ኤርማሳኔ ዎርዶ ናቤ ሃናኒያ
1 ሄ ዎዴ ዩሁዳ ካዎ ሴዴቂያሲ ካዎቲዳ ኦይዳን ላይን ኢቻሻን ኣጊናን ጌባኦኔ ኣስ ኣዙሬ ና ናቤ ሃናኒያይ ጎዳ ኬን ቄሴታ ሲንኒኔ ዴሬ ኡባ ሲንን ታስ፥28፡1 2ካዎ 24፡18-20፤ 2ታሪ 36፡11-13 2 «ኡባፌ ዎልቃማ ጎዳ ኢስራኤሌ ጾሳይ፥ ‹ባቢሎኔ ካዎይ ኢንቴና ቶሲዳ ቃምባራ ታ ሜንና። 3 ባቢሎኔ ካዎ ናቡካዳናጾሬይ ጎዳ ኬፌ ዲኢ ኤኪዲ ኤፊዳ ሚሻታ ኡባ ታኒ ናምኡ ላይ ጊዶን ዛራዳ ሃ ሶሆ ኤሃና። 4 ቃሴ ታኒ ዩሁዳ ካዎ ኢዮኣቄሜ ና ኢኮኒያኔኔ ዩሁዳፔ ዲኤቲዲ ባቢሎኔ ቢዳ ኣሳ ኡባ ዛራዳ ሃ ሶሆ ኤሃና። ጋሶይካ ባቢሎኔ ካዎይ ኢንቴና ቶሲዳ ቃምባራ ታ ሜንና› ጌስ» ጊዴስ።
5 ሂስቲን ጎዳ ኬ ጊዶን ኤቂዳ ቄሴታ ሲንኒኔ ዴራ ሲንን ናቤ ኤርማሲ ናቤ ሃናኒያስ፥ 6 «ኣሚን! ጎዳይ ኦ! ጎዳ ኬ ሚሻታኔ ዲኤቲዲ ቢዳ ኣሳ ኡባ ባቢሎኔፔ ዛሪ ኤሂዲ ጎዳይ ባ ዮቲዳ ቃላ ፖሎ! 7 ጊዲኮካ ኣኔ ታ ኔሲኔ ሃ ኣሳስ ዮቲዛ ቃላ ሲያ። 8 ኔፔኔ ታፔ ካሴ ሲንን ዴኢዳ ናቤቲ ዳሮ ዴሬታ ቦላኔ ጊታ ካዎቴታ ቦላ ኦላ ጊሻስ፥ ባሻ ጊሻሲኔ ኢታ ሃርጌ ጊሻስ ቲንቢቴ ዮቲዳ። 9 ጊዶ ኣቲን ሳሮቴ ጊሻስ ቲንቢቴ ዮቲዳ ናቤይ ኢዚ ዮቲዳ ቃላይ ፖሌቲዛ ዎዴ ቱማፔ ጎዳይ ኢዛ ኪቲዳይሲ ሄሳን ኤሬቴስ» ጊዴስ።
10 ሄሳፌ ጉዬ ናቤ ሃናኒያይ ናቤ ኤርማሳ ሞርጌፌ ቃምባራ ኤኪዲ ሜንዴስ። 11 ሂስቲዲ ሃናኒያይ ኣሳ ኡባ ሲንን፥ «ጎዳይ፥ ‹ታኒ ናምኡ ላይታ ጊዶን ባቢሎኔ ካዎ ናቡካዳናጾሬ ቃምባራ ካዎቴታ ኡባ ሞርጌፌ ዴንዳ ሃይሳ ሜንና› ጌስ» ጊዴስ። ሄ ዎዴ ናቤ ኤርማሲ ኣጋጊዲ ባ ኦጌ ቢዴስ።
12 ናቤ ሃናኒያይ ናቤ ኤርማሳ ሞርጌፌ ቃምባራ ሜንዳ ጉ ዎዴፔ ጉዬ ጎዳ ቃላይ ናቤ ኤርማሳኮ ዪዲ፥ 13 «ባዳ ሃናኒያስ፥ ‹ኔኒ ሚ ቃምባራ ሜንዳሳ፤ ታኒ ጊዲኮ ኢዛ ጊሻስ ቢራታ ቃምባራ ጊጊሳና› ጌስ ጎዳይ ጋዳ ዮታ። 14 ቃሴካ ኡባፌ ዎልቃማ ጎዳ ኢስራኤሌ ጾሳይ፥ ‹ባቢሎኔ ካዎ ናቡካዳናጾሬስ ሃጋዛና ማላ ታኒ ሃ ካዎቴታ ኡባ ሞርጌን ቢራታ ቃምባራ ዎና፤ ኢስቲካ ኢዛስ ሃሬታና። ሃራይ ኣቶሺን ዎራ ዶኣታ ቦላካ ጎዳቴ ኢዛስ ኢማና› ጌስ» ጊዴስ።
15 ሄሳፌ ጉዬ ናቤ ኤርማሲ ናቤ ሃናኒያስ፥ «ሃናኒያ ሲያ! ጎዳይ ኔና ኪቲቤና፤ ጊዶ ኣቲን ኔኒ ሃ ኣሳይ ዎርዶ ሚሻን ኣማኔታና ማላ ኦዳሳ። 16 ሄሳ ጊሻስ ጎዳይ፥ ‹ታኒ ኔና ሃ ሳኣ ቦላፌ ዲጋና፤ ኔኒ ጎዳ ቦላ ማካላ ሃሳይዳ ጊሻስ ኔ ሃ ላይ ሃይቃና› ጌስ» ጊዴስ።
17 ናቤ ሃናኒያይ ሄ ላይ ላፑን ኣጊናን ሃይቂዴስ።