1 ጎዳ ማታፔ ኤርማሳኮ፥ 2 «ዴንዳዳ ማናሶ ባ፤ ሄን ታ ኔስ ታ ኪታ ዮታና» ጊዛ ቃላይ ዪዴስ። 3 ታኒካ ዱጌ ማናዛሶ ባዲስ፤ ኢዚ ባ ሜዛ ኢርዞ ቦላ ኦቶ ሜሺን ቤኣዲስ። 4 ኢዚ ሜሺን ኦቶዚ ኢዛ ኩሼን ሞሬቲዴስ፤ ሂስቲን ኢዚ ሄ ኡርቃ ዛሪዲ ባ ኮዪዳ ማላ ሜዴስ። 5 ሄ ዎዴ ጎዳ ቃላይ፥ 6 «ኢስራኤሌ ኣሳዉ! ማናዚ ኦዛይሳ ታ ኢንቴና ኦናስ ዳንዳይኪና? ኢስራኤሌ ኣሳዉ! ኡርቃይ ማና ኩሼን ዲዛይሳ ኢንቴካ ታ ኩሼን ዴታ። 7 ታኒ ኢሲ ዴሬይ ዎይኮ ኢሲ ካዎቴ ሾዴታና ማላ፥ ላሌታና ማላኔ ያና ማላ ዮቲኮ፥ 8 ሄ ታኒ ዮቲዳ ካዎቴይ ባ ኢታቴፌ ኣጊዲ ሲሚኮ፥ ታኒ ኢስታ ቦላ ኤሃና ጊዳ ኢታ ሚሽ ኤሆንታ ኣጋጋና። 9 ቃሴ ሃራ ዎዴካ ታኒ ኢሲ ዴሬ ዎይኮ ኢሲ ካዎቴ ሚን ኤሳናስ ዮቲኮ፥ 10 ታ ሲንን ኢታ ሚሽ ኦኮኔ ታስ ኣዛዜቶንታ ኢጺኮ፥ ‹ታ ኢዛስ ኦና› ጊዳ ሎኦ ሚሻ ኡባ ኦንታ ኣጋጋና» ጌስ።

11 ጎዳይ፥ «ሄሳ ጊሻስ፥ ኤርማሳ ሃኢ ዩሁዳ ኣሳታሲኔ ዬሩሳላሜን ዲዛይታስ ባዳ፥ ‹ሄኮ ታኒ ኢንቴ ቦላ ባሽ ጊጊሶ ቦላ ዳይስ፤ ኢንቴ ቦላ ኢታ ሚሽ ሜሼ ዳይስ፤ ሄሳ ጊሻስ ኢንቴ ኡባይካ ኢንቴ ቢዛ ኢታ ኦጌፔ ሲሚቴ፤ ኢንቴ ኦጌኔ ኢንቴ ኦሶ ሱሪሲቴ› ጋ ዮታ። 12 ጊዶ ኣቲን ኢስታስ፥ ‹ዳቡሮፓ፤ ኑ ሃልቺዳ ኦጌራ ባና፤ ኑኒ ኢሶይ ኢሶይ ኑ ኢታ ዎዚና ቆፋ ካላና› ጌቴስ» ጊዴስ።

13 ሄሳ ጊሻስ ጎዳይ፥

«ኣኔ ካዎቴታ፥

‹ሃይሳ ማላ ሚሺ

ኢንቴ ጊዶን ሴቴቲ ኤሪዜ?›

ጊ ኦይቺቴ።

ጌላኦያ ኢስራኤሌይ ሃራሲዛ

ኢታ ሚሽ ኦዱስ።

14 ሹች ጻላ ጊዲዳ

ሊባኖሴ ዙማታ

ቦላፌ ሻቺ ዪ ኤሪዜ?

ላዴ ቦላፌ ዱጌ ጎጊዛ

ኢርጻ ሃ

ጎጌ ኣጊ ኤሪዜ?

15 ታ ዴሬይ ጊዲኮ ታና ባሊዴስ፤

ኢስቲ ጎኦንታ ጾሳታስ

ኤጻኔ ጩዋሴቴስ፤

ባንታ ኦጌራ ቢዲ ጴቲዳ፤

ቤኒ ኦጌፔ ካሬ ኬዚዳ፤

ባሴቶንታ ዲዛ ኩንዱኩርጮ

ኦጌራ ቢዳ።

16 ኢስታ ቢታይ ቡላኔ

ሜርናስ ካቲዳዝ ጊዳና፤

ሄራ ኣዛ

ኡባይ ማላሌታና፤

ባ ሁኤካ ቂሼ ቃና።

17 ኣርሼይ ሞኪዛ ባጋ ጫርኮ ማላ

ታኒ ኢስታ ኢስታ

ሞርኬታ

ሲንን ላላና።

ኢስቲ ይዛ ጋላስ ታ ኢስታስ

ዞኮ ዛራና ኣቲን

ታ ኣይፌሶ ቤሲኬ» ጌስ።

18 ኢስቲካ፥ «ኣኔ ሃ ዪቴ፤ ኤርማሳ ቦላ ማቄቶስ፤ ዎጋይ ቄሴታ ኣቻን፥ ዞሬይ ኣ ኤራንቻታ ኣቻን፥ ቃላይካ ናቤታ ኣቻን ዬና፤ ኣኔ ሃ ዪቴ፤ ኑ ኢንጻርሳን ኢዛ ቶቾስ፤ ኢዚ ጊዛይሳካ ኡባ ሲዮኮ» ጊዳ።

19 ኣቤት ጎዳዉ! ታ ጊዛዝ ሲያ፤

ታ ሞርኬቲ ታ ቦላ

ሃሳይዛይሳ ኤዝጋ።

20 ሎኦ ኦዳዴስ ኢታ ዛሪዞ?

ኢስቲ ጊዲኮ

ታስ ኦላ ቦኪዳ፤

ኔ ሃንቆይ ኢስታፌ ሲማና ማላ

ኔ ሲንን ኤቃዳ

ኢስታ ጊሻስ

ታ ዮቲዳይሳ ቆፓ።

21 ሄሳ ጊሻስ

ኢስታ ናይታ ኮሻሲኔ

ማሻስ ኣ ኢማ፤

ኢስታ ማጫሳቲ ማይኔኔ

ኣምኤታ ጊዴቶ፤

ኢስታ ኣቱማሳቲካ

ፓራ ሃይቆን ዉሬቶ፤

ኢስታ ናቴ ናይቲ

ኦላሶን ማሻስ ጊዴቶ

22 ኢስቲ ታና ኩንዲሳናስ

ኦላ ቦኪዛ ጊሻሲኔ

ታ ቶሆስካ ዎጺማዴ

ዎዳ ጊሻስ

ኢስቲ ቆፖንታ ኔኒ ኢስታ ቦላ

ቦንቂዛይታ ዬዲን

ኢስታ ኬን ዋሶይ ኬዞ።

23 ጊዶ ኣቲን ኣቤት ጎዳዉ!

ኢስቲ ታና ዎናስ ማቄቲዳይሳ

ኡባ ኔኒ ኤራሳ፤

ኔኒ ኢስታ ኢታቴ

ኣቶ ጎፓ፥

ዎይኮ ኢስታ ናጋራ

ኔ ሲንፌ ቁጮፋ፤

ኢስቲ ኔ ሲንን

ጾኔቲዲ ኩንዴቶ፤

ኔ ሃንቆ ጋላስ

ኔ ኢስታ ማሮፓ።