1 ጎዳይ፥ «ዩሁዳ ናጋራይ

ቢራታ ቢኢሬኒኔ

ሆጼ ኣልማዜ ጼራን ጻፌቲዴስ፤

ኢስታ ዎዚና ቦላኔ

ኢስቲ ያርሺዛሶን ዲዛ

ካጬታ ቦላ ጻፌቲዴስ።

2 ኢስታስ ናይቲካ ኣቶንታ ጪሊላ

ሚታ ጋርሳኒኔ

ቃ ዙምቡላታ ቦላ ዲዛ

ያርሾሶታኔ

ኣሼሮ ጌቴቲዛ

ኤቃ ሚስሌዮ ቆፔቴስ።

3 ኔ ቢታን ኦሴቲዳ ናጋራ ጋሶን

ዙማታ ቦላኔ

ዙምቡላታ ቦላ ዲዛ

ኔ ኣቆታ፥

ኔ ዱሬቴኔ ኔ ጎይኖሶታ

ታኒ ዲኦስ ኣ ኢማና።

4 ኔ ሞሮ ጋሶን

ታ ኔስ ኢሚዳ ጺንጾዛፔ

ኔ ሜላ ኣታና፤

ኔና ታኒ ኔ ኤሮንታ ቢታን

ኔ ሞርኬታስ ኣይሌሳና።

ጋሶይካ ሜርናስ

ታማ ማላ ኤጺዛ

ታ ሃንቆዛ

ኔ ዴንዳሳ» ጌስ።

5 ጎዳይ፥ «ኣሳን ኣማኔቲዛይ፥

ኣሾ ማይኢዳ ኣሳን ጬቄቲዛይ፥

ባ ዎዚና ጎዳፔ

ሃሲዛይ ቃንጌቲዳዴ።

6 ኢዚ ባዞን ዲዛ

ቄሪ ዎራ ማላ ጊዳና፤

ኢዚ ሎኦ ሚሽ ቤኤና፤

ኢዚ ኣሲ ባይንዳ ማጺኔ ቢታን

ባዞን ሜላ ሶሆን ኡታና።

7 ጊዶ ኣቲን ጎዳን ኣማኔቲዛ ኣሲ፥

ኢዚ ኣማኔቲዛይ

ጎዳ ጊዲዳዴይ ኣንጄቲዳዴ።

8 ኢዚ ሃ ላንቄን ቶኬቲዲ፥

ባ ጻጶ ዱጌ ሃን ዬዲዳ

ሚ ማላ።

ኣዋ ሴላስካ ያዬና፤

ኢዛ ሃይይ

ጪሊሊዳ ማላ ዳና፤

ኣዋይ ዳሪዳ ላይካ ባቤና፤

ኣይፌ ኢሞፔካ ፓጬና።✝

9 ኣሳ ዎዚናይ ኡባ ሚሻፌካ ጌኔ፤

ኢዛስ ፓጻቴካ ዴና፤

ኢዛ ኤራናስ ኦኒ ዳንዳያኔ?

10 ታኒ ጎዳይ ኣስ ኡባስ

ኢዛ ኦጌ ማላኔ

ኢዛ ኦሶ ማላ ኢማናስ

ኣሳ ዎዚና ፒልጋይሲኔ

ኢዛ ካሃ ፓጫይስ» ጌስ።✝

11 ቤሶንታ ኦጌራ ኣቆታ ዳጋሲዛ ኣሲ

ባ ጱቂሶንታ ጪዬ

ሃጵዛ ኩራቾ ማላ።

ኢዛ ላይይ ቡሮ ባጋቲሺን

ኢዚ ኣቆታ ኣጊ ባና፤

ዉርሴን ኢዛ ኤያቴ

ቆንጬ ኬዛና።

12 ኑ ጾሳ ኬ ዲዛሶይ

ቤኒፔ ዶሚዲ ቁ ጊዳ

ቦንቾ ኣራታ።

13 ኢስራኤሌስ ሂዶታ ጊዲዳ ጎዳዉ!

ኔና ኣጊ ቢዳ ኡባይ ዬላታና፤

ኔና ዴኦ ሃ ፑልቶ ጊዲዳ

ጎዳ ኣጊዳ ጊሻስ

ባ ኣይፌሶ ኔፔ

ሃራሶ ዛሪዛይቲ

ጉዱላ ቦላ

ጻፌቲዳይሳ ማላ ጊዳና።

14 ኣቤት ጎዳዉ! ታና ፓ፤

ታኒካ ፓጻና፤

ታና ኣሻ፤

ታኒካ ኣታና፤

ጋሶይካ ታ ጋላታይ ኔና።

15 ኣሳይ ታና ዛሪ ዛሪዲ፥

«ጎዳ ቃላይ ኣዋን ዲዜ?

ኣኔ ሃኢ ፖሌቶ!» ጌቴስ።

16 ሄንንቻ ጊዳዳ

ኔስ ኦናፔ

ጉዬ ጋቤኬ፤

ታ ኢስታስ ኢታ ጋላስ

ኣሞቶንታይሳ ኔ ኤራሳ፤

ታ ዶናፔ ኬዚዛይሲ

ኔ ሲንን ቆንጬ።

17 ታና ዳጋንዛዴ ጊዶፓ፤

ኔኒ ታስ ሜቶ ጋላስ

ታ ባቃታ ኣቲዛሶሆ።

18 ታና ዬዴዛይቲ ዬላቴቶ፤

ታና ዬላሶፓ፤

ኢስቲ ዳጋሜቶ፤

ጊዶ ኣቲን ታና ዳጋማፔ ቆታ፤

ኢስታ ቦላ ኢታ ጋላስ ኤሃ፤

ኢስታ ቦላ ዳኮ ባሽ ኤሃ።

19 ጎዳይ ታና፥ «ዩሁዳ ካዎቲ ካታማ ጌሊዛሶኒኔ ኬዚዛሶ ዴራ ፔንጌኒኔ ሃራ ዬሩሳላሜ ፔንጌታ ኡባን ባዳ ኤቃ። 20 ሂስታዳ ኢስታስ፥ ‹ሃ ፔንጌታራ ጌሊዛ ዩሁዳ ካዎቶ! ዩሁዳ ኣሳቶ! ዬሩሳላሜን ዲዛ ኣስ ኡባቶ ጎዳ ቃላ ሲዪቴ!› ጋ» ጌስ። 21 ጎዳይ ታስ፥ «ሳምባታ ጋላስ ቶሆ ቶኪዲ ዬሩሳላሜ ፔንጌታራ ጌሎንታ ማላ ኢንቴስ ናጌቲቴ!✝ 22 ሳምባታ ጋላሳን ኢንቴ ኬፌ ቶሆ ቶኪዲ ኬሶፍቴ፤ ዎይኮ ኣይኮ ኦሶኔ ኦፍቴ። ካሴ ኢንቴ ኣዋታ ታኒ ኣዛዚዳ ማላ፥ ሳምባታ ጋላስ ዱማሲዲ ቦንቺቴ።✝ 23 ኢስቲ ጊዲኮ ሲዪቤቴና፤ ዎዚናንካ ዎቤቴና፤ ኢስቲ ሲዮንታ ማላኔ ሲሞንታ ማላ ባ ዎዚና ሙሚሲዳ። 24 ጊዶ ኣቲን ኢንቴ ታኒ ጎዳይ ዮቲዛይሳ ናጌቲ ኣዛዜቲኮ፥ ሳምባታ ጋላሳን ኣይ ሚሺካ ቶኪዲ ሃኖ ሃ ካታማይ ፔንጌታራ ጌሎንታ ኣጊኮ፥ ሳምባታ ጋላስ ዱማሲዲ ኢዛን ኣይ ኦሶኔ ኦንታ ቦንቺኮ፥ 25 ዳዊቴ ካዎቴ ኣራታን ኡቲዛ ካዎቲኔ ኢስታ ሹሜቲ ሃ ካታማይ ፔንጌራ ጌላና፤ ኢስቲ ባ ፓራታኒኔ ባ ፓራ-ጋሬታ ቦላ ኡቲዲ ዩሁዳ ኣሳይኔ ዬሩሳላሜ ኣሳይ ኣዣቢን ያና፤ ሃ ካታማያ ሜርናስ ኣሲ ዲዛ ካታማ ጊዳና። 26 ኣሳይ ጹጌቲዛ ያርሾኔ ሃራ ያርሾ፥ ካ ያርሾ፥ ኤጻኔኔ ጋላታ ያርሾ ኤኪዲ፥ ዩሁዳ ካታማታፔ፥ ዬሩሳላሜ ዩሾን ዲዛ ሞታፔ፥ ቢኒያሜ ቢታፌ፥ ጋፔኔ ጌዜፌ ቃሴካ ኔጌቤ ቢታፌ ጎዳ ኬ ያና። 27 ጊዶ ኣቲን ኢንቴ ሳምባታ ጋላሳታ ዱማሶንታ ኢጺዲ ሳምባታ ጋላስ ቶሆ ቶኪዲ ዬሩሳላሜ ፔንጌታራ ጌሊዲ ታ ኣዛዞ ሜንኮ ታኒ ዬሩሳላሜ ፔንጌታ ቦላ ኢዚ ሚጻታ ሚዛ ቶኦንታ ታማ ታ ኤና» ጊዴስ።