1 ኡባፌ ዎልቃማ ጎዳይ፥ «ሄ ዎዴን ዩሁዳ ካዎታ ሜቄ፥ ሹሜታ ሜቄ፥ ቄሴታ ሜቄ፥ ናቤታ ሜቄኔ ዬሩሳላሜን ዲዛ ኣሳታ ሜቄ ኡባይ ዱፎፔ ማጼቲዲ ኬዛና። 2 ሂስቲዲ ኢስቲ ሲቂዳ፥ ኪቴቲዳ፥ ካሊዳ፥ ዞሬ ኦይቺዳኔ ጎይኒዳ ኣርሼ ሲንን፥ ኣጊና ሲንኒኔ ሳሎ ጾሊንቴታ ኡባ ሲንን ሚጬታና። ኢስታ ሜቄይ ሺቄና ዎይኮ ሞጌቴና፤ ጊዶ ኣቲን ቢታ ቦላ ኦሌቲዳ ቡራ ማላ ጊዳና። 3 ሃ ኢታ ኣሳ ኩሼፔ ኣቲዳይቲ ኡባይ ታ ኢስታ ጎዳ ዬዲዳሶ ኡባን ዴኦፔ ሃይቆ ዶራና» ጌስ።
ናጋራ ጋሶን ጋኪዛ ቂጻቴ
4 ጎዳይ ታና፥ «ኣሳስ፥ ‹ኣሲ ኩንዲኮ ኩንዲዳሶሆፔ ሲሚዲ ዴንዴኔ?
ዎይኮ ኣሲ ባሊዳ ጊዲኮ
ጉዬፔ ባ ባላፔ ሲሜኔ?
5 ሂስቲን ሃይሲ ዴሬዚ
ኣይስ ጉዬ ሲሚ ቢዜ?
ዬሩሳላሜይ ኣይስ ኡባቶ
ጉዬ ሲማዜ?
ኢስቲ ጌኔ ኦሶ ሚን ኦይኪዳ፤
ሲማናስካ ኮዬቴና።
6 ታኒ ኢስታ ሎኤ ኤዝጋዲስ፤
ኢስቲ ሱሬ ሃሳዬቴና፤
ታ ኣይ ኦዲና?› ጌስ።
ጊዶ ኣቲን ባ ኢታ ኦሶ
ፓጺዛይ ኢሶይካ ዴና፤
ኦላስ ዲርጊዛ ፓራ ማላ
ኡባይካ ባስ ባስ ዎጼስ።
7 ሺሜላ ጌቴቲዛ ካፎቲ
ባንቲ ሲሚዛ ዎዴ ኤሬቴስ፤
ሃራጴቲ፥ ዳጊጬቲኔ
ዋላ ጌቴቲዛ ካፎቲ
ባ ዴንዲ ቢዛ ዎዴ ኤሬቴስ፤
ጊዶ ኣቲን ታ ዴሬይ
ጎዳ ዎጋ ኤሪቤና።8፡7 ዳጊጬይ ካፎ ቆሞ ጊዲዳይሳ ቆንጪሴስ።
8 ዎርዳንቻ ጻፌቲ ባንታ ቢኢሬን
ታ ዎጋ ዎርዶራ ጻፊዳ፤
ሂስቲን ዋኒዲ፥
‹ኑኒ ኣ ኤራንቻ፤
ጎዳ ዎጋይ
ኑናራ ዴስ› ጌቲ?
9 ኣ ኤራንቻቲ ዬላታና፤
ኢስቲ ካዉያናኔ
ዎጺማዴን ኦይኬታና።
ጎዳ ቃላራ
ኢስቲ ኤቄቲቺን
ኢስታስ ኣዛ ኤራቴ ዲዜ?
10 ሄሳ ጊሻስ ታኒ ኢስታ ማቼታ
ሃራ ኣዚናታስ፥
ኢስታ ቢታታካ
ኣላጋታስ ኢማና፤
ጉይካ ጊታይካ ኡባይ
ባንታ ጎኣስ ዪቄቴቴስ።
ናቤቲኔ ቄሴቲካ ኡባይ
ኣስ ባሌቴስ።
11 ኢስቲ ታ ዴሬዛ ማዱን
ቄሪ ሚሻን ቆዲዲ
ማዶንታ ሌ ኢሜቴስ፤
ሳሮይ ባይንዳ፥
‹ሳሮ፥ ሳሮ› ጌቴስ።8፡11 ሂዚ 13፡10
12 ቱና ኦሶ ኦዲ ዬላቲዶ?
ቺ! ሙሌካ ዬላቲቤቴና።
ኢስቲ ዬላይ ኣዛኮካ ኤሬቴና።
ሄሳ ጊሻስ
ኢስቲካ ኩንዲዳይታራ
ኢሲፌ ኩንዳና፤
ታ ኢስታ ቃጻዪዛ ዎዴ
ኢስቲ ካዉያና» ጌስ።8፡10-12 ኤር 6፡12-15
13 ጎዳይ፥ «ኢስቲ ጎዪ ኬሲዳ
ካ ኡባ
ታ ኢስታፌ ኤካይቻና፤
ኢስታ ዎይኔ ቱራን
ኣይፌይ ያና፤
ባላሴ ሚካ ኣይፌ ኢሜና፤
ኢስታ ቦንጮቲካ ቆካና፤
ታኒ ኢስታስ ኢሚዳይሲ
ኢስታፌ ኤኬቲቻና» ጌስ።
14 ሂስቲን ኣሳቲ፥
«ኑኒ ሃይሳን ኣይስ ኡቲኖ?
ኣኔ ኢሲ ቦላ ሺቂቴ፤
ጊምቤቲ ኡቲዳ ካታማታን
ባቃቲ ቢዲ ሄን ሃይቆስ፤
ጎዳ ኑ ጾሳይ ኑና
ሃይቃና ማላ ፒርዲዴስ፤
ኑኒ ኢዛ ቦላ
ናጋራ ኦዳ ጊሻስ
ኑ ኡያና ማላ ማርዜራ ዲዛ
ሃ ኢሚዴስ።
15 ‹ሳሮይ ያና› ጊዲ
ሂዶታ ኦዶስ፤
ጊዶ ኣቲን
ሎኦ ሚሺ ዪቤና።
‹ኑኒ ፓጻና› ጊዲ ኣሞቲዶስ፤
ጊዶ ኣቲን ዳጋማ ጻላ ጊዲዴስ።
16 ሞርኬታ ፓራ ፔኖይ
ዳኔ ካታማፔ ሲዬቴስ፤
ኢስታ ዎዳላ ፓራታ ጫሻን
ቢታይ ኡባይ ቃጼስ፤
ቢታዮኔ ቢታይ ቦላ
ዲዛ ኡባ፥
ካታማዮኔ ኢዚን ዲዛ ኡባ
ሚታናስ ዪዳ» ጌቴስ።
17 ጎዳይ፥ «ቤኢቴ፥
ታኒ ማርዜራ ዲዛ ሾሻታ፥
ሙሬኒዛይታ ሂላቴ
ቴቃናስ ዳንዳዮንታ
ሃሶ ሾሻታ
ኢንቴ ጊዶ ዬዳና፤
ኢስቲ ኢንቴና ዱካና» ጌስ።
ኤርማሲ ዴራስ ጬጪዳ ጬጬ
18 ታ ጬጪዛ ዎዴ
ታና ሚንዛይሶ!
ታ ዎዚናይ ኬሂ ሜቂዴስ።
19 ታ ኣሳይ ሃሆ ቢታን ዲሼ
ዋሲዛ ዋሶ ሲያ።
ኢስቲ፥ «ጎዳይ ጺዮኔን ዴኔ?
ኢዚ ካዎይካ ሄን ዴኔ?»
ጊዲ ዋሴቴስ።
ሂስቲን ጎዳይ ኢዛስ፥
«ኢስቲ ባስ ማሲዳ ሚስሌታን፥
ሃዳ ጊዲዳ ኤቃ ጾሳታን
ታና ኣይስ ሃንቄዶ?» ጌስ።
20 ሂስቲን ኣሳይ፥
«ሄኮ ካ ሺሾ
ዎዴይ ኣዴስ፤
ቦኔይካ ዉሪዴስ፤
ኑኒካ ኣቲቤኮ»
ጊዲ ዋሴቴስ።
21 ታ ዴሬይ ማዱንጺሺን
ታኒካ ማዱንጻዲስ፤
ዬካዲሲኔ ዳጋማዲስ።
22 ጋላኣዴን ቲዪዛ ሌይ ዴኔ?
ዎይኮ ሄን ኣኪሜይ ዴኔ?
ሂስቲን ታ ዴራ ማዱን
ኣይስ ፓጺቤኔ?