ባቢሎኔ ዮ ጊሻስ ዮቴቲዳ ኪታ
1 ጎዳይ፥ «ቤኢቴ! ባቢሎኔኔ
ኢዚን ዲዛይታ ቦላ
ይሲዛ ጫርኮ ታኒ ዬዳና።
2 ኢዞ ሱራጋናሲኔ
ኢዞ ይሳናስ ኣላጋታ
ታ ባቢሎኔ ቦላ ኪታና፤
ኢዛ ሜቶቲዳ ጋላስ
ኢዞ ዶዲ ኦይኪዲ ኡንኤና።
3 ዎንዳፌ ዱኪዛይቲ
ባ ዎንዳፌ ዱካናስ፥
ባ ኦላ ማይኦ
ማይኣና ጋካናስ
ሼምፖ ኢሞፍቴ፤
ናቴ ኢዚ ናይታስ ቃቶፍቴ፤
ኢዚ ኦላንቻታ ሙሌራ ይሲቴ።
4 ኢስቲ ባቢሎኔ ቢታን ሲፌቲዲ፥
ኢዚ ኦጌታን ሃይቃና ጋካናስ
ማዱንጺዲ ኩንዳና።
5 ኢስታ ቢታያ ኢስራኤሌ
ጌሻ ሲንን
ሞሮን ኩሚዳ ጊዲኮካ
ኢስራኤሌኔ ዩሁዳ ኡባፌ
ዎልቃማ ጎዳይ ኢስታ ጾሳይ
ኢስታ ዬጊ ኣጊቤና።
6 «ባቢሎኔፔ ባቃቲ ኬዚቴ!
ኤሌሊዲ ኢንቴ ሼምፖ ኣሺቴ፤
ኢዚ ናጋራ ጋሶን ዮፒቴ፤
ሃይሲ ጎዳይ ሃሎ ኬሲዛ ዎዴ
ኢዚ ኦሶ ማላ ኢዚስ ኢማና።
7 ባቢሎኔይ ጎዳ ኩሼን
ዎርቃ ጹኣ፤
ቢታ ኡባ ማሳዱስ፤
ካዎቴቲ ኡባይ
ኢዚ ዎይኔ ኡሻ ኡዪዳ፤
ሄሳ ጊሻስ ሃኢ ጎዪዳ።51፡7 ኣጁ 17፡2-4፤ 18፡3
8 ባቢሎኔይ ቆፖንታ ዳሼ
ኩንዳ ሜቃና፤
ሄሳ ጊሻስ ኢዚስ ዋሲቴ!
ኦኔ ኤሪዛይ ኢዛ ፓጻናኮ
ኢዚ ማዱንስካ ሌ ኮዪቴ።
9 «ኣሳይ፥ ‹ኑኒ ባቢሎኔ
ፓናስ ባጼቲዶስ፤
ኢዛ ጊዲኮ ፓጻና ዳንዳዩኩ፤
ኢዚ ፒርዳይ
ፑዴ ሳሎ ጋኪዳ ጊሻስ
ሻራን ጋካናስካ
ቁ ጊዳ ጊሻስ
ኢዞ ኣጋጊዲ ኣኔ
ኑ ዴሬ ዴሬ ሲሞስ።51፡9 ኣጁ 18፡5
10 ጎዳይ ኑ ሱሬቴ ጊሻስ
ማርካቲዴስ፤
ኣኔ ሃ ዪቴ፤ ጎዳ ኑ ጾሳይ
ኦዳይሳ
ጺዮኔን ኣዋጆስ› ጊዴስ።
11 «ቶራታ ሌፍቴ፤
ጎንዳሌታካ ጊግሲቴ፤
ጎዳይ ባቢሎኔ ይሳና
ቆፒዳ ጊሻስ
ሜዶኔ ካዎታ ዴንዴስ፤
ጎዳይ ሃሎ ኬሳና፤
ባ ኬ ጊሻስ
ሃሎ ኬሳና።
12 ባቢሎኔ ጊምቤታ ቦላ
ማላታ ኤሲቴ፤
ሚን ናጊቴ፤
ዛቤ ናጊዛይታ ኤሲቴ፤
ዛማዲ ኡቲዲ ኦሊዛይታ ጊግሲቴ።
ጎዳይ ባቢሎኔ ኣሳ ቦላ
ቆፒዳ ቆፋኔ ባ ሃልቾ ፖላና።
13 ሃኔ ዳሮ ሻፋታ
ማታን ዲዛሬ!
