ኤርማሳ ቲንቢቴ 47

ፊሊስጼሜ ጊሻስ ዮቴቲዳ ኪታ

1 ፓሮኔይ ጋዛ ኦሊ ኦይካናፔ ካሴ ፊሊስጼሜታ ጊሻስ ጎዳፔ ኤርማሳኮ ዪዳ ቃላይ ሃይሳፌ ካሊ ዲዛይሳ።✝47፡1-7 ኢሳ 14፡29-31፤ ሂዚ 25፡15-17፤ ኢዩ 3፡4-8፤ ኣሞ 1፡6-8፤ ሶፎ 2፡4-7፤ ዛካ 9፡5-7

2 ጎዳይ፥ «ቤኢቴ፥ ፑዴሃ ባጋን

ሃ ኩሚ ኩሚ ቤስ፤

ዎልቃማ ዲኦ ጊዳና፤

ዴሬዮኔ ኢዚ ጊዶን

ዲዛይታ ኡባ

ኢዚ ካታማታኔ

ካታማታን ዲዛ

ኣሳ ኡባ ሚታና።

ዴሬዚካ ባ ቃላ

ቁ ሂስቲ ዋሳና፤

ሄ ቢታን ዲዛ ኣሳይ ኡባይ

ጫሞ ዬሆ ዬካና።

3 ፓራ ቶሆ ጊሪሲ

ሞርኬ ፓራ-ጋሬታ ዋሶ፥

ፓራ-ጋሬታ ቶሆይ ጌንዴሪሼ

ጊሪዛ ጊሪሳ ጋሶን

ኣዋቲ ባንታ ናይታ ኣሻናስ

ጉዬ ሲሚ ጼሌቴና፤

ኢስታ ኩሼይካ ሲላ ጊዳና።

4 ፊሊስጼሜ ኣሳ ኡባ ይሳናስ፥

ባስ ኣቲዲ ሃራታ ማዲዛይታ

ኡባ ጺሮሴፔኔ

ሲዶናፔ ዱ ኣሻናስ

ዎዴይ ጋኪዴስ።

ጎዳይ ካፍቶሬ ጋጻን

ኣቲዳ ፊሊስጼሜ ኣሳ

ይሳና ዴንዲዴስ።

5 ጋዛይ ካዮስ

ባ ቢናና ሜዴታና፤

ኣስቄሎናይ ባ ዶና ቦላ

ኩሼ ዎና፤

ኢንቴኖ ዴምባ ቦላ

ጫሻ ኣቲዳይቶ!

ኢንቴ ኣይዴ ጋካናስ

ኢንቴ ቦላ ቃጪሼ ዳኔ?

6 «ኢንቴ፥ ‹ኔኖ ጎዳ ማሻዉ!

ኔ ኣይዴ ሼምፓኔ?

ኔ ኮሆን ሲማ ጌላ፤

ኔኒ ጮኡ ጋዳ ኡታ› ጋና።

7 ጊዶ ኣቲን ጎዳይ ኣስቄሎናኔ

ኣባ ጋጻ ኦላና ማላ ኣዛዚሺን

ዋኒ ሼምፓናስ

ዳንዳዬቲዜ?» ጌስ።