ኤርማሳ ቲንቢቴ 31

1 ጎዳይ፥ «ሄ ዎዴ ታኒ ኢስራኤሌ

ቆሞ ኡባታስ ጾስ ጊዳና፤

ኢስቲካ ታ ዴሬ ጊዳና» ጌስ።

2 ጎዳይ፥ «ማሻፌ ኣቲዳ ዴሬይ

ባዞ ቢታን

ታፔ ኪያቴ ዴማና፤

ታኒካ ኢስራኤሌስ

ሼምፖ ኢማናስ ያና» ጌስ።

3 ጎዳይ ኑስ ሃሆሶፔ ቆንጪዲ፥

«ታኒ ኢንቴና

ሜርና ሲቆን ዶሳዲስ፤

ሄሳ ጊሻስ ታ ቃቴን

ኢንቴና ታኮ ሺሻዲስ።

4 ኢስራኤሌ ዴሬዞ!

ታኒ ኢንቴና ዛራ ኬጻና፤

ኢንቴካ ኬጼታና።

ኢንቴ ካራቤ ዛሪ ዴንዲ

ኡፋይሳን ሆምቦጪዛይታራ

ኢንቴ ሆምቦጫና።

5 ኢንቴ ዛሪዲ ሳማሪያ

ዙምቡላታ ቦላ

ዎይኔ ቶካና፤

ጎሻንቻቲ ቶካና፤

ኢስቲ ኣይፊዛ

ኣይፌዛንካ ኡፋዬታና።

6 ኤፍሬሜ ዙምቡላታ ቦላ

ናጊዛይቲ፥

‹ሃ ዪቴ፤

ጎዳ ኑ ጾሳኮ

ፑዴ ጺዮኔ ኣኔ ኬዞስ›

ጊ ጼይጋና ዎዴይ ያና» ጌስ።

7 ጎዳይ፥ «ያቆቤ ዴራስ

ኡፋይሳን ዬጺቴ፤

ካዎቴታ ሃላቃስ ኢሊሊ ጊቴ፤

ኢንቴ ጋላታካ ሲሲቴ፤

‹ጎዳዉ ኢስራኤሌፔ

ጫሻ ኣቲዳ

ኔ ዴራ ኣሻ› ጊቴ።

8 ቤኢቴ ታኒ ኢስታ

ፑዴሃ ባጋፌ ኤሃና፤

ቢታ ጋጻፔካ

ታኒ ሺሻና፤

ኢስታ ጊዶን ቆቄቲኔ ዎቤቲ፥

ኣቤይ ባይንዳ ማጫሳቲኔ

ሚጻቲዛይቲ ዳና፤

ኬሂ ዳሪዲ

ባንታ ዴሬ ሲማና።

9 ታኒ ኢስታ ዛራዳ ኤሂዛ ዎዴ

ኢስቲ ዬኪሼኔ

ዎሲሼ ያና።

ታኒ ኢስታ ፑልቶ

ሃ ኣቻራ

ሱሬ ኦጌራ ካሌና።

ጋሶይካ ታኒ ኢስራኤሌስ ኣዋ፤

ኤፍሬሜይካ ታስ ባይራ ና።

10 «ኢንቴኖ ካዎቴቶ

ጎዳ ቃላ ሲዪቴ!

ሃሆን ዲዛ ኣባ ጋጻታንካ፥

‹ኢስራኤሌ ላሊዳይ

ኢዚ ኢስታ ዛሪ ሺሻና፤

ባ ዉዴዛካ

ሄንንቻ ማላ

ኢዚ ሄማና› ጊዲ ኣዋጂቴ።

11 ጋሶይካ ጎዳይ

ያቆቤ ዎዛና፤

ኢዛፔ ሚኒዛይታ ኩሼፔ

ኢዛ ኬሲ ኤካና።

12 ኢስቲ ዪዲ ጺዮኔ ዙማ ቦላ

ኡፋይሳ ማዛሙሬ ዬጻና፤

ኢስቲ ጎዳ ኪያቴ ጊዲዳ

ካን፥ ዎይኔ ኡሻን፥

ዛይቴን፥ ዴይሻኒኔ

ዶርሳ ላቃታን፥ ዎፋኖታኒኔ

ኡሳታን ኡፋዬታና፤

ኢስቲ ሃ ፓጮንታ

ኣታኪልቴ ሶሆ ማላ ጊዳና፤

ሃይሳፌ ጉዬ ኢስቲ ሙዞቴቴና።

13 ሄ ዎዴ ጌላኦቲ

ኡፋዬቲዲ ዬጻና፤

ዎዳላቲኔ ጪማቲ ጉፓና፤

ታ ኢስታ ዬሆዛ

ኡፋይሳን ላማና፤

ታ ኢስታ ሙዞቴፌ

ሚንና፤

ታ ኢስታስ ኡፋይስ ኢማና።

14 ታኒ ቄሴታ ኬሃ ኣንጃና፤

ታ ዴሬዛካ

ኪያቴ ካላና» ጌስ።

15 ጎዳይ፥ «ዋሶይኔ ጫሞ ዬሆይ

ኤራማ ካታማፔ ሴቴቲዴስ፤

ኢዚ ናይቲ ዉሪዳ ጊሻስ

ኤራሄላ ዬካዱስ፤

ሚኔቶንታካ ኢጻዱስ» ጌስ።✝31፡15 ሜ 35፡16-19፤ ማቶ 2፡18

16 ጎዳይ፥ «ዬኮፋኔ ኣፉንጾፋ፤

ኔ ዳቡራይ ጮ ሃዳ ኣቴና፤

ሞርኬታ ቢታፌ ኢስቲ ሲማና።

17 ሲንፌ ኔስ

ሂዶታይ ዲዛ ጊሻስ

ኔ ናይቲ ባንታ

ቢታ ሲማና» ጌስ።

18 «ኤፍሬሜይ ጫሞ ሚላስ ሚላሊሺን

ኣዳፌ ታ ሲያዲስ፤

‹ሎሆንታ ዎፋኖ ማላ

ታና ቃጻያዳሳ፤

ታኒካ ቃጻዬታዲስ፤

ኔኒ ጎዳ ታ ጾሳ፤

ኔኒ ታና ዛራ፤

ታኒካ ሲማና።

19 ታ ኔፔ ሃካ ቢዳፔ ጉዬ

ሲማዳ ሞታዲስ፤

ታ ኣኬኪዳ ዎዴ

ታ ሁኤ ባቃዲስ፤

ታ ዬላጋቴ

ካዉሻቴ ቶካዲስ፤

ዬላታዳ ጉጻዲስ› ጊዴስ።

20 ኤፍሬሜይ ታ ዶሳዳ

ኡፋዬቲዛ ታ ናዛ ጊዴኔ?

ዳሮ ዎዴ ታ ኢዛራ

ኤቄታ ሃሳይኮካ

ዛራዳ ኢዛ ጊሻስ ታ ቆፓይስ፤

ታ ማራጬይ ኮኮሬስ፤

ታ ኢዛስ ኬሃ ቃታይስ»

ጌስ ጎዳይ።

21 ጎዳይ፥ «ኦጌን ማላታ ኤሳ፤

ቢዛሶ ቤሲዛ ማላታ ቶካ፤

ኔ ባና ዎጋ ኦጌዛ ኣኬካ፤

ጌላኦዬ ኢስራኤሌ ሲማ፤

ሂስታዳ ኔ ካታማታ ጌላ።

22 ሃኔ ካዲዳ ናዬ!

ኔ ኣይዴ ጋካናስ ቶይላታኔ?

ጎዳይ ሳኣ ቦላ

ኦራ ሚሽ ሜና፤

ሄሲካ ማጫይ

ኣዴ ዶዳና» ጌስ።

ጾሳ ዴሬስ ሲንፌ ያና ኢሻሎ ዴኦ

23 ኡባፌ ዎልቃማ ጎዳ ኢስራኤሌ ጾሳይ፥ «ታኒ ኢስታፌ ዲኤቲዳ ሚሻ ታ ኢስታስ ዛሪዛ ዎዴ ኢስቲ ዩሁዳ ቢታኒኔ ኢዚ ካታማታን፥ ‹ኔኖ ጺሎቴ ኣቂዛ ጌሻ ዙማዞ! ጎዳይ ኔና ኣንጆ!› ጊዛ ቃላ ዛሪ ጎኤታና። 24 ጎሻንቻቲኔ ሜሄ ሃሮን ኣቂዛይቲ ዩሁዳኒኔ ዩሁዳ ካታማታን ኢሲፌ ዳና፤ 25 ታኒ ላባኒዳ ሼምፖዮ ኦራጺሳና፤ ዳቡርዳሮካ ሚንና» ጌስ።

26 ሄ ዎዴ ታኒ ስኮፌ ቤጋዳ ዩሻ ጼላዲስ፤ ታኒ ማልኦ ስኮ ስካዲስ።

27 ጎዳይ፥ «ታኒ ኢስራኤሌ ቢታኒኔ ዩሁዳ ቢታን ኣሲኔ ሜሄ ኩንዛ ዎዴይ ያና። 28 ኢስታ ቃላናስ፥ ላላናስ፥ ሺራ ዬጋናስ፥ ይሳናሲኔ ባሽ ኢስታ ቦላ ኤሃናስ ኬሃ ታኒ ሚኒዳ ማላ ኢስታ ዛራ ኬጻናሲኔ ቶካናስ ኬሃ ሚናና» ጌስ።

29 «ሄ ዎዴ ኣሳይ፥

‹ኣዋቲ ዎይኔ ሚ ቴራ

ጫሊዳይሳ ሚን

ኢስታ ናይታ ኣቺ ዚልኢዴስ›

ጌቴቲዛ ሌሚሶ

ናምኣን ሃሳዬቴና።✝31፡29 ሂዚ 18፡2

30 ጊዶ ኣቲን ኣሳይ ኢሶይ ኢሶይ ባ ናጋራን ናጋራን ሃይቃና፤ ዎይኔ ቴራ ቃዉኤ ሚዳ ኣሳ ኣቺ ኡባይ ዚልኣና» ጌስ ጎዳይ።

31 ጎዳይ፥ «ታኒ ኢስራኤሌ ዴራራኔ

ዩሁዳ ዴራራ ኦራ ጫቆ

ጫቄታና ዎዴይ ያና።✝31፡31 ማቶ 26፡28፤ ማር 14፡24፤ ሉቃ 22፡20፤ 1ቆሮ 11፡25፤ 2ቆሮ 3፡6✝31፡31-34 ኢብ 8፡8-12

32 ሄ ጫቆዚ ታኒ ኢስታ ጊብጼፔ

ኬሳናስ ኢስታ ኩሼ ኦይካዳ

ኢስታ ኣዋታራ ጫቄቲዳ

ጫቆዛ ማላ ጊዴና፤

ታኒ ኢስታስ

ኣዚና ማላ ጊዳ ዲሺን

ኢስቲ ታናራ ዲዛ

ጫቆ ቃላዛ ላሊዳ» ጌስ።

33 «ጊዶ ኣቲን ታኒ ጎዳይ

ሄ ዎዴፔ ጉዬ

ኢስራኤሌ ዴራራ

ታ ጫቄታና ጫቆይ ሃይሳ፤

ታኒ ታ ዎጋ

ኢስታ ዎዚናን ጻፋ ዎና፤

ታኒካ ኢስታስ ጾሳ ጊዳና፤

ኢስቲካ ታ ዴሬ ጊዳና።✝31፡33 ኢብ 10፡16

34 ሃይሳፌ ጉዬ ኦኒካ ባ ላጌ

ዎይኮ ባ ኢሻ፥

‹ጎዳ ኤራ› ጊዲ ታማርሴና፤

ጋሶይካ ጉፌ ዶሚዲ

ጊታ ጋካናስ

ኢስቲ ኡባይ ታና ኤራና፤

ታኒካ ኢስታ ቆሆ ኣቶ ጋና፤

ኢስታ ናጋራካ ናምኣን

ዛራ ቆፒኬ» ጌስ ጎዳይ።✝31፡34 ኢብ 10፡17

35 ጋላሳን ፖኢሳና ማላ

ኣርሼ ዎዳይ፥

ኦማርሳን ፖኢሳና ማላ ኣጊናኔ

ጾሊንቴታ ኣዛዚዳይ፥

ዳምባላይ ጉማና ማላ ኣባ ቃዛይ

ኢዛ ሱንይ ጎዳ ኡባፌ

ዎልቃማ ጾሳ ጌቴቲዛይሲ፥

36 «ሃ ኤቂዲ ዲዛ ሜታ ዎጋይ

ታ ሲንፌ ኪቺኮ

ሄ ዎዴ ኢስራኤሌ ዜሬቲ

ታ ሲንን

ሜርናስ ካዎቴ ጊዲዲ

ዱሳይ ኣታና» ጌስ።

37 ጎዳይ፥ «ቦላን ዲዛ ሳሎታ

ጋኪ ዋናስ ዳንዳዬቲኮ፥

ዎይኮ ጋርሳን ዲዛ ቢታ ጻጶ

ጋኪ ፒልጊ ኤራናስ ዳንዳዬቲኮ

ሄ ዎዴ ታኒ ኢስራኤሌይ ኦዳ

ኦሶ ኡባ ጊሻስ

ታ ኢስታ ዬጋ ኣጋና» ጌስ።

38 ጎዳይ፥ «ሃናኒኤሌ ጊምቤፌ ዶሚዲ ጉላ ፔንጌ ጋካናስ ካታማያ ታስ ጎዳስ ኦሴታና ዎዴይ ያና። 39 ዋ ዎዶሮዚ ሄፔ ዶሚ ሲቲ ጊዲ ጋሬቤ ዙምቡላታራ ኣዲ ጎኣሃ ጋካናስ ሚጬታና። 40 ኣሃይኔ ቢዲን ዬጌቲዛ ሾባ ኡባይ ኣርሼይ ሞኪዛ ቄዲሮኔ ሾባራ ቢዲ ፓራ ፔንጌ ጋካናስ ዲዛ ቲ ጊዳ ዴምባይ ኡባይ ጎዳስ ዱማቲዳዝ ጊዳና፤ ሄሳፌ ጉዬ ሄ ካታማያ ሾዴቱኩኔ ላሌቱኩ» ጌስ።