ኣቆታን ኬሃ ዱሬቲዳሬ!
ኔ ያና ዎዴይ ጋኪዴስ፤
ኔስ ዉርሴ ጋኪዴስ» ጌስ።51፡13 ኣጁ 17፡1
14 ጎዳይ ኡባፌ
ዎልቃማ ጾሳይ፥
«ቦሌይ ቢታ ኩሚዛ ማላ
ዳሮ ኣስ ታ ኔ ቦላ ዬዳና፤
ሄይቲ ኔና ጾኒዳ ኡፋይሳፌ
ዴንዲዳይሳን ኔ ቦላ
ጬቄታና» ጊዲ
ባ ሱንን ጫቂዴስ።
ጋላታ ዬ
15 «ጾሲ ባ ዎልቃን
ሳኣ ሜዴስ፤
ባ ኣ ኤራቴን
ኣላሜ ጊግሲዴስ፤
ሳሎታካ ባ ኣኬካን ሚጪዴስ።
16 ኢዚ ባ ጬንጉርሳ ሲሲዛ ዎዴ
ሳሎን ዲዛ
ሃቲ ጉሜቴስ፤
ሻራታ ኢዚ ሳኣ ጋጻፔ ኤሄስ፤
ኢራራ ዎልቃን ኪቴስ፤
ባ ሚንጃሶሆፔካ
ጫርኮ ኪቴስ።
17 «ኣስ ኡባይ ዳማኔ
ኤራቴ ባይንዳይሳ ጊዲዴስ፤
ዎርቃ ሴሪሲዛይቲ ኡባይ
ባ ኦዳ
ኤቃ ሚስሌታን ዬላቲዳ፤
ኢስቲ ጊግሲዳ ሚስሌቲ ዎርዶኔ
ሼምፖይ ባይንዳይታ።
18 ኢስቲ ሃዳኔ ካቲዳይታ፤
ኢስታ ቦላ ፒርዳይ ዪዛ ዎዴ
ኢስቲ ያና።
19 ያቆቤ ቃዳይ ጊዲኮ
ሄይታንታ ማላ ጊዴና፤
ኢዚ ኡባ ሜዳይሳ፤
ኢስራኤሌ ኣሳይ
ኢዚ ባስ ዶሪዳ ዴሬ፤
ኢዛ ሱን ጎዳ
ኡባፌ ዎልቃማ ጾሳ» ጌስ።
ጾሳ ጻምኣ
20 ጎዳይ፥ «ባቢሎኔ
ኔኒ ታ ጻምኣኔ ኦላ ማሳራ፤
ኔናን ጎኤታዳ
ታኒ ዴሬ ኡባ
ሜንሬዲስ፤
ቃሴ ካዎቴታካ
ይሳዲስ።
21 ኔናን ፓራታኔ
ፓራ ቶጊዛይታ ይሳዲስ፤
ፓራ-ጋሬታኔ
ኢስታ ላጊዛይታ
ሜንሬዲስ።
22 ኔናን ማጫሳታኔ
ኣቱማሳታ ሜንሬዲስ፤
ጪማታኔ ናቴታ
ሜንሬዲስ፤
ፓንታኔ ጌላኦታ
ሜንሬዲስ።
23 ኔናን ሄንንቻታኔ
ዉዴታ ሜንሬዲስ፤
ጎሻንቻታኔ ቦራታ
ሜንሬዲስ፤
ዴሬ ሃሪዛይታኔ ሹሜታ
ሜንሬዲስ» ጌስ።
ባቢሎኔ ቦላ ዪዛ ቂጻቴ
24 ጎዳይ፥ «ጺዮኔ ቦላ
ኢስቲ ኦዳ ኢታ ኦሶ ጊሻስ
ባቢሎኔሲኔ ኢዚን ዲዛ ኡባስ
ኢንቴ ኢንቴ ኣይፌን ቤኢሺን
ኢስታ ኦሶ ማላ
ታ ኢስታስ ኢማና» ጌስ።
25 ጎዳይ፥ «ሃኔ ይሲዛ ዙማዬ!
ቢታ ኡባ ይሲዛሬ!
ታ ኔ ሁኤ ቦላ ዳይስ፤
ታኒ ታ ኩሼ
ኔ ቦላ ዴንና፤
ታ ኔና ኣፎ ሁኤፔ
ዱጌ ቡሉላና፤
ታ ኔና ጹጌቲዳ
ዙማ ሂስታና።
26 ኔፔ ዮቻ ሹቺ ቤቴና፤
ጉላስ ጊዲዛ
ሹቺ ኤኬቴና፤
ኔኒ ሜርናስ ቡላ ጊዳና» ጌስ።
27 «ቢታ ኡባ ቦላ
ባንዲራ ዴንቴ፤
ካዎቴታ ጊዶን
ዛዬ ፑኒቴ፤
ካዎቴታ ኢዚ ቦላ
ኦላስ ጊግሲቴ፤
ኣራራቴ፥ ሚናኔኔ
ኣሽኬናዜ ካዎታ
ኦላስ ኢዚ ቦላ ጼይጊ ሺሺቴ፤
ኦላ ጋዳዋ ኢዚ ቦላ ሹሚቴ፤
ቦሌ ዉዴ ማላ
ፓራታ ኢዚ ቦላ ዬዲቴ።
28 ሜዶኔ ካዎታ፥
ኢዞ ኣይሲዛይታኔ
ኢዚ ሹሜታ ኡባ፥
ኢስቲ ሃሪዛሶን ዲዛ
ካዎቴታ ኡባ
ኢዚ ቦላ ኦላስ ጊግሲቴ።
29 ባቢሎኔ ኦኒካ ዶንታ
ባዞ ቢታ ሂስታናስ
ጎዳይ ቆፒዳ ቆፋይ
ፖሌታና ዎዴይ ጋኪዳ ጊሻስ
ቢታይ ኮኮሬስ፤
ሜቶንካ ፖፖርቁ ጌስ።
30 ባቢሎኔ ኦላንቻቲ ኦላ ኣጊዳ፤
ባንታ ሚጻን ኡቲዳ፤
ኢስታስ ዎልቃይ ዉሪዴስ፤
ኢስቲ ማጫሳ ማላ ጊዲዳ፤
ኢስታ ኬቲካ ጹጌቲዳ፤
ኢዚ ፔንጌ ኮላታቲ ሜቄሬቲዳ።
31 ካታማያ ሙሌራ ኦይኬቲዳይሳ
ባቢሎኔ ካዎስ ዮታናስ
ኢሲ ዮምባይ ሃራ ዮምባስ፥
ኢሲ ቃስታኔይ ሃራ ቃስታኔስ
ሄራካ ቶሆ ቦላ ካሌስ።
32 ሻፋ ፒኒዛ ፑርዴቲ
ኦይኬቲዳይሳ፥
ሻፋ ማታን ዲዛ ሚጻቲ
ጹጌቲዳይሳ፥
ኢስታ ዎታዳራቲ ባቦን
ቡልኣኬቲዳይሳ፥
ዳጋሚዳይሳ ዮታናስ
ዎጼሬቴቴስ» ጌስ።
33 ኡባፌ ዎልቃማ ጎዳ
ኢስራኤሌ ጾሳይ፥
«ባቢሎኔ ማጫ ናይቲ
ካ ቡካናስ ጊጊዛ ባሌ ማላ፤
ካ ሺሾ ዎዴይ ኢዚ ቦላ
ኤሶን ጋካና» ጌስ።
34 ባቢሎኔ ካዎ
ናቡካዳናጾሬይ
ዬሩሳላሜ ኣቆታ ቦንቂዴስ፤
ጋጪ ሊቂሲዴስ፤
ኣይኮይ ባይንዳ
ካይሳ ኦቶ ኬሲዴስ፤
ዳዌይ ሚቲዛ ማላ
ዴራ ሚቲዴስ፤
ማልኦ ሚዛ ማላ ሚዲ
ጉዬፔ ኑና ኬሲ ጩቲዴስ።
35 ሄሳ ጊሻስ ጺዮኔ ኣሳይ፥
«ኑ ቦላ ጋኪዳ ጌኔይ
ባቢሎኔ ቦላ ጋኮ» ጌስ፤
ዬሩሳላሜይ፥ «ኑ ሱ
ባቢሎኔን ዲዛ
ኣሳታ ቦላ ጊዶ» ጋዉስ።
36 ሄሳ ጊሻስ ጎዳይ፥
«ኔ ጊሻስ ታ ሞቴታና፤
ኔ ሃሎካ ኬሳና፤
ኢዚ ኣባኔ ፑልቶ ሃታ
ታ ሜሊሳና።
37 ባቢሎኔይ ላሌ
ዶሬቲዛሶ ጊዳና፤
ዎራካናቲ ካኢዛሶ ጊዳና፤
ዳጋማሲኔ ቂስ
ማላታ ጊዳና፤
ኦኒካ ኢዚን ዴና።
38 ኢዚን ዲዛ ኣሳይ
ዎዳላ ጋሞ
ማላ ጻጌስ፤
ጋሞ ማራ ማላ ዳሬስ፤
ኢስቲ ሆኤቲ ዴንዴቲሺን
ታ ኢስታስ ጊቢራ ጊጊሳና፤
ኢስቲ ማታና ማላ ኦና።
39 ሚጪሼ ሜርናስ ቤጎንታ
ስኮ ስካና።
40 ላቃ ማላ፥ ርሾ ማላኔ
ኮርቤ ማላ
ታ ኢስታ ሹካስ ኤፋና።
41 «ሼሻካ ዋና ዲኤታዴ!51፡41 ሼሻካይ ባቢሎኔ ካታማ ጉሳ።
ሳኣ ኡባይ ኢዚን ጬቄቲዛራ
ዋና ኦይኬታዴ!
ባቢሎኔይ ካዎቴታ
ኡባ ሲንን
ኣይ ማላ ዳጋንዛዝ ጊዳዴ!
42 ኣባይ ባቢሎኔ ቦላ ኬዛና፤
ዳምባላይካ ጉሚሼ
ኢዞ ሚታና
43 ኢዚ ካታማቲ ኣሲ ባይንዳሶ፥
ኣሲ ሞኪ ጼሎንታሶ፥
ሜላኔ ባዞ ቢታ፥
ኣይኮይ ባይንዳ
ቡላ ቢታ ጊዳና።
44 ቤሌ ታኒ ባቢሎኔን ቃጻያና፤
ኢዚ ሚቲዳይሳካ ታ ጮሻና፤
ሃይሳፌ ካዎቴይ
ኢዛኮ ጎጌና፤
ባቢሎኔ ጊምቤይ ኩንዳና።
45 ታ ዴሬቶ! ኢዚፔ ኬዚቴ፤
ኢንቴ ሼምፖ ኣሺቴ፤
ያሺዛ ጎዳ ሃንቆፌ
ኬሲ ኤኪ ኣቲቴ።
46 ዎሬይ ቢታይን ሴቴቲሺን
ሂዶታ ቃንጾፍቴኔ ባቦፍቴ፤
ካዎይ ካዎ ቦላ ዴንዲዛይሳ፥
ማካላቴ ቢታይ ቦላ
ዲዛይሳ ኢሲ ዎሬይ ሃ ላይን፥
ሃራይ ላይ ካሊዲ ያና።
47 ቱማፔ ታኒ ባቢሎኔ
ኤቃ ጾሳታ
ቃጻያና ዎዴይ ያና፤
ቢታያ ኩሜ ካዉያና፤
ሲፌቲዳይቲ ኡባይ
ኢዚን ፖርጩ ጊ ኩንዳና።
48 ይሲዛይቲ ፑዴሃ ባጋፌ ዪዲ
ኢዞ ኦሊዛ ጊሻስ
ሳሎይኔ ሳኣይ
ቃሴ ኢስታ ጊዶን ዲዛ ኡባይ
ባቢሎኔ ቦላ
ኢሊሊ ጋና» ጌስ።51፡48 ኣጁ 18፡20
49 ጎዳይ፥ «ቢታ ኡባን ሲፌቲዳይቲ፥
ባቢሎኔ ጋሶን ኩንዲዳ ማላ
ኢስራኤሌን ሲፌቲዳይታ ጋሶን
ባቢሎኔይ ኩንዳና
ቤሳዉስ» ጌስ።51፡49 ኣጁ 18፡24
ባቢሎኔን ዲዛ ኢስራኤሌ ኣሳስ ኪቴቲዳ ኪታ
50 ኢንቴኖ ማሻፌ ኬሲ ኤኪ ኣቲዳይቶ!
ቢቴ፤ ሃይሳን ታኮፍቴ፤
ሃኮ ቢታን ዲዛይቶ
ጎዳ ኣኬኪቴ፤
ዬሩሳላሜካ ቆፒቴ።
51 «ኣላጋቲ ጌሻሶሆ
ጎዳ ኬ ጌሊዳ
ጊሻስ፥ ‹ኑኒ ጫዬቲዶስ፤
ዬላይ ኑ ሲን ካሚዴስ፤
ካዉሻቴካ
ጉሉንቲዶስ› ጊቴ» ጌስ።
52 ጊዶ ኣቲን ጎዳይ፥
«ባቢሎኔ ኤቃ ጾሳታ
ቃጻያና ዎዴይ ያና፤
ኢዚ ቢታ ኡባን
ማዱንጺዳይቲ ጎታራና።
53 ባቢሎኔይ ፑዴ ሳሎ ኬዚኮካ፥
ቁ ጊዳ ሚኖ ሚጻ
ኦኮካ ታኒ ይሲዛይታ
ኢዚ ቦላ ዬዳና» ጌስ።
ባቢሎኔ ዮ
54 «ባቢሎኔፔ ዋሶይ ሲዬታና፤
ኢስታ ቢታፌ ጊታ ባሻ
ጬንጉርሲ ሲዬታና።
55 ጎዳይ ባቢሎኔ ይሳና፤
ኬሃ ዋሲዛ ኢዚ ዋሶዛ
ጮኡ ሂስታና፤
ኢስታ ሞርኬቲ
ጊታ ሃ ማላ ጉማና፤
ኢስታ ዋሶይካ ኮሹማና።
56 ባቢሎኔ ይሲዛ ሚሺ ያና፤
ኢዚ ኦላንቻቲ ዲኤታና፤
ኢስታ ዎንዳፌይካ ሜቃና፤
ጎዳይ ጌኔ ኦሶ ጊሻስ
ሃሎ ኬሲዛዴኔ
ኢዚ ሃኒዛ ሚሽ ኡባስ
ቤሲዛ ዋጋ ቃንጺዛ ጾሳ።
57 ኢዚ ሹሜታኔ ኣ ኤራንቻታ
ኢዞ ሃሪዛይታኔ ጊታ ኣሳታ፥
ኢዚ ኦላንቻታ ታኒ ማሳና፤
ኢስቲ ሜርናስ ኢቻና፤
ሲሚዲካ ቤጌቴና» ጌስ
ኢዛ ሱን ጎዳ
ኡባፌ ዎልቃማ
ጾሳ ጌቴቲዛ ካዎይ።
58 ጎዳይ ኡባፌ ዎልቃማ ጾሳይ፥
«ጉባይ ዳልጋ ጊዲዳ
ባቢሎኔ ጊምቤቲ ላሌታና፤
ቁ ጊዳ ኢዚ ፔንጌቲካ
ታማን ጹጌታና፤
ኣሳይ ሃዳ ዳቡሬስ፤
ካዎቴታ ዳቡራይ
ታማስ ጻላ ጊዳና» ጌስ።
59 ዩሁዳ ካዎ ሴዴቂያሲ ካዎቲዳ ኦይዳን ላይን ካዎዛ ጊቤ ዛቤዚ ማኢሴያ ናዛ ኔሪያ ና ሳራያይ ካዎዛራ ባቢሎኔ ቢዳ ዎዴ ናቤ ኤርማሲ ኢዛስ ዮቲዳ ኪታይ ሃይሳ። 60 ኤርማሲ ባቢሎኔ ጊሻስ ካሴ ጻፊ ዎዳይሳ ኡባ ባቢሎኔ ቦላ ያና ባሽ ኡባ ጻ ማጻፋን ጻፊዴስ። 61 ሳራያስካ፥ «ኔኒ ባቢሎኔ ጋኪዳ ማላ ሃይሳ ቃላ ኡባካ ኔ ቃላ ቁ ሂስታዳ ናባባናይሳ ባሎፓ። 62 ኔኒ፥ ‹ኣቤት ጎዳዉ! ኔኒ ሃኖ ሃ ሶሆዪን ኣስ ጊዲን ሜሄይ ሙሌራ ያና ጋካናስ ሜርናስ ቡላ ኬሳና ጋዳሳ› ጋ። 63 ኔኒ ሃይሳ ጻ ማጻፋዛ ናባባ ዉርሲዳፔ ጉዬ ኢዛ ጊዶን ሹች ቃቻዳ ኤፊራጺሴ ሻፋን ኤፋ ዬጋ። 64 ሂስታዳ፥ ‹ባቢሎኔይካ ታ ኢዚ ቦላ ኤሂዛ ባሻፌ ዴንዲዳይሳን ሃይሳ ሚቴታና፤ ናምኣን ሲማ ዴንዱኩ፤ ኢዚ ኣሳይካ ኩንዳና› ጋ» ጌስ።51፡63-64 ኣጁ 18፡21 ኤርማሲ ሃሳይዳ ቃላይ ሃይሳን ፖሌቲዴስ።