ዬሩሳላሜ ጾኔቴ ጊሻስ ዮቴቲዳ ቲንቢቴ
1 ዩሁዳ ካዎ ሴዴቂያሲ ማልኪያ ና ፓሽኩሬኔ ማኢሳያ ና ቄሴ ሶፎናሳ ኤርማሳኮ ኪቲዳ ዎዴ ጎዳ ቃላይ ኤርማሳኮ ዪዴስ። 2 ኪቴቲዳይቲካ፥ «ባቢሎኔ ካዎ ናቡካዳናጾሬይ ባ ኦላንቻታራ ሃ ካታማ ጊዶዳ ጊሻስ ኣኔ ኑስ ጎዳ ኦይቻ። ጎዳይ ቤኒይሳ ማላ ማላሊሲዛ ኦሶ ኑ ጊሻስ ኦዲ ኢዛ ጉዬ ዛራናኮ ኦኒ ኤሪዜ» ጊ ኦይቺዳ።21፡2 2ካዎ 25፡1-11፤ 2ታሪ 36፡17-21
3 ኤርማሲ ጊዲኮ ኢስታስ፥ «ቢዲ ሴዴቂያሳስ፥ 4 ‹ጎዳ ኢስራኤሌ ጾሳይ ኔና ጊምቤዛፔ ካሬ ባጋራ ዶዲ ኡቲዳ ባቢሎኔ ካዎኔ ኢዛ ኦላንቻታ ኦላናስ ኢንቴ ኩሼን ኢንቴ ኦይኪዳ ኦላ ሚሻ ታኒ ኢንቴ ቦላ ጉዬ ዛራና። ኢስታ ሃ ካታማዮ ዛራ ጌልና። 5 ታኒ ታ ሁኤራ ቂጻቴስ ዴንዳ ኩሼኒኔ ሚኖ ቄሴን፥ ሃንቆኒኔ ባሻን፥ ጊታ ቦሻን ታ ኢንቴና ጫዳና።21፡5 ማቶ 23፡38፤ ሉቃ 13፡35 6 ታኒ ሃ ካታማይን ዲዛ ኣሳኔ ሜሃ ሾጫና፤ ኢስቲካ ኢታ ሃርጌን ዉራና። 7 ሄሳፌ ጉዬ ዩሁዳ ካዎ ሴዴቂያሳኔ ኢዛ ሹሜታ፥ ኢታ ሃርጌፌ፥ ማሻፌኔ ኮሻፔ ኣቲዳ ዴራ ባቢሎኔ ካዎ ናቡካዳናጾሬሲኔ ኢስታ ዎናስ ኮይዛ ሞርኬታስ ታኒ ጎዳይ ኣ ኢማና። ኢዚ ኢስታ ቃራ ማሻን ዎና፤ ኢስታ ማሬና፤ ኢስታስ ሚሼቴናኔ ቃቴና› ጌስ» ጊቴ።
8 ጎዳይ ኤርማሳ፥ «ጉጃዳካ ሃይሳ ዴራስ፥ ‹ጎዳይ ሄኮ ታኒ ኢንቴ ሲንን ዴኦ ኦጌኔ ሃይቆ ኦጌ ዎዲስ። 9 ሃኖ ሃ ካታማይን ታኪዛ ኡባይ ማሻን፥ ኮሻኒኔ ኢታ ሃርጌን ሃይቃና፤ ጊዶ ኣቲን ካታማይፔ ኬዚ ቢዲ ካታማ ዶዲ ኦይኪዳ ባቢሎኔ ኣሳታስ ባ ኩሼ ኢሚዳ ኣሲ ባ ሼምፖ ኣሻናኔ ዴኦን ዳና። 10 ታኒ ሃ ካታማስ ሎኦ ኦናስ ጊዶንታ ኢታ ኦናስ ቃቻዲስ፤ ኢዛ ባቢሎኔ ካዎስ ኣ ኢሜታና፤ ኢዚካ ኢዞ ታማን ጹጋና› ጌስ።
11 «ቃሴካ ዩሁዳ ካዎ ኬ ኣሳስ፥
‹ጎዳ ቃላ ሲዪቴ!
12 ኢንቴኖ ዳዊቴ ሶ ኣሳዉ!
ኢንቴ ኦዳ ኢታ ኦሶ ጋሶን
ኤጺን ኦኒካ ቶይሳና
ዳንዳዮንታ ታማ ማላ
ታ ሃንቆይ ኢንቴ ቦላ
ኤጾንታ ማላ
ዎንታን ዎንታን ሱሬ ፒርዲቴ፤
ቦንቄቲዳይታ ኡንኤዛይታ
ኩሼፔ ኣሺቴ› ጌስ ጋ።
13 ‹ሃኔ ሾባፌ ፑዴ ባጋራ
ሹቺ ዳሪ ዲዛሶን ዲዛ
ዬሩሳላሜ!
ታኒ ኔ ቦላ ዴንዳዲስ፤
ኑ ቦላ ኦኔ ዴንዳናይ?
ኑ ኬ ኦኔ
ጻሊ ጌላናይ?› ጊዛሬ!
14 ታኒ ኔና ኔ ኦሶ ማላ ቃጻያና፤
ታኒ ኔ ዎራን ታማ ዬዳና፤
ኢዛ ዩሾን ዲዛይሳካ
ኡባ ጹጋና» ጌስ።