔ ዬላቴ ሲያና፤
ኔ ዬሆይ ቢታ ኩማና፤
ኦላንቻይ ኦላንቻራ
ኦይኬቲ ኩንዳና»
ጌስ ጎዳይ።
13 ባቢሎኔ ካዎ ናቡካዳናጾሬይ ጊብጼ ቢታ ዪዲ ኦላናይሳ ጎዳይ ናቤ ኤርማሳስ ዮቲዳ ቃላይ ሃይሳፌ ካሊ ዲዛይሳ፤46፡13 ኤር 43፡10-13
14 «ሃይሳ ጊብጼን ዮታ፤
ቃሴ ጊብጼ ካታማታን
ሚጊዶሌን፥ ሜምፒሳኒኔ
ጻፊናሴን ኣዋጃ።
ኢንቴ ዩሾን ዲዛይታ
ማሻይ ማና
ጊጌቲዳ ጊሻስ
ኢንቴ ዲዛሶን ዲዛሶን
ጊጌቲ ኡቲቴ።
15 ዎልቃማ ጊዲዳ ኣጵሴ ጌቴቲዛ
ኤቃ ጾሳይ ኣይስ ኩንዲዴ?
ጎዳይ ኢዛ ሱጊ ዬጊዳ ጊሻስ
ኤቃና ዳንዳይቤና።
16 ኢዛ ካሊዛ ኣሳቲ
ዛሪ ዛሪ ጴታና፤
ኢሶይ ኢሳ ቦላ ኩንዳና፤
‹ኣኔ ዴንዲቴ!
ጌዴ ኑ ዴሬኔ
ኑ ኣሳኮ ኣኔ ሲሞስ፤
ሞርኬ ማሻፌካ
ኣኔ ኬሲ ኤኮስ› ጋና።
17 ኢስቲ ሄን፥ ‹ጊብጼ ካዎ ፓሮኔይ
ባስ ኢሜቲዳ ቃዳን
ጎኤቶንታ ዲሼ
ጮ ታ ዳይስ ታ ዳይስ ጊ
ጬቄቲዛዴ ጊ ጼይጋና› ጊዴስ።
18 ኢዛ ሱንይ ጎዳ
ኡባፌ ዎልቃማ
ጾሳ ጌቴቲዛ ካዎይ፥
ታኒ ታ ዴኦን ጫቃይስ፤
ዙማታ ጊዶን ዲዛ
ታቦሬ ዙማ ሚሳቲዛይ፥
ኣባ ኣቻን ዲዛ
ቃርሜሎሴ ዙማ
ሚሳቲዛ ኢሳዴይ ያናስ ዴስ።
19 ኢንቴኖ ጊብጼ ቢታን ዲዛይቶ!
ዲኤቲ ባናስ
ኢንቴስ ዲዛዝ ጊግሲቴ፤
ሜምፒሳ ላሌታዳ ኢዚን
ኣሲ ባይንዳ ቡላ ጊዳና።
20 ጊብጼ ቢታይ ሎኦ ኡሳ ማላ፤
ጊዶ ኣቲን ሳጺዛ
ቦጼይ ፑዴሃ ባጋፌ ያና።
21 ሚሻን ሻሜቲ ዪዳ
ኢዚ ኦላንቻቲ
ሞዳ ዎፋኖ ማላ።
ኢስቲ ቃጻዬታና
ዎዴይ ጋኪዳ ጊሻሲኔ
ኢስቲ ያናስ ዎዴይ
ማቲዳ ጊሻስ
ኢስቲ ኢሲፌ
ጉዬ ሲሚ ባቃታና፤
ባ ዲዛሶን ሚኒ ኤቂዲ
ኤቄታናስ ዳንዳዬቴና።
22 ሞርኬይ ጾኒ ጾኒ ዪሺን
ጊብጼ ኣሳይ ባቃቲሼ
ሾሺ ሱይቂዛ ማላ ሱይቃና፤
ሚ ቃንጻና ቢዛ ኣሳ ማላ
ኢዚ ሞርኬቲ ኢዞ ቃንጻና
ካልታ ኤኪ ያና።
23 ፒ ጊዳ ዎራ ጊዲኮካ
ዎራይ ቄጼቴስ፤
ኢስታ ዳሮቴይ ቦሌ ማላ፤
ኢስቲ ቆዴታናስ ዳንዳዬቴና።
24 ጊብጼ ማጫ ናያ ዬላታና፤
ፑዴሃ ባጋ ዴሬስ
ኣ ኢሜታና።»
25 ኡባፌ ዎልቃማ ጎዳ ኢስራኤሌ ጾሳይ፥ «ቴቤሴ ጾሳ ኣሞኔ ቦላ፥ ፓሮኔ ቦላ፥ ጊብጼ ቦላኔ ኢዚ ኤቃ ጾሳታ ቦላ፥ ኢዚ ካዎታ ቦላኔ ፓሮኔን ኣማኔቲዛይታ ቦላ ታኒ ቂጻቴ ኤሃና። 26 ኢስታ ዎናስ ኮይዛ ባቢሎኔ ካዎ ናቡካዳናጾሬ ኩሼኒኔ ኢዛ ኦላንቻታ ኩሼን ታ ኣ ኢማና። ጉ ዎዴፔ ጉዬ ጊብጼይ ካሴይሳ ኣሲ ዲዛሶ ጊዳና» ጌስ።
27 «ታ ኦሳንቻ ያቆቤ ያዮፋ፤
ኢስራኤሌ ሺሮቶፓ፤
ታ ኔና ሃሆ ቢታፌ
ኔ ዛሬካ ዲኤቲ
ቢዳሶፔ ኣሻና።
ያቆቤይካ ሲሚዲ
ሳሮቴን ዎፑ ጊ ዳና፤
ኢዛ ባቢሳና ሚሺካ ዴና።46፡27-28 ኤር 30፡10-11
28 ታ ኔናራ ዲዛ ጊሻስ
ታ ኦሳንቻ ያቆቤ ባቦፋ።
ታ ኔና ኢዛን ላሊዳ ካዎቴ
ኡባ ሙሌራ ይሲኮካ
ኔና ጊዲኮ
ሙሌራ ይሲኬ።
ታ ኔስ ቤሲዛ ቂጻቴ ቃጻያና ኣቲን
ሜላ ኣጊኬ» ጌስ ጎዳይ።