Jeremias 9

1 ሹኬቲዳ ታ ዴራ ጊሻስ ኦማርሲኔ

ጋላስ ታ ዬካና ማላ

ታ ሁኤይ ሃ ኦላ፥

ታ ኣይፌቲካ ፑልቶ ማላ

ኣፉን ጎጊሲዳኮ

ታ ኣይ ማላ ዶሳንዲና!

2 ታኒ ታ ዴራፔ ሻኬታዳ

ሃካ ባና ማላ

ባዞን ማንዳራይ ኣቂዛሶሆ

ታስ ኦኔ ኢማናይ!

ኢስቲ ኡባይካ ላይማቲዛይታኔ

ባሌዛይታ ጊዲዳ።

3 ጎዳይ፥ «ኢስቲ ባንታ ኢንጻርስ

ዎርዶ ሃሳያናስ

ዎንዳፌ ማላ ጊግሲዳ፤

ቱማን ጊዶንታ ዎርዶራ

ቢታይ ቦላ ሚኒዳ፤

ኢስቲ ኢታ ቦላ ኢታ

ጉጂ ጉጂ ቢዳ፤

ታናካ ኤሬቴና» ጌስ።

4 ቃሴካ ጎዳይ፥

«ኢሻይ ኢሻ ባሌስ፤

ላጌይ ባ ላጌ ዚጊሬስ፤

ሄሳ ጊሻስ ኢሻይ

ኢሻፔ ናጌቶ፤

ላጌይ ባ ላጋን ኣማኔቶፎ።

5 ላጌይ ባ ላጌ ጪሜስ፤

ቱማ ሃሳይዛይ ዴና፤

ኢስቲ ባንታ ኢንጻርስ

ዎርዶ ሃሳያ ታማርሲዳ።

ናጋራ ኦሶን

ባንታና ዳቡርሴቴስ።

6 ኔኒ ባሌይ ኩሚዳሶን ዳሳ፤

ኢስቲ ባንታ ጪሞ ጋሶን ታና

ኤራና ኮዪቤቴና» ጌስ።

7 ሄሳ ጊሻስ ኡባፌ

ዎልቃማ ጎዳይ፥

«ታኒ ኢስታ ቢራታ ማላ

ፓጫዳ ሴሪሳ ጌሻና።

ታ ዴራ ናጋራ ጊሻስ

ታ ሃይሳፌ ሃራ

ኣይ ኦና ዳንዳያዚና?

8 ኢስታ ኢንጻርሳይ

ዎዛ ዪሻ ማላ፤

ኢስቲ ጪሞ ሃሳያ ሃሳዬቴስ።

ኡባይካ ባንታ ላጌታራ

ሲቆ ቃላን ሃሳዬቴስ፤

ጊዶ ኣቲን ባንታ ዎዚናራ

ዎጺማዴ ጊጊሴቴስ።

9 ሂስቲን ሃይታ ሃ ዮኦታ ጊሻስ

ታ ኢስታ ቃጻያና ቤሴኔ?

ታኒ ታ ሁኤስ ሃይሳ ማላ

ካዎቴ ቦላ

ሃሎ ኬሲኪና?» ጌስ።

10 ታኒ ቃ ዴሬታስ

ዬካናኔ ዋሳና፤

ባዞን ሄንሶሆታስ

ካዮታና።

ጋሶይካ ኢስቲ ይዳ፤

ሄራ ኢሲ ኣሲኔ ካንና።

ሜሄ ዋሶይ ሲዬቴና፤

ሳሎ ካፎቲኔ ዶኣቲ

ባቃቲዲ ቢቺዳ።

11 ጎዳይ፥ «ዬሩሳላሜ ካታማ

ታኒ ቡቲ ካይዚዳሶኔ

ዎራካናቲ ካኢዛሶ ኦና።

ዩሁዳ ካታማታካ

ኣሲ ባይንዳሶ

ቡላ ኬሳና» ጌስ።

12 ሄሳ ኣኬካናስ ዳንዳይዛ ኣ ኤራንቻይ ኦኔ? ጎዳይ ኢዛስ ቆንጪሲን ሃይሳ ኢዛስ ዮታና ዳንዳይዛይ ኦኔ? ቢታያ ኣሲ ባይንዳ ካይስ ኣይስ ጊዳዴ?

13 ጎዳይ፥ «ሃይሲ ሃኒዳይ ኢስታስ ታኒ ኢሚዳ ዎጋ ኢስቲ ኣጊዲ ኣዛዜቶንታ ጊሻሲኔ ታ ማራ ካሎንታ ኣጊዳ ጊሻሳ። 14 ሂስቲዲ ኢስቲ ባንታ ዎዚና ሙሜቴን ቢዲ ባንታ ኣዋቲ ታማርሲዳ ማላካ ባኣሌ ጌቴቲዛ ኤቃ ጾሳ ካሊዳ» ጊዴስ።

15 ሄሳ ጊሻስ ኡባፌ ዎልቃማ ጎዳ ኢስራኤሌ ጾሳይ፥ «ቤኢቴ፥ ታኒ ሃ ኣሳ ጫሚዛ ቁማ ሚዛናኔ ማርዜራ ዲዛ ሃ ኡሻና። 16 ኢስታ ዎይኮ ኢስታ ኣዋቲ ኤሮንታ ካዎቴታ ጊዶን ታኒ ኢስታ ላላና። ታኒ ኢስታ ይሳና ጋካናስ ማሻን ዬዴና» ጌስ።

ዬሩሳላሜ ኣሳ ዚላስ

17 ቃሴካ ኡባፌ ዎልቃማ ጎዳይ፥

«ኣኔ ዬሆ ዬኪዛ ማጫሳታ ጼይጊቴ፤

ዚላስ ሎኤ ኤሪዛ ማጫሳታ ኤሂቴ።

18 ኢስቲ ኤሶን ዬቶ፤

ኑ ኣይፌራ ኣፉን

ጎጋናሼ ጋካናሲኔ

ኑ ሲጲንራ ኣፉን ፑልታና

ጋካናስ ኑ ጊሻስ ዚላሌቶ።

19 ጺዮኔን ዚላሳ ጬንጉርሲ ሲዬቴስ፤

‹ኑኒ ይዶስ!

ኑኒ ኬሂ ካዉዪዶስ!

ኑ ኬ ላሌቲቺዳ ጊሻስ

ኑ ቢታ ኣጊዲ ዴንዲ ቦስ›

ጊ ዚላሌቴስ» ጌስ።

20 ኢንቴኖ ማጫሳቶ!

ጎዳ ቃላ ሲዪቴ!

ኢንቴ ሃይይ ኢዛ ዶናፔ ኬዚዛ

ቃላ ኤዝጎ።

ኢንቴ ማጫ ናይታ

ዚላስ ታማርሲቴ፤

ኢሲኒያ ሃንኮሮ ዬሆ ታማርሱ።

21 ሃይቆይ ናይታ ኦጌፔ፥

ናቴ ናይታ ዱቡሻፔ

ፒቲ ይሲዴስ፤

ኑ ማስኮቴታራ ጌሊዴስ፤

ኑ ቆልኣ ጊዶ ካንዴስ።

22 ሄሳ ጊሻስ ጎዳይ ታና፥

« ‹ኣሳ ኣሃይ ቡራ ማላ

ዴምባን ላሌታና፤

ካ ሺሺዛይቲ ጉዬን ኣጊዳ

ፑሹሎ ማላ ኣታና፤

ኢስታ ኦኒካ ሺሼና› ጋ»

ጊዲ ኣዛዚዴስ።

23 ጎዳይ፥ «ኣ ኤራንቻይ

ባ ኣ ኤራቴን ጬቄቶፎ፤

ዎልቃማይ ባ ዎልቃን ጬቄቶፎ፤

ዎይኮ ዱሬይ ባ ዱሬቴን ጬቄቶፎ።

24 ጊዶ ኣቲን ጬቄቲዛ ኦኒካ

ታኒ ጎዳ ጊዲዳይሳ ኤሮኒኔ

ቢታ ቦላ ሲቆ፥ ሱሬ ፒርዳኔ

ጺሎቴ ኦዛይ ታና ጊዶይሳ

ኣኬኮን ጬቄቶ።

ታኒ ሃይታን ኡፋዬታይስ» ጌስ።✝9፡24 1ቆሮ 1፡31፤ 2ቆሮ 10፡17

25 ቃሴካ ጎዳይ፥ «ቤኢቴ፥ ባንታ ኣሾ ጻላ ቃጻሬቲዳ ኣሳ ታኒ ቃጻያና ዎዴይ ዬስ። 26 ሄይቲካ ጊብጼ፥ ዩሁዳ፥ ኤዶሜ፥ ኣሞኔ፥ ሞኣቤኔ ባንታ ሁኤ ጪሪ ሜዲዲ ባዞን ዲዛ ኣሳ ኡባታ። ሃ ካዎቴታን ዲዛ ኣሳይ ኡባይ ቱሙካ ቃጻሬቲቤና፤ ኢስራኤሌ ኣሳ ኡባ ዎዚናይካ ቃጻሬቲቤና» ጌስ።