ኤርማሳ ቲንቢቴ 4

ማሬታናስ ጼይስ

1 ጎዳይ፥ «ኢስራኤሌ ኣሳዉ!

ሲሚኮ ሃ ታኮ ሲሚቴ።

ኢንቴ ሃራሲዛ ሚሻታ

ታ ሲንፌ ዲጊኮ፥

ያዮንታ ሚኒ ኤቂኮ፥

2 ኢንቴ ቱማን፥

ሱሬቴኒኔ ጺሎቴን፥

‹ዴኦ ጎዳይ ቤዪን!›

ጊዲ ጫቂኮ፥

ሄ ዎዴ ካዎቴቲ

ኢዛን ኣንጄታናኔ

ቦንቼታና» ጌስ።

3 ጎዳይ ዩሁዳ ኣሳሲኔ

ዬሩሳላሜን ዲዛይታስ፥

«ኦ ጋዴ ጎዪቴ፤

ኣጉን ጊዶን ዜሮፒቴ።✝4፡3 ሆሴ 10፡12

4 ኢንቴኖ ዩሁዳ ኣሳቶ፥

ዬሩሳላሜን ዲዛይቶ!

ጎዳስ ኢንቴ ቃጻሬቲቴ፤

ኢንቴ ዎዚና

ኢታቴ ዲጊቴ፤

ሂስቶንታ ኣጊኮ

ኢንቴ ኦዳ

ኢታቴ ጊሻስ

ታ ሃንቆይ ታማ ማላ

ኤጺ ኬዛና፤

ኦኒካ ኢዛ ቶይሳናስ

ዳንዳዬና» ጌስ።

ፑዴሃ ባጋፌ ያና ባሽ

5 ጎዳይ፥ « ‹ቢታ ኡባን

ዛዬ ፑኒቴ!›

ጊዲ ዩሁዳን ዮቲቴ።

ዬሩሳላሜንካ ኣዋጂቴ፤

‹ኢሲፌ ሺቂቴ!

ኣኔ ጊምቤቲዳ ካታማታኮ

ባቃቶስ!› ጊ ዋሲቴ።

6 ጺዮኔ ጌላናስ ባንዲራ ኦይኪቴ!

ኤሶን ባቃቲ ኣቲቴ፤

ኣይስ ጊኮ ታኒ ፑዴሃ ባጋፌ

ሃንቆኔ ባሽ ኤሃና።

7 ጋሞይ ባ ዲዛሶፔ ኬዚዴስ፤

ካዎቴታ

ይሲዛይ ኪቴቲዴስ፤

ኔ ቢታዮካ ቡላሳናስ

ባ ዲዛሶፔ ኬዚዴስ፤

ኔ ካታማቲ ላሌታና፤

ኩንዲዲካ ካይዚ ኣታና።

8 ሄሳ ጊሻስ ማቃ ማይኢቴ፤

ካዮቲሼ፥ ‹ዉ! ዉይ›

ጊ ዬኪቴ።

ኣይስ ጊኮ ጎዳ ሃንቆ ሴላይ

ኑ ቦላፌ ሲሚቤና» ጌስ።

9 ቃሴካ ጎዳይ፥

«ሄ ጋላስ ካዎ ዎዚናይኔ

ሹሜታ ዎዚናይ ታሃና፤

ቄሴቲ ዳጋማና፤

ናቤቲካ ኮኮራና» ጌስ።

10 ሂስቲን ታኒ፥ «ኣቤት ኡባ ሃሪዛ ጎዳዉ! ማሻይ ኢስታ ቆን ዎን፥ ‹ኢንቴስ ሳኣይ ሳሮ ጊዳና› ጋዳ ሃ ኣሳኔ ዬሩሳላሜ ኣይስ ኬሃ ባሌዲ?» ጋዲስ።

11 ሄ ዎዴን ሃ ኣሳሲኔ ዬሩሳላሜስ፥ «ባዞን ዲዛ ኣይኮይ ባይንዳ ዙምቡላታፔ ጹጊዛ ጫርኮይ ታ ዴራ ቦላ ጫርካና፤ ጊዶ ኣቲን ሄሲ ካ ሱራጋናሲኔ ጌሻናስ ጊዴና።

12 ሄሳፌካ ኬሂ ዎልቃሚዛ ጫርኮይ ታ ኣዛዞን ጫርካና፤ ሃኢ ታኒ ኢስታ ቦላ ፒርዳና» ጌቴቲ ዮቴታና።

ሞርኬን ዩሁዳ ዶዴቴ

13 ቤኢቴ! ሞርኬይ ሻራ ማላ

ቢታ ኩሚዴስ፤

ኢዛ ፓራ-ጋሬቲካ

ጎቴ ጫርኮ ማላ ዬቴስ፤

ኢዛ ፓራቲካ

ጎሌ ካፎታ ማላ ኤሶቴቴስ፤

ኣዬ ኣና ኑ ያና ጎስ!

14 ኔኖ ዬሩሳላሜ!

ኔ ኣታና ኮይኮ ኔ ዎዚና

ኢታቴ ሜጬታ፤

ኢታ ቆፋይ ኔ ዎዚናን

ኣይዴ ጋካናስ ጋምኣኔ?

15 ጬንጉርሲ ዳኔፔ ሴቴቴስ፤

ኤፍሬሜ ዙማታ ቦላ

ባሺ ኣዋጄቴስ።

16 «ካዎቴታስ ዮቲቴ፤

ዬሩሳላሜስካ፥

‹ዶዲ ኡንኤዛይቲ

ሃሆ ቢታፌ ያና፤

ዩሁዳ ካታማታ

ቦላካ ጬቄታና፤

17 ኢዛ ታ ቦላ ማካሊዳ ጊሻስ

ካ ናጊዛ ኣሳ ማላ

ኢስቲ ዩሁዳ ጊዶና› ጊቴ።

18 ኔ ሃኖይኔ ኔ ኦሶይ

ሄሳ ኔ ቦላ ኤሂዴስ፤

ሄሲ ኔስ ቂጻቴ፤

ሄሲካ ኣይ ማላ ጫሚዛዜ!

ኣይ ማላ ዎዚና ሜንዛዜ!»

ጌስ ጎዳይ።

19 ዋኖ ታኒ!

ታኒ ሃይሳ ዎስታ ዳንዳያኔ!

ታና ሜቲዴስ!

ታ ዎዚናይ ሂርጌስ፤

ታኒ ጮኡ ጋናስ ዳንዳይኬ።

ኣይስ ጊኮ ታኒ ዛዬ

ጬንጉርሲኔ

ኦላ ጬንጉርስ ሲያዲስ።

20 ኢታ ሚሺ ኢታ ሚሽ ካሌስ፤

ሙሌ ቢታይ ሞሬቲዴስ፤

ታ ዱንካኔቲኔ ማጋላሻቲ

ኤሶን ይዳ።

21 ታኒ ኣይዴ ጋካናስ

ኦላ ማላታ ጼላኔ?

ታ ኣይዴ ጋካናስ

ዛዬ ጊሪስ ሲያኔ?

22 ጎዳይ፥ «ታ ኣሳይ ኤያ፤

ኢስቲ ታና ኤሬቴና።

ኢስቲ ዩሺ ቆፖንታይታ፤

ኢስቲ ኣኬካይ ባይንዳይታ፤

ኢስቲ ኢታ ሚሽ

ኦናስ ኤራንቻታ፤

ሎኦ ኦናስ

ኤራይ ፓጪዳይታ» ጌስ።

23 ታኒ ሳኣ ጼላዳ ሳኣይ

ሎኢ ጊጎንታይሳኔ

ጮ ሜላ ዲዛይሳ ቤኣዲስ።

ቃሴ ሳሎታ ጼላዳ ኢስታን

ፖኦይ ባይንዳይሳ ቤኣዲስ።

24 ታኒ ዙማታ ጼላዳ

ኢስቲ ኮኮሪሺኒኔ

ዙምቡላቲ ኡባይ

ዮንኢዮንኢሺን ቤኣዲስ።

25 ታኒ ጼላዲስ ሺን

ኣይ ኣሲካ ቤኣቤኬ፤

ሳሎ ካፎቲካ ኡባይ

ፒራዲ ይዳ።

26 ኣራዳ ቢታይ

ባዞ ጊዲዳይሳ ቤኣዲስ፤

ጎዳ ሲንን፥

ኢዛ ሱሌ ሃንቆ ሲንን

ሄ ካታማቲካ ላሌቲዳ።

27 ጎዳይ፥ «ሙሌ ቢታይ ቡላታና፤

ጊዶ ኣቲን ታኒ ኢዞ

ሙሌራ ይሲኬ።

28 ሄሳ ጊሻስ ሳኣይ ዬካና፤

ሳሎይካ ማና።

ኣይስ ጊኮ ታኒ ጋዲስ፤

ሄ ቆፋ ታ ላሞንታ ማላ

ቃቻዲስ» ጌስ።

29 ፓራ ኣሳታኔ ዎንዳፌ

ኣሳታ ካቻ ጋሶን

ኣሳይ ካታማ ኡባፌ ባቃታና።

ባጋይ ዎጺዲ ዎራ ጋርስ ጌላና፤

ባጋይ ቃሴ

ዛላ ቦላ ኬዛና፤

ካታማይ ኡባይ ኣሲ ባይንዳ

ካይዚ ኣታና።

30 ሃኔ ባሻስ ኡቲዳሬ!

ኔኒ ኣይ ኦይ?

ኔ ዞኦ ማይኦ ኣይስ ማይኣይ?

ዎርቃ ኣሌቆካ ኣይስ ኣይ?

ኔ ኣይፌ ጪሮ ኣይስ ቲያይ?

ኔኒ ጮ ሜላ

ኔና ሎኤሳ፤

ኔ ላጌቲ ኔና ካዳ፤

ኢስቲ ኔና ዎናስ ኮዬቴስ።

31 ታኒ ኮይሮ ባይራ ና ዬላናስ

ሚጻቲዛ ማጫሳ ማላ

ኔ ዋሲሺን ታ ሲያዲስ፤

ዬሩሳላሜ ማጫ ናያ

ፔኖይ ቱጬታናሼ

ጋካናስ ዋሲሺኒኔ

ባ ኩሼ ሚጫዳ፥

«ታ ዋኖ! ሄኮ ታና

ዎና ጌቴስ!»

ጊሺን ሲያዲስ